الموضوع: تأثير القطط على البنات ؟

لو حضرتك دورت شوية على النت في نسب حمل القطط لميكروب التكسوبلازما هاتلاقيها من أقل الحيوانات انتشارا على مستوى الحيوانات الأليفة والبهائم والدواجن

نسبة انتشار الميكروب مثلا في الأرانب بتعدي الثمانين في المائة تقريبا
وفي الأبقار والجواميس والخرفان وما إلى ذلك بتوصل الى 70 %
وفي العصافير زيها زي القطط بتوصل 20 - 30 %
وفي الكلاب
وفي البني آدمين نفسهم فيهم نسبة كبيرة

القطط زيها زي أي كائن عايش على الكوكب ومعرضة لمشاكله وأمراضه

والمرض ده الوقاية منه بتكون بالنظافة الجيدة والأكل جيد الطهي ... لأن الحرارة تقتل هذا الميكروب ... وعدم التعامل مع براز القطط أثناء تنظيفه على نحو مباشر من التلامس يفضل تكون لابس جوانتي من بتاع الدكاترة مثلا أو حتى بعد عملية التنظيف تغسل إيدك بصابونة مضادة للبكتيريا وخلاص

90 % من قطط المنازل النظيفة لا تحمل المرض .. لأن أساس المرض الأكل النيء والمتعفن اللى بيكون في الشوارع وصناديق القمامة التي تتغذى عليها قطط الشارع وليس قطط المنازل

90 % من أمهات البيوت المصريات في الأرياف مثلا دايما بيحذروا بناتهم من اقتناء القطط بسبب إن "القطط مش حلوة للبنات" دون معرفة السبب ... لأنهن في الوقت نفسه يطلبون من بناتهم التجول في الحقل خلف البهائم التي يملكونها لجمع برازهم في أكياس لبيعه أو استخدامه كسماد ... رغم أن نسبة وجود الميكروب في البهائم أكبر من القطط للضعف تقريبا

القط له تطعيمات من الممكن أن يحصل عليها في مستشفيات الكلب الحكومية أو في أي عيادة طبيب بيطري خاصة ولكن اسعاره بتكون أضعاف المستشفيات .. زيه زي البيبي اللي بيطعم وهو صغير

معظم المصريين ما بيدوش القط أي تطعيمات وعايشين .. وأديك شايف بقينا 90 مليون في 30 سنة بس ...

... وعلى فكرة اللى ماعندوش قط في بيته هاتلاقيه بيتعامل مع أي قط من قطط الشوارع حتى لو كان على نحو غير مباشر ... يعني ممكن يكون قط مريض بالمرض كان نايم على غطاء عربيتك بالليل والصبح نزل مشي جيت انت وانت ما تعرفش شيلت الغطاء وحصل تلامس مباشر بينك وبين مكان القط اللى ممكن جدا يبقى ملوث بالمرض

كل الكلام اللى فوق خلاصة عمليات بحث كتير قبل ما أقرر أجيب عندي قطة لأن عندي بنات وكان مهم أعرف تفاصيل عن الموضوع ... الأرقام اللى ذكرتها تقريبية لأني مش فاكر بالضبط لكنها أعتقد مقاربة كتير للحقيقة

القطط ورد فيها أحاديث كثيرة عن الرسول صلى عليه وسلم التي تدعو الى حسن معاملتها والاحسان اليها ... وقد تركها الرسول صلى الله عليه وسلم تلد على كم قميصه ...

وكان المصررين القدماء يقدسون القط ويعتبرونه أحد آلهتهم ... وكان أحدهم إذا شب في بيته أو صومعة غلاله حريق سارع وسارعوا جميعا لإنقاذ القطط قبل أن يهرع لإنقاذ أهل بيته من شدة حبهم لها

القرار في النهاية لك ... لأنها مسئولية كبيرة كمسئولية تربية الإنسان ... وقد تكون أعظم لأن القط لن يتكلم ليوضح لك ما يطلبه .. وإذا لم تنفذ له ما يطلبه من شرب أو مأكل فقد تأثم ... حيث دخلت امرأة النار في قطة حبستها لا هي أطعمتها ولا هي تركتها تأكل من خشاش الأرض