الموضوع: تقرير عن ثاني ايام تطبيق قانون المرور الجديد

المعادى هادية بقالها كذا يوم

و المرور فيها منساب جدا

الموضوع ده بقاله فترة من ساعة لما لغوا موضوع الركن فى شارع النصر, عند منطقة المعادى

هى الحتى اللى بتبقى زحمة, لو انت متجه من المعادى الجديدة للمعادى القديمة, و تمر بمنطقة نادى المعادى, بتبقى واقفة شوية

غير كده مفيش تغيير يذكر

و لا لجان استثنائية او اى حاجة

لكن ما زال المشى عكس الاتجاه على الاتوستراد من غير اى تغييير, خاصة عند منطقة سجن طره و مدخل المعصرة

انا لسه ميكروباص كان هيخبط فى وشى امبارح علشان ماشى عكسى و بسرعة, و فاتح النور العالى بتاعه فى وشى

منطقة الاتوستراد بعد المعادى التواجد الامنى للمرور فيها يكاد يكون شبه معدوم, والبقاء هناك للاقوى, طبعا بالترتيب المقطورات ثم الميكروباص

القانون لم يصل بنها بعد
صراصير السوزوكى فى كل مكان صف تانى وتالت ورابع وفى منتصف الطريق وأمام مداخل الأنفاق
عكس الإتجاه حدث ولا حرج
وقوف فوق عبور المشاه عادى جدا ولا يجذب إنتباه أحد
موبايل حدث ولا حرج
نمر مطموسة هى هى
فاميه هو هو
لا يوجد تواجد أمنى بالشارع إلا فى منطقة الإشارة قبل المحافظة وغير عامل وصورى
أى حد مش عاجبه القانون الجديد ممكن ينقل بنها

شـــــــــارع الهرم ثانى يوم تطبيق قانون الجبايه الجديد نزلت متجهه الى فرح بالزمالك
تواجد امنى مكثف وكل محطتين كده تلاقى كم امين شرطه او عسكرى او عربيه بوكس او ظابط مع رجاله
الشااااااااارع فوق بعضه مفيش مواصلات سواقين الميكروباص تقدر تعدهم على صوابعك كلهم اما عربيتهم مخالفه او خايفين ينزلوا او مش موافقين على موضوع التسعيره الموحده دى لانهم كانوا بيقسمواا شارع الهرم لحد الجيزه اربع محطات وطبعا فى كل مره بياخد اجره يعنى المشوار ده تدفع فيه 3 مرات وكده هيتوقف حالهم لما بقت الاجره موحده لنهايه خط الميكروباص

الناس بئه على الرصيف بكثاااااااااااااااااااافه جامده لدرجه واحنا راجعين بالليل الناس واقفه تشاور لاى ملاكى حتى الشباب بيقولوا قدام شويه لاى ملاكى
والله صعب عليا الناس العواجيز موت وهما على الرصيف قاعدين فى الارض مسسسسسسسسسخره الحكومه منها لله
مشفتش ظابط موقف حد ولا حاجه العربيات ماشيه فاميه عادى وزينووووووووون عادى جداجدا

فى الزمالك مفيش ولا اى ظابط ولا عسكرى الامن مستتب هناك جدا والناس براحتها عند النادى الاهلى الركنه صف ثانيه عادى ولو ينفع ثالث كمان هيركنوا مفيش حد هناك يحاسب
نيجى بئه لاهم منطقه فى طريق الرجوع

ميـــــــــــــــــــــــ ــدان الجيــــــــــــــــزه او ميدان الفاجعه حاااااااااااااااجه ارررررررف اررررررررررف ارررررررررررف انفلات وزحمه واستهتار وكل حاجه تقدروا تقولوها ومفيش حتى امين شرطه واقف مش ممكن دخله شارع الهرم او فيصل من ميدان الجيزه لحد ما تعدى النفق عاوزه لوحدها نص ساعه مفيش حد ينظم الناس بالكوم فى الشارع والعربيات مش عارفه تتحرك مهزله والله

الكارثه ان حصيله امبارح من المخالفات قريتها فى الجرايد كانت 1550 مخالفه

وحصيله اليوم كانت 26.000 جنيه فى يوم مجموع المخالفات اللى تم دفعها وتحرير ايصالات بيها ده اكيد غير اللى من غير ايصالات وده طبعا الحد الادنى توقعوا لو الاقصى البلطجيه كانوا هيلموا كام فى يوم

السؤال الغبى بئه اللى ملهوش جواب طبعا
الفلوس دى هتروووووووح فين

المشاركة الأصلية كتبت بواسطة OlaOsman

ايه ده يا أستاذ ده؟ امال فين الهرم و المعادي و حلوان؟

لا بجد، ده انت لفيتها من شرقها لغربها زي ما بيقولوا :)

النهاردة أول يوم لية من غير عربية.. و هافضل كده حوالي اسبوعين لحد ما استلم السيريون ان شاء الله.. و ده كويس بالنسبة لي عشان ما تطولنيش لسعة الغربال الجديد.. يمكن بعد اسبوعين يكونوا هديوا ع الناس شوية

بصراحة شايفة ان فعلا أحق مكانين بالتنظيم و التشديد همه شارع جامعة الدول و ميدان رابعة.. يعني هي دي حتة التفاؤل اللي عندي ان الناس دي عارفة هي بتعمل ايه.

