تجديد الرخص - شكل جديد نفس القرف الفديم و اكتر
انا مش عارف هل دا العادي ولا له علاقة بالقانون الجديد لانج دا
كل اللي اعرفهم لما كانوا بيجددوا رخص القيادة كانوا بيقولولي ان الموضوع بياخد يوم كامل و كله جوا المرور - كام نموذج و تتصور كمبيوتر و شكرا
النهاردة كنت بجدد والاقي البيه الموظف بيطالبني ب شهادات طبية نظر و باطنة و شهادة مخالفات
احاول افهمه اني بجدد مش باطلع رخصة جديدة - يقولي دا النظام
احاول افهم منه ابه شهادة المخالفات دي كمان - مش المخالفات اللي بتتحوش بتبقى على رخصة العربية ؟
بيعني اللي انا افهمة ان يا اما الواحد بيعمل مخالفة فابيوقفوه و يسحبوا رخصته - و ساعتها لازم حاكون دفعت عشان اجيبها تاني
يا اما مخالفة تكون اتسجلت فى حقي من غير مايوقفوني و دي حاتجيلي وانا بجدد رخصة العربية
المهم مافيش عقاد نافع - و هوا دا النظم و خلاص
النتيجة النهائية - بكرة كمان واخده اجازه عشان اكمل اجراءات تجديد الرخصة
و احلى حاجة - تقف في الطابور ساعة عشان توصل للموظف يقولك روح اشتري بتاع ايه
ترجع و تقف ساعة كمان - توصله يقولك روح الشباك اللي جنبي جيب ابصر ايه
ترجع و تقف ساعة كمان - عشان يقولك "الابصر اية اللي اشتريته دا بقى روح اشر عليه"
و كله كدا يبني
انا تعبت من الكتابة و مصدع موت من الحر الرهيب النهارده - بس دا تقريبا اجمالي الحوار - دمتم سالمين