كيفية تحديد ثبات العربية

**Formulator** · 02-03-2013 06:56 PM

اللى أعرفه:
طريق Straight وأسفلت Laser.. يبقى مش أقل من 150/160+ عشان تقول العربية دى ثابتة!

لكن غير كده ألش :)

تعالى فـ طريق ملفات وحارتين فقط، وأسفلت فيه عالى وواطى.. وإجرى وغرز وأقطم وشوف؟!!
هنا بقى العفشة الصح تبان! What؟

وطبعا المواقف المفاجئة والتعامل العنيف مع الدركسيون + فرامل >>> هو ده.
هتعوم ولا هتـunder ولو عملت Oversteer هتتلم ولا لأ؟!!

btw: إختبارات الثبات والـgrip والـSkid-pad الـMoose والـg-force والـLateral Acceleration ووو...etc

لازم يتعمل induction يخرج العربية at the Limit عشان يقدر يحكم! يعنى simulation لحالة الـOut-of-Control؟!! ويقيس
لكن مش بالإحساس يارجالة!!

حاجة أخيرة -واللى عايز يصدق أو مايصدقش- it's Up 2 U
فيه عربيات كل ماتزود السرعة.. الثبات بيزيــــــــــــــــــــد ؟!! ويلاحظها حتى الـrookie-driver
وبتكلم فـ سرعات من 160كم/س، من غير مانقول ماركات -معروفة :)

**tamerosman** · 02-03-2013 08:22 PM

تعالي عندنا في اسكندرية و انزل سوق علي الكورنيش في الفجر . حتلاقي اصعب ملفات في مصر..خصوصا الملف بتاع جليم ..بين اذا كانت عربيه محترمة و لا خفيفة

**El Prince** · 02-03-2013 11:14 PM

موضوع جميل و مليان معلومات

**horas3000** · 03-03-2013 01:15 AM

الثبات بالنسبه ليا
هو مدي تماسك العربية علي الطريق سواء مستقيم او ملفات
و تحمل الشاسيه و العفشه لظروف الطريق المختلفه من غير التاثير علي التماسك

**falcon191** · 05-03-2013 05:38 PM

أنا معايا نيو أكسنت وأول ماشترتها عرفت أد ايه ان ثباتها قليل، وده بان معايا على الطريق السريع وعربية نقل كبيرة معدية من جنبي

**Hmatchy** · 05-03-2013 06:14 PM

تحكم على العربية فى ثباتها بكذا حاجة
1- احساسك بالعربية على السرعة العالية فى الطوالى او عند المرور جنب عربيات نقل او اتوبيسات على سرعات عاليه يعنى حاسس العربية ماسكة فى الارض وبتحس باهتزازات فوق وتحت بسيطة ومع الطريق تبقى ثابته
لكن يمين و شمال وحاسس انك زى متكون راكب مركب تبقى بتعموم وهتقل معاك فى اول ملف
واللى بيحدد ده تصميم جسم العربية وخصوصا الكبوت و البربرز اللى قدام و الاكصدام الامامى بمعنى هل تصميم جسم العربية بيخليها ترفع الهوا فوقيها ( تدى ثبات اكتر) او تنزل الهوا تحتيها (ثبات زى الزفت) وكمان وزن العربية بس ده مش شرط اساسى زى التصميم
2- احساسك بالطارة و ميلان العربية فى الملفات و الغرز
فى عربيات فى الملفات بتميل بدرجة عاليه عكس اتجاه الملف وده بيحدف حمل العربية لبرة وتحس ان العربية عايزة الملف على الواسع اكتر ولو جيت تقطم لجوا هتعوم معاك وتمشى بالعرض
وده راجع لتصميم العفشة و الدعامات اللى بتتعمل فيها وعرض الاطارات وضغط الهوا فيهم وطبعا و اللى اهم من ده حالة الطريق لو مستوى ولا فيه مطبات هوا
3- احساسك بالفرامل واستجابة السيارة مع الفرامل فى الملفات
وده بيكون راجع لحالة الكاوتش وانظمة تدعيم الفرامل زى abs متلا و انظمة كتير متخليش العربية تعموم مع الفرامل ويفضل عندك قدرة على المناورة و السيطرة على العربية فى حالة الخطر والفرامل المفاجئة
4- ظروف الطقس و اتجاه الريح
لو الهوا عكسك او جاى من احد الجوانب هتلاقى الثبات ضايع خصوصا لو الهوا من الجمب لانو هيخش تحت العربية بسهولة ويقلل من وزنها على الارض

**MohammedAladel** · 06-03-2013 06:01 PM

المشاركة الأصلية كتبت بواسطة formulator

حاجة أخيرة -واللى عايز يصدق أو مايصدقش- it's up 2 u
فيه عربيات كل ماتزود السرعة.. الثبات بيزيــــــــــــــــــــد ؟!! ويلاحظها حتى الـrookie-driver
وبتكلم فـ سرعات من 160كم/س، من غير مانقول ماركات -معروفة :)

ممكن توضيح أكتر ؟

هو فيه أكتر من حاجة مؤثرة فى ثبات العربية تقريبا كل جزء فى العربية بيشارك فى ثباتها :)

تقصد مثلا إن يكون تصميم هيكل العربية كل ما يزيد ضغط الهواء عليه يثبت العربية على الأرض يعنى حاجة متعلقة بديناميكية مرور الهواء