الموضوع: تقرير عن صني سوبر صالون 2013 بالصور و الفيديو

بسم الله ما شاء الله و لا حول و لا قوة الا بالله

محاولة مني لرد جزء بسيط من جمايل المنتدى عليا احب اقدم تقرير بسيط عن نيسان صني سوبر صالون الشكل الجديد بالصور و الفيديو

ملاحظة : تم تصغير الصور لسهولة فتح الموضوع و لعدم اخذ وقت في التحميل

نبدأ بسم الله الرحمن الرحيم

اولا الشكل الخارجي :-

في ناس كتير مش عاجبها شكل العربية و بتفضل الشكل القديم و دي بصراحة اذواق يعني ممكن تعجب حد و متعجبش التاني و كده ،،، هي العربية انا مش هقول انا شكلها حلو لكن هي مش وحشة للدرجة اللي تخلي الواحد ميجيبهاش عشان شكلها ، انا بصراحة اول صوره اشوفها للعربية دي من بره لما نزلت في اليابان قبل ما تيجي مصر قلت دي شكلها وحش اوي ! بس لما شفتها هنا عالطبيعة و ركبتها عجبتني جدا و بصراحة الشكل اتحسن مع وجود الاسبويلر و الجنوط ,, انا هنزل صورتين للعربية من بره بس لانها مطحونة صور في كل حتة و الناس حفظت شكلها




الجنط الخلفي ( معلش صورته و هو متوسخ ) و الكاوتش ماكسيس صيني

ثانيا من الداخل :-

العربية بسم الله ما شاء الله من جوه حلوه و متعتبرش رديئة و تقفيل وحش زي ما البعض بيقول ، في شوية بلاستيكات جنب الدركسيون تحت عالشمال و المناطق دي هي اللي تعتبر ضعيفة بس الباقي ما شاء الله كويس .
الكنبة اللي ورا اوسع من الكرسي اللي قدام في منطقة الرجلين يعني في السفر اللي قاعدين ورا بيبقوا مرتاحين اكتر من الراكب الامامي ( ملاش دعوه بالسواق ده بيبقا متبهدل ) و فيها بقا مشكلة صغيره ان الكراسي ناشفة شوية يعني لو هتسافر و تقعد ٣ ساعات مثلا هتتعب من القعدة بس مش اوي .

شكل اضائة العدادات بالليل بيبقا جميل بسم الله ما شاء الله

و في الصورة دي باين النواكل و فرش الباب ( قماش مش فايبر على عكس الex ) خلينا مع الصوره

و دي صورة لوسع الكنبة الخلفية و بصراحة احسن حاجه في العربية دي الوسع

و دي صورة تانية للكنبة

المالتي فانكشن و البلوتوث

شعار نيسان و الايرباج

دراع النور

دراع المساحات

التحكم في التكييف


السقف ولمبة الصالون

اللمبة اللي قدام و المراية

الفتيس

الراديو

صورة اخرى للراديو و تحكمات التكييف

الطارة و العدادات

المراية الجانبية

مقبض اليد

صوره جانبية للتابلوه و المراية

دي صورة للدواسات من تحت و الجزء اللي مش متغطي

ثالثا : العيوب :-

اول حاجة بسيطة من عيوب التقفيل هي الكاوتش اللي فوق الباب الخلفي يمين مفارق مع حتة من السقف

و بما ان العربية فرش بيج و اي حاجه بتبان عليها انا استلمت العربية متوسخة من جوه ! اه متوسخة من جوه عند الشبابيك مكان اللي بيسند بس نضفتها قبل ما اصور و كمان في حتة باين انها متوسخة من المصنع عند الازاز اللي ورا



كده الحمدلله خلصنا الصور هتكلم عن انطباعي عن العربية و العيوب اللي واجهتني و بعدين هنزل الفيديوهات

اول حاجه ضايقتني بصراحة تأخر التسليم و انا تقريبا التسليم اتاخر شهر بس الحمدلله على كل حال
يوم الاستلام بقا مش هتكلم عنه كتير بس العربية انا كنت حاجزها فرش اسود و لما جت دي و شفت انها بيج و اتفرجت عليها مرضيتش اتكلم ولا اقول انها مفروض فرش اسود لان الصراحة الفرش البيج عجبني بيبين وسع العربية و بيخليها منورة

بعد ما استلمت بقا و خلصت الاجراءات الحمدلله اول ما طلعت بالعربية سمعت بقا صوت خروشة او تكتكه جاي من الجزء الامامي فقط و صعب تحديد مكانه و الصوت بيظهر لما يكون في هوا جامد او امشي بسرعه شويه بس قلت مش مشكلة هقولوهم عليها في الصيانه .

الكاوتش الصيني ده بقا حكايته حكاية هو بيلم زلط و بس مش مشكلة يعني اتعايشت معاه و عادي ، دلوقتي بقا بدأت احس انه بيزحلق مع الفرمله و لما اطلع بسرعه الكاوتش بيلف في مكانه ( انا عامل ١٨٠٠كم)

رابعا: انطباعي عن السيارة:-

العربية بسم الله ما شاء جميلة و تستاهل سعرها و احسن من عربيات كتير في نفس السعر و هي مش بتجري و لا بطة في نفس الوقت يعني هي عربية عائلية بتاعت الاستخدام العادي مش الاستخدام الرياضي
و عزمها بيبان فعلا بعد 4000 RPM انا لما بدوس عالاخر بيفضل التسارع ثابت لحد 4000 RPM بعد كده بتبقا طيارة ، بالنسبة للثبات و الكلام اللي بيتقال انه لما مقطورة او اوتوبيس يعدي من جنبك بسرعه بتتهز و تخرج من حارتها و الكلام ده ،، هو فعلا لما اوتوبيس يعدي بتحس بتفريغ الهوا بتحس بسسس هزه بسيطة مش بتخرج من حارتها ولا حاجه و مش هقدر اتكلم عالثبات على السرعات العالية لاني مجريتش بيها اكتر من 120 الحقيقه فا لسه شوية عالنقطة دي .

فرامل العربية ممتازة كعادة نيسان يعني مش جديده بس نوع التيل ردئ انا عندي الجنط الامامي اسود من جوه من الرايش و بسع صوت خشونة مع الفرمله البطيئة .

الاضواء جيدة بس نور الضباب ضعيف شوية و مش بيفرش كويس

صوت الموتور خشن شوية

الصاج ورررررق ورررررق

الشنطه واسعة

الراديو و السماعات حلوين و مظنش انهم محتاجين تغيير


التكييف انا جربته مدة 5 دقايق بس و تبريده حلو بس صوت المروحة الخلفية عالي حاجة بسيطة

خامساً : صيانة ال1000 :-

طبