بصراحة برافو فرامل لانوس

**mahmoud labeb** · 26-02-2013 10:44 AM

المشاركة الأصلية كتبت بواسطة truss

عن نفسى بحاول على قد ما اقدر استخدم فرملة المحرك engine braking خصوصاً على السرعات العالية

يعنى ايه قصدك الغيار العكسى؟؟؟؟؟؟؟؟؟

**m_medo** · 26-02-2013 11:32 AM

الحمد لله

**MMamdouh** · 26-02-2013 01:28 PM

المشاركة الأصلية كتبت بواسطة mero100

تمام ... بس السؤال : ليه كتر استخدام الفرامل ( بمعني سخونه التيل و الطنابير ) بيضعف قوه الفرامل .. اللي انا فاهمه ان كل ما التيل يسخن يدي كفاءه اعلي ... و لا العكس هوه الصحيح؟

و هل الماستر الاكبر بيدي قوه فرامل اكبر و لو بنسبه تحسن ؟؟

اولا زى ما انت عارف الطاقة لا تفنى ولا تستحدث ولكن تتحول من صورة الى اخرى

عشان توقف عربية لازم تحول الطاقة الحركية الى صورى اخرى عشان العربية تقف

فرامل العربية شغلتها تحويل الطاقة الحركية الى طاقة حرارية من خلال احتكاك التيل بالطنبورة

لما تيل الفرامل بيسخن زيادة عن الحد المسموح بية بيبداء صلابتة تقل و يبقى طرى و بالتالى معامل الاحتكاك بتاعة بيقل و بالتالى مفيش حرارة زيادة يمكن توليدها و بالتالى العربية سرعتها مش بتقل لان الطاقة الحركية خلاص مش بتتحول الى حرارة

طيب ازاى نتغلب على المشكلة دى؟؟؟

فية طريقتين:

اول طريقة هى انك تركب تيل انشف شوية من التيل اللى بتستعملة حاليا عشان تبقى درجة الحرارة اللى بيبداء يفقد صلابتة عنها اعلى و بالتالى يتحمل اجهاد حرارى اعلى قبل ما يبداء يفقد قدرتة على الاحتكاك بالطنبورة.... حل سهل بس فيه مشاكل

التيل الانشف بياكل فى الطنابير و بيبوظها بسرعة اضافة الى ان فى بداية التشغيل التيل دة بيحتاج يسخن شوية عشان يبداء يشتغل كويس بالتالى اول كام دوسة فرامل بيبقى اداء الفرامل ضعيف جدا

الطريقة التانية هى انك تركب طنابير اكبر فى الحجم... الطنابير الاكبر فيها كمية معدن اكبر بكتير من الطنابير الصغيرة بالتالى كمية الحرارة اللى بتحتاجها عشان ترفع درجة حرارة الطنبورة درجة مئوية واحدة هيبقى اكبر (زى كدة كمية الغاز اللى بتحتاج تحرقها عشان تغلى كنكة قهوة مقابل حلة على البوتجاز)

و علية فا ارتفاع درجة حرارة الطنابير الى حد تتجاوز فيه الحد الاقصى للتيل بيبقى اصعب بكتير لان الطنبورة الاكبر بتمتص كمية حرارة اكبر قبل ما ترتفع درجة حرارتها مقارنة بالطنابير الاصغر... حل عملى تماما و فعال اقصى درجة لكن مكلف

حجم الماستر لوحدة مش بيفرق فى قوة الفرامل... الموضوع بيبقى نسبة بين قطر الماستر و قطر مساتر العجل (الضغط يساوى القوة مقسومة على المساحة)

كل ما الفرق بينهم كان اكبر (ماستر عمومى اصغر و ماستر عجل اكبر) كل ما الفرامل بقت اقوى بس مشوار الدواسة هيزيد... العكس بالعكس لو الفرق قل الدواسة مشوارها هيبقى صغير لكن هتحتاج تدوس بقوة اكبر عشان توقف العربية

الموضوع نسبة و تناسب و لازم لما تعدل تبق عارف ايه اللى هتخسرة مقابل اللى هتكسبة... يعنى فى عربيتك مثلا لما تركب الماستر ال22 بدل ال20 انت هتكسب مشوار دواسة اقل و بالتالى استجابة اسرع للفرامل... بس فى مقابل سنة تقل زيادة فى البدال... التقل مش هيبقى كبير اوى للدرجة بس فرق الاستجابة يستاهل

انما مثلا لو ركبت ماستر40 (بفرض ان فيه حاجة كدة اساسا) هيبقى مشوار الدواسة نص المشوار الحالى مثلا لكن هتحتاج تدوس على البدال برجليك الاتنين لان المقاومة هتبقى الضعف

MMamdouh