تقرير عن ثاني ايام تطبيق قانون المرور الجديد
السلام عليكم .
اليوم كان عندي مشاوير كتير مما اتاح لي الفرصه اني اجوب محافظات وشوارع المحروسه وهنا تقريري عن اليوم بقدر من التفصيل.
بداية فترة الظهيره وكان المشوار الى محافظة الاسماعليه من مدينة نصر ........في نوع من النظام لكن مخلوط بعدم نظام مش فاهم ليه وازاي لكن حاسس الناس متلخبطه جداً جداً وفي حاله من الخوف ملموس عند ناس كتير فاماشي بحذر زايد شويه ومتصور ان الرادارات والاقمار الصناعيه في تتبع ليه .......جزء آخر من الناس ماشي بصوت عالي وغطرسه وتحدي تحس انه بيجري بغل وبياخد غرز بغل وسخط وكأنه بيقول ورونا هاتعملوا فينا ايه اكتر من اللي انتوا عاملينه :gun_smilie: خربانه خربانه.
عموما الحمد لله الطريق مر كله بسلام وبدون تواجد أمني مروري على الاطلاق سوى الكارته وكان وقتها العساكر بتتغدى بالهنا والشفا فاكانوا قاعدين على جنب وكافيين خيرهم شرهم.
رحلة العوده كانت في حدود الثامنه مساءً الطريق كان مزدحم لكن ماشي مع تواجد غريب لعصابات من الميكروباصات تحس انهم هايدوسوا عليك مع ان كانت سرعتي بين ال 120 و 140 وقتها الا ان الكائنات دي كانت اسرع بكتير ....... التواجد الامني كان اشد شويه وكان فيه عربيات كورولا حوالي تلاته وافقين على طول الطريق يعني كل 40كيلو متر واحده ......واقفه عادي مابتعملش حاجه....وكانت اللجنه عند نقطة التفتيش كان ناس كتييييييييييييير راكنين على جنب لكن احمد الله الراجل بص قلت سلام عليكم رد الحمد لله السلام وقاللي اتفضل ........الحمد لله مر الطريق على خير لكن ملحوظ جداً منطقة موقف السلام او موقف العاشر والجزء الاخير من طريق اسماعيليه الصحراوي متجه الى القاهره ......الجزء ده دائماً كان بياخد مني لوحده ساعه او ساعه ونص وصولاً الى مدينة نصر !!! اليوم كان سلس جداً جداً جداً لدرجة اني سرحت ولقيت نفسي عند الكليه الحربيه .........
نيجي لقاهرة المعز لدين الله اول حاجه شفتها كورولا 2008 مترخصه ومتركب عليها النمر الجديده وده شيء فرحني جداً مش عارف ليه مع تحفظي على شكلها لكن اهِ حاجه جديده.......اللوحة نفس الشكل اللي موجود عندنا في موضوع النمر الجديده .........لونها لبني من فوق ومكتوب مصر و 3 حروف و 3 ارقام.
بعد فتره وجيزه من الراحه اكملت مشاوير اخرى اتجاهاً الى المهندسين وشارع جامعة الدول العربيه عن طريق كوبري 6 اكتوبر ...... في نهاية الكوبري فوق النيل المكان ده دائما ما نجد الناس راكنه فيه العربيات وواقفين على النيل.........الكوبري في الجزء ده فاضي ماكانش فيه غير 5-6 عربيات وافقين والغريب ان العساكر شبه بتتحايل على الناس تمشي....والجديد ان كل عسكري معاه دفتر وعمال يكتب فيه قصائد غزل في العربيات تقريباً ولا ايه مش عارف لكن كل العساكر والامناء بلا استثناء ماسكين دفاتر وعمالين يكتبوا فيها.عموما جزء النيل ده نقدر نقول ان فيه تواجد امني متوسط وكان عامل شغل شويه والامور ماشيه.
شارع جامعة الدول العربيه كان التواجد الامني والمروري شديد القصوى ورتب كتير موجوده في الشوارع واوناش بتمر كل شويه ....... الدنيا كانت ماشيه وماكنش فيه تعثر مروري لكن في زحام وده شيء طبيعي.
أخيراً بعد ما طولت عليكم رحلة الرجوع من المهندسين اللى مدينة نصر كانت بعد منتصف الليل ......... التواجد الامني قل كتير والناس طلعت وقفت على الكوبري وعادي جداً ........الجديد في مدينة نصر ........ الحارات المروريه من عند مسجد رابعه تم رسمها وتخطيطها على الاسفلت ورسم خطوط المشاه امام اشارة يوسف عباس ورابعه وتم وضع لوحه ارشاديه مهذبه نصها ان مخالفة اداب المرور وتعليماته في تعريض لحياتك وحياة الاخرين للخطر ........تقريباً ده اللي كان مكتوب.
آسف على الاطاله لكن عندي شعور غير قوي بالتفاؤل .........فا قلت لازم اعمل التقرير المفصل ده عن الحاله المروريه اليوم الثاني من ايام تطبيق قانون المرور الجديد 2008 والله ولي التوفيق .