الموضوع: انا فى ورطة كبيرة ارجو النصيحة

السلام عليكم ورحمة الله
طبعا انا جديد جدا فى عالم السواقة والعربيات انا معابا لانوس 1 (2000)وكانت العربية كويسة لمدة شهر وبعدين الصوت مبقاش كويس زى الاول وحصل انى من اسبوعين ماشى على الدائرى والعربية ماشية عال جدا فجأة بدوس بنزين الاقى مفيش صوت ولا حاسس بالبدال واول ما وقفت العربية بطلت مردتش تقوم ابدا جه ميكانيكى (والله اعلم) قالى عايزة وصلة المهم علشان مطولش مقامتش واضطريت انى اقطرها لاقرب حد ممكن اعرفه جه الميكانيكى تانى يوم وقالى دى ضربت جوان ومحتاجة يتغيرالمهم غير مشتغلتش اكتشف بعدها ان عامود الكامة اتكسر جبت عامود كامة مش اصلى ب280 لانى لقيت الاصلى ب525ج والمشكلة بقت مادية المهم خلص ولقيت صوت العربية عالى وفى تكتكة قالى دى تمام بس اظبت التكيهات
الصوت معجبنيش رغم انه قل شوية رحت لمركز فى المعادى اول ماسمع صوت الماتور قالى انا حاسس ان الزيت مابيطلعش فى الجزء اللى فوق المهم فتح الموتور لقى فعلا ان الكرنك محتاج يتجلخ والمصفاة محتاجة تتغير والصوت هيفضل زى ماهو او الحل الجذرى انا اعمل نص عمرة واغير طقم شنبر ولقيت الجوان القديم مكنش ضارب ولا حاجة
انا عارف انى طولت عليكم بس بجد انا مكتئب ومحتاج افهم منكم ونصائحكم

المشاركة الأصلية كتبت بواسطة magareh

لا حول ولا قوه الا بالله
ربنا يعوض عليك وبأذن الله خير
انا بيتهيألي انه في مشكله حصلت في الزيت في عربيتك ممكن يكون الزيت قطع وهو اللي اتسبب في كسر عامود الكامه و تسلخ عامود الكرنك
و ده ممكن يكون ليه اسباب كتير ممكن الزيت نقص يعني عندك تسريب او ممكن الفلتر اتكتم او ممكن يكون طلمبه الزيت فيها مشكله علي حد علمي
في حاجه لازم حضرتك تاخد بالك منها كويس وهي لمبه الزيت لازم تتأكد اول ما تفتح الكونتاكت انها بتنور وبعد ما تدور الموتور بتطفي علشان تتأكد ان دائره التزييت شغاله كويس
المهم انت في الحاله بتاعتك علي حسب كلامك لازم هتخرط عامود الكرنك وتغير سبيكه وتغير طقم شنبر
ولازم تتأكد من باقي اجزاء الموتور زي البساتم و الصبابات وجلب الصبابات
وزي ما الاخوه بينوا لحضرتك المفروض انك تحسب التكلفه ولو كانت عاليه الاحسن انك تغير بلوك الموتور و تقريبا بيتكلف 2000 جنيه
انا حاسس بالمشكله اللي عندك بس متزعلش اكيد ده هو الاحسن ليك وزي ما بيقولوا قضاء اخف من قضاء

كلامك مظبوط تماما هوقالى ان فى مشكلة فى الكرنك وان الزيت مبيطلعش لفوق وده اللى كسر عمود الكامة الاولانى وكان ممكن يكسر التانى هو كان فى حلين حل مؤقت تجليخ الكرنك وتصليح دائرة الزيت وده تكلفته 200 جنيه بس الصوت هيكون موجود والمشكلة الاصلية فى الموتور هتفضل موجودة او الحل الجذرى زى محضرتك اتفضلت تغيير سبيكة وعمود كرنك وطقم شنبر ب1400ج طبعا انا اخترت الحل الجذرى ادعولى متفتحش اكتر