الموضوع: بفكر اشتري كلب جولدن ريتريفر !

المشاركة الأصلية كتبت بواسطة prince_bondok1st

وفى الحالة دى هيبقى ورك لاين يعنى من غير كسحة

انا فاهم موضوع الكسحه
بس يعني ايه ورك لاين وهل موضوع الكسحه يفرق
وهل ان لونه احمر وحشبه عريض يغني عن موضوع الكسحه ولا كده تقليبه مش كويس
وايه رايك في الشرا من مركز تدريب الكلاب التابع للشرطه في العباسيه؟

مع الشكر

الورك لاين من اسمة انة كلب شغل بمعنى هيبقى معرض للحركة كتير وانة يجرى بسرعة زى موضوع العربيات مش فى عربية بتكون عملية اكتر هو هو نفس الموضوع وعشان كدة تلاقى كل كلاب الشرطة فى اى مكان لازم تكون ورك لاين . لية الشولاين سموة كدة ولية مش بيستخدموة زى الورك لاين ؟
الشولاين من اسمة كلب عرض يدخل مسابقات محتاج رعاية واهتمام كبييييييير ثانيا موضوع الكسحة بتاثر على المفاصل الخلفية على المدى البعيد وكمان الورك لاين اسرع من الشو لاين
على فكرة الورك لاين فى منة بيور اذا الفرق بين الورك والشو الكسحة بس فى حاجات متوافرة فيهم هما الاتنين
اولا يقولك الكلب لونة احمر دم طبعا الجيرمن شيبرد البلاك جاك بيبقى لونة خليط بين الاسود والاصفر او البنى الفامق بس بيبقى الاصفر والبنى الغامق اكتر كتورزيع الوان من الاسود طبعا كل ماكان الااللون اللى مع الاسود اغمق كل ماكان افضل ودى صورة للون الغامق بالنسبة للكلب الكبير وفى كمان اغمق من كدة بس دة ورك لاين

ثانيا الخشب العريض والكفوف ودى بتبقى رجلية وهى مستقيمة بتبقى عريضة وكفوفة كبيرة زى الصورة

واخد بالك حضرتك من الكفوف والخشب العريض بسم الله ماشاء الله علية
ثالثا الماسك او يقولك وجههة تقيل تحس ان الكلب لابس ماسك اسود على وجهه وكل ماكان الماسك غامق كل ماكان افضل ودى صورة للماسك



رابعا ذيل الكلب يكون لامس الارض يكون على الارض يعنى
خامسا خالى بالك من دماغ الكلب الافضل تكون ضخمة لان انا اعرف ان الدماغ بتتناسب طرديا مع ذكاء الكلب كل ما كانت كبيرة كل ماكان الكلب اذكى
كل المواصفات دى بتتفاوت حسب السعر بردة
انا عارف انى طولت بس حبيت احط حضرتك فى الصورة نرجع لسؤال حضرتك هو الورك لاين تقليبة مش كويس لا الورك لاين فى منة بيور وتقليب عالى جدا جدا هو هو الشولاين بس الفرق الكسحة
بس عامة لو حضرتك ناوى تتاجر فيهم او هتبيع جراوى وكدة يبقى الشولاين افضل اللى هو بكسحة لية لانك هتقدر تجيب كل الفلوس اللى دفعتها فى الشراء وزيادة كمان
اما لو حضرتك مش هتاجر او هتجيبة تسلية حبا فى التربية ومنة حراسة بردة الورك لاين الاختيار الانسب
ومش معنى كدة ان جراوى الورك لاين رخيصة لا مش رخيصة دة الكلام دة لو حبيت تتاجر بردة فى الورك لاين بس الشو اغلى منها لمنظرها الجمالى
حاجة كمان فى ناس ممكن تفتكر ان الميل هو الكسحة لا خالص فى فرق بين الميل والكسحة اعرف ازاى الفرق انا اللى انا اعرفة ان الكلب لما يجرة وتبصلة من الجنب لو لاقيت ان ضهرة ملفوف او مايل وهو بيجرى يبقى دى كسحة
اما الميل ممكن تلاقى الكلب وهو واقف ضهرة مايل بس لما يجرة تحس ان ضهرة مستقيم مش فى ميل وفى حاجة بردة اسمها العراقيب اللى هى الميل اللى فى اخر رجل الكلب دى موجودة فى الورك والشو
عامة اهم حاجة وانت بتشترى صحة الكلب اوعى تاخد كلب عيان حتى لو عندة برد اوعى
حذارى ان مدى تقليب الكلب هو مقياس حبك لية
وفى النهاية هقول لحضرتك كام معلومة
الجيرمن شيبرد فى منة لونج هير وميديم هير وشورت هير اللى بيدخل المسابقات العاملية الشورت والميديم اما اللونج مش بيدخل بسبب ان شعرة بيبقى مغطى على حجمة
الجيرمن شيبرد فى منة ورك لاين وشو لاين ساعات الناس بتقول على الجيرمن الورك يقولك علية بجلم شيبرد اللى هو الراعى البلجيكى لان الراعى البلجيكى من غير كسحة خالص مفيهوش شو لاين
الجيرمن شيبرد بيتضمن البلاك جاك اختصار كلمة بلاك جاكيت نتيجة لون الاسود اللى على ضهرة
وفى بردة البلاك كوت شرابات ودة بيبقى كلة اسود ماعادا رجلية بيبقوا بنى
وفى الرويال بلاك بيبقى كلة اسود
اما بالنسبة مركز تدريب الكلاب التابع للشرطة بلاش لان بيبقى تقليب متوسط وطالبين مبالغ عالية اوى مقارنة بالتقليب هو مايميز الكلاب عندهم صحة الكلاب وضخامة الكلاب لانهم بيهتموا بيهم بس غالييييين جدا
اسف على الاطالة
واى استفسار انا تحت امر حضرتك
والله اعلى واعلم فيما قلت