الموضوع: بيضوحباطي على الطريق ! صرخة الى سائقي الطرق اللي كانت سريعة

موضوع جميل
تسلم ايدك يا أستاذ تامر

المشاركة الأصلية كتبت بواسطة ahmed_adham

واللهي فكرت أعمل الموضوع ده هنا من زمان بس اللي منعني ان مش هيه المشكله الوحيده في البلد ولا دي المشكله الوحيده في المرور اللي نتكلم عليها وبعدين كام واحد من اللي بيسوقو هيقرا وكام واحد هينفذ وكام واحد هيفضل ملتزم بعد شهر ولا اتنين.

البيضوحباطيين دول انا قسمتهم 4 فئات

1- كبار السن
2- السيدات
3- اللي مش بيعرفو يسوقو أو اللي لسه واخدين رخصه قريب
4- اللي بيتكلمو في الموبايل

وكلهم بيمشو شمال عشان الحاره اليمين بتحتاج تركيز جامد عشان بتوع الميكروباص والتاكسي اللي بيقفو بدون مقدمات. وعشان الحاره اللي في النص بتلخمهم عشان بيبقى فيه واحد على يمينه وواحد على شماله فبيقولك أمشي شمال جنب الاسمنت وأبقى ارتحت من الناحيه الشمال وكده كده معندوش نيه يغير حارته فمش محتاج يقلق من الناحيه اليمين.

هتقولي أعمل معاهم ايه؟ لو يمينه فاضي عدي من اليمين لأن ده أسرع حل. ولو اليمين مش فاضي عشان واحد ماشي على مهله على 70 ولا حاجه (وده حقه ومش غلطان) يبقى تيجي ورا اللي على الشمال ده وتفتح النور العالي وتريح ايدك على الكلاكس ومتسكتش الا لما ييجي يمين. ولو بعد ما دخلك من الشمال وفتح الازاز ولا هدى عشان يكلمك نفضله ومتهديش عشان هوه هيهلفط بأي كلام ملوش لازمه وهوه كده كده غلطان والكلام مش هيبقى فيه نتيجه الا انك تتعطل ويمكن تاخد شتيمه على الماشي فاشتري دماغك وطيييييييييييير.

من الحاجات اللي بتغيظني بالمناسبه لما يكون الطريق واقف والدنيا ليل ويجيبك حظك الزباله ورا واحد عنده باغه لمبه الفرامل مكسوره وكل ما يفرمل يضرب النور الابيض في عينك يعميك وتبقى عايز تفلفص من وراه ومش عارف عشان الزحمه.

ولا اللي بيبقو سايقين والمرايات مقفوله ولا مش موجوده من أساسه وتلاقيه بيكسر عليك على العمياني وتيجي تكلمه يقولك يعني انت مش شايفني وأنا داخل قدامك!

ولا لما تكون في الحاره اللي في النص جوه البلد وعايز تدخل يمين وتدي اشاره وكل اللي جايين من على يمينك تلاقيهم بيقلبو نور ويزمرو ومحدش عايز يهدي عشان تدخل قدامه لحد ما تلاقي نفسك بقيت حنب الشارع اللي هتدخل فيه ويا اما تفوته وتدخل من اللي بعده يا اما تقف خالص في الحاره الليي في النص لحد ما واحد من اليمين يتكرم ويقفلك وطبعا تكون عطلت ناس وراك.


السواقه أخلاق قبل ما تكون شطاره وفهلوه بس أصحاب الاخلاق بيعانو وللأسف بيتحولو هما كمان عشان يعرفو يعيشو.

متفق مع حضرتك تماما في الرأي

معلش يا أستاذ أحمد سؤال صغير بعيد عن الموضوع
هو لون عربية حضرتك فضي كنت بتلحم فردة كاوتش جنب عماد راغب من كام يوم؟

الموضوع ده جه ف وقته
االناس مبقتش تخاف من حاجة عادى جدا تلاقى واحد واقف ع الشمال واحد جاى عكس ع الدايرى عادى
الجديد بالنسبه لى بقى ع الزراعى كنت ماشى والطريق ماشى نسبيا مش واقف والاقى تلات تريلات جنب بعض بعرض الطريق وادامهم بتاع 100 متر ادى فلاشر كلاكسات مفيش كانهم متفقين مع بعض
المهم فهمت ف الاخر انهم بيعملوا كده عشان ميعدوش كل شويه يدوسوا فرامل فبيمشوا جنب بعض ويسيبوا مسافه بينهم وبين اللى ادامهم مدى غيار اول وماشى ع رحته مش بيدوس فرامل
يعنى الطريق ادامهم فاضى وانت ماشى ع مشيتهم ده كلام يا جدعان بالله عليكم

بردو جزئيه تانيه نفسى تشرحوهالى يا جماعه الخير
لما اكون ماشى ع بالسرعه الرسميه للطريق ويجى واحد عايزنى اعديه وليكن ماشى ع المحور 90 المفترض انا اللى ماشى قانونى اغير الحارة عشان اعديه ولا ولا وهل انا ابقى بيضوحباطى :d:d
طب لو انا ماشى بسرعه اعلى من السرعه المقررة وليكن ع المحور وماشى 120 والاقى واحد بردو عايز يعدى من الشمال!!!!

المشاركة الأصلية كتبت بواسطة rider 2050

بردو جزئيه تانيه نفسى تشرحوهالى يا جماعه الخير
لما اكون ماشى ع بالسرعه الرسميه للطريق ويجى واحد عايزنى اعديه وليكن ماشى ع المحور 90 المفترض انا اللى ماشى قانونى اغير الحارة عشان اعديه ولا ولا وهل انا ابقى بيضوحباطى :d:d
طب لو انا ماشى بسرعه اعلى من السرعه المقررة وليكن ع المحور وماشى 120 والاقى واحد بردو عايز يعدى من الشمال!!!!

هو سؤال محرج بس عديه وادعيله بالهداية والتمس ليه العذر يمكن مستعجل لامر مهم او يمكن مريض او اى حاجة كلنا ساعات بتحصل معانا
فانت لو فى ايدك تعديه وفى نفس الوقت حضرتك حتكون بامان لتغيير حارتك فعديه ومش حتخسر حاجة
.........
وموضوع جميل يا استاذ تامر