الموضوع: (๏̯͡๏) تجربتى المفصلة لنقل الملكية وتجديد رخصة تسيير السيارة وحدة مرور طنطا

اليوم الثانى .. يوم الأربعاء الماضى

(1) الصبح فى حوالى الساعه 9 روحت على المكان اللى بيفحصوا فيه العربيات فى المرشحة لاقيت طابور كبير بس يعتبر معقول نوعا ما وقفت بعربيتى فى الطابور وأنا القلق بياكلنى من جوه علشان رقم الماتور اللى مش لاقيه ... اخدن أورنيك الفحص ووصل الطفاية وروحت ختمت الأورنيك علشان يبقى جاهز وطبعوا رقم الشاسية على الطفاية وختمولى الورقة ومفيش مشاكل

(2) الطابور كان بيتحرك ببطئ كان فيه ناس بتعمل مفتحه وتغمز الموظف اللى بياخد البصمة بفلوس علشان يخلصوا انا قولت مش هدفع رشوة لأى حد .. الحمد لله الدور جه عليا فى زمن قياسى لايتجاوز الساعه خلاص اخدنا على الطوابير بسبب طوابير البنزين الاسبوعية والجو كان كويس جدا ومريح اخدوا بصمة الشاسية من على الركبة اللى عليها المساعد الايمن ولاقوها مطابقة للبصمة اللى على القايم الايسر واخدوا بصمة الماتور من مكان مكنتش متوقعه فى وش المحرك بجوار سير الكاتينه والحمد لله كله مطابق للرخصة وتنفست الصعداء


(3) اخدت الورق وروحت للمهندس قام معايا بص على العربية ولف حواليها وقالى تمام وبعدين واحنا ماشين بص فى الرخصة وقالى اللون فى الرخصة رمادى ميتالك ... ده بقى رمادى ولا رصاصى ... قولتله وايه الفرق بين اللونين سكت ومضاها وروحت مضيتها من الضابط اورنيك الفحص ووصل الطفاية

(4) رجعت لمبنى المرور الجديد اللى فى أول طريق المحلة الكبرى لو انت هتنقل ملكية اخلع نمر العربية وخدهم معاك علشان متنزلش تانى

(5) اشتريت بوليصة تأمين من الأكشاك اللى تحت لمده 3 سنوات من نايل تكافل سعر الوثيقة 330 جنيه (محدش يدفع عميانى ابقى أسأل فى كل الأكشاك عن سعر الوثيقة للمدة اللى انت عاوزها) ...فيه اختلافات بين شركات التأمين فوجئت بعد كده ان كشك مصر للتأمين اللى لازق فيهم بيدى نفس وثيقة التأمين بـ 310 جنيه ... اموت واعرف ايه فايده التأمين الإجبارى بيعود علينا أو على اى حد من الشعب بإيه !!!
مكتوب فى الوثيقة انهم بيدفعوا تعويضات بتصل الى 40000 جنيه عن الشخص الواحد
بس واضح انها شركات للنصب ومحدش بيطول منهم تعريفة


(6) طلعت الدور الثالث روحت للموظف بتاع الملاكى اللى مكتوب على شباكه رنج الارقام اللى فيهم رقم عربيتى .. قولتله عاوز انقل الملكية بإسمى واجدد ... اخد الورق بعد شوية انتظار حلوين قدام الشباك وطلع الملف بتاع العربية وقعد يطلع فى اوراق كتيرة من الدرج ويكتب حاجات كتير وبعدين ادانى أوراق كتيره قالى امضيها من المراجع فى الشباك اللى جنبى وامضيها من الضابط رئيس قسم التراخيص

وطلب الأوراق ديه اشتريها من شباك تانى بيبع النماذج

[gdwl]- ملف اصفر معفن بـ 1 جنيه اخده لنفسه هههههه
- 3 نماذج 351 ... روحت لبتاع النماذج ادانى 3 نماذج 251 وقالى كله زى بعضه للملاكى سعر النموذج 6.20 .. خد 20 جنيه
- بـ 12.5 طوابع شرطة
- 4 صور واضحة للبطاقة الحمد لله كنت جاهز بيهم
- اصل التوكيل بتاع العربية واصل الرخصة
- أصل العقد المسجل
- شهادة المخالفات
- دفعت فى الخزنة 670 جنيه ثمن الضريبة على السيارة .
- سلمت نمر العربية فى الدور الرابع اخد وصلين كانوا معايا واخد النمر واخد صورة البطاقة .. وقالى لما تاخد الرخصة الجديده ابقى تعالى استلمهم

[/gdwl]
(7) بعد كل اللى فات رجعت للموظف بالأوراق المطلوبة بعد شوية وقوف حلوين بردو طلع ملفى واخد الأوراق وقعد يكتب فيهم شوية وبعدين اداهم للمراجع .. روحت للمراجع لاقيت قدامه هم ما يتلم من الملفات عمال يتفحص فيهم ... فضلت قاعد حوالى ساعه ونصف لحد ما جه الدور على ملفى واتراجع وبعدين اترمى على الأرض علشان يتبعت اخيرا على قسم الكمبيوتر علشان الرخصه تتطلع

(8) بعد انتظار حوالى ساعتين ملل رهيب .. كله قاعد مستنى بالساعات .. وفى تمام الساعه 1.5 اسمى اخيرا اتنادى وروحت استلمت الرخصة ... وطلعت الدور الرابع استلمت نفس نمرى القديمة والحمد لله
بس الرخصة شكلها ردئ جدا والطباعه تعبانه قوى ومش عارفين يقصوها كويس من الأطراف وشكلها يقرف
وواضح ان المرور من سيئ الى اسوأ ومفيش اى تطوير ولا اى تحسن فى الخدمة كما يشاع من وزارة الداخلية ان الدنيا بقت بمبى فى المرور
الحمد لله انها خلصت على خير
ومدفعتش ولا جنيه رشوة

وبصراحة اللى بيجدد رخصته فى الشتاء ارحم مليون مرة من اللى بيجدد فى شهر 7 ولا 8
كانت روحى بتطلع بمعنى الكلمة من الحر والفرهده
انتظروا بعد هذه المشاركة
مشاركة عن شائعات بخصوص التجديد ونقل الملكية والفحص