ما تعرفش يا رامي اللي كانوا مركنينهم على جنب دول كان بسبب ايه؟

ازيك يا علا باشا.......يا رب تكوني بخير وصحه.
اشكرك الاول ان ردك اول رد وفعلاً انا كان يومي امبارح غريب غريب ومجهد جداً لكن الحمد لله مر بسلام وبدون خسائر.

الناس اللي كانوا واقفين معظمهم استيكر وفاميه غامق يعني كان فيه تركيز على العربيات اللي بنشوفهم في شوارع المحروسه تحسي ان العربيه واقعه في برميل ورنيش مثلاً كل حاجه في العربيه سوداء من زجاج لي فوانيس لنمر ..... دول كانوا واقفين كتير امبارح في نقطة التفتيش في الطريق الصحراوي وبأمانه كنت مبسوط جداً ان الناس دي واقفه ماعرفش ده حقد طبقي ولا ايه:p بس كنت حاسس ان فيه شيء من العداله ممكن يطبق....................(بصيص أمل مش اكتر)

أستاذ معاذ شكرا لمرورك الكريم وموافاتنا بتقرير عن منطقة المعادي.

دكتور أحمد شكرا لمرورك الكريم واطلاعنا على الحاله المروريه في بنها ولو اني كنت متصور ان بنها من المدن المرحومه من شقلبظات القاهره لكن واضح ان الحال من بعضه.......على فكره بما اننا بنتكلم عن محافظات بخلاف القاهره.اسماعيليه امبارح الغالبيه العظمى من الناس ماكانش فارق معاهم قانون جديد من قديم والتواجد الامني المروري بنفس الكثافه سابقة العهد والاشارات شغاله والدنيا منظمه جداً جداً بجد حاجه تفرح ان عندنا نظام كده ويارب كل محافظات الجمهوريه تتعدي منهم .

المشاركة الأصلية كتبت بواسطة m_moustafa800

رامي باشا انت عارف ان احسن حاجة بتعجبني في تقاريرك بجد انك منظم جدا فيها وزي ما انت قولت تحس ان الناس ماشية مش مظبوطة يا خايفين قوي يا اما ناس عايزة تعرف اخرة القانون ده ايه عموما ربنا يستر

جزاكم الله خير يا محمد باشا على المرور وكلمات الاطراء ويارب اكون دايما عند حسن الظن وفعلاً الناس مرتبكه في الشارع ومش عاوز اقول الاجهزه المعنيه نفسها في حاله من الارتباك والانسانيه الغير معهوده ........او يمكن ده لتواجد الرتب بكثافه في شتى الاماكن فا العساكر والامناء على اتم النظام انا اقصد بالانسانيه ان ماحسيتش ان المرور امبارح بيبلطج على الناس بالعكس والله قدامي ناس كتير وقفوا الظابط يقوله ماتتكلمش في الموبايل ويمشيه ........او ينبهه ان ابنه مايقعدش على رجله وهو سايق انقله من فضلك.....او ممنوع الركن هنا ....يا رب نكون كده على طول.

Kemo0o أشكر حضرتك على المرور ونورت الموضوع.

دموع الثلج جزاكم الله خير عن التقرير عن الجيزه والهرم....الحقيقه الجيزه وشارع الهرم وفيصل من المعضلات المروريه بجد في البلد واللي اتمنى في يوم من الايام تتحل ان شاء الله ولو اني ماظنش ان هانشعر بفرق ملموس سريع التحضير في المعضله دي لكن ان شاء الله خير.

اتفق مع حضرتك انه قانون جبايه وحصاد لكن برضه نقطه تفاؤل الميكروباصات اللي مانزلتش تقوم بواجبها عشان الاجره اتوحدت دي حاجه كويسه لو المرور هيحافظ عليها .......ولو ان السيناريو معروف وكلنا عارفينه وهو ان بنوع من اللامبالاه وعدم الاهتمام الميكروباص هايفضل على ما هو عليه والناس اللي مصالحها هاتتعطل هايقولوا امشي يا عم وخد اللي انت عاوزه !! وبالتالي الاجهزه المعنيه عملت اللي عليها والناس هي السبب .........

coolsh شكرا جزيلا لمرور حضرتك والتقرير واتفق مع حضرتك زي ما قلت في كلامي فوق ان في شيء من الانسانيه والذوق والادب مصحوب في تعامل الضباط وده شيء اتمنى ليه الدوام والعافيه .


في نهاية كلامي حابب اضيف حاجه مش عارف ها تتفقوا معايا ولا لأ ..........احنا فعلاً شعب طيب جداً ومفاتيحنا كتير وهناك من هو ذكي بجد في تخطيطه ومن استثمر قدر الحريه في الصحافه والبرامج الحواريه زي العاشره والبيت بيتك و90 دقيقه وباقي البرامج في ترهيب الناس بشكل غير مباشر وغير ملحوظ وده في رأيي دهاء في التعامل ...................اقصد اقول ان الحكومه بنوع من الدهاء ده يقت تسرب مشروع قانون او تنزله رسمي المهم اي طريقه وخلاص وتتعمد الناس تفضل شهر ولا حاجه بتخبط في بعض وبعدين يقوموا يبدؤوا في التنفيذ.

الله اعلم انا فاهم صح ولا لأ ممكن تكون الحكومه مش قاصده ده كله واحنا لوحدنا كده .........صحيح المثلث امبارح كان منتشر في اشارات رابعه ويوسف عباس ومصطفى النحاس.......وكانت الاسعار من 25 لي 75 وعجبي.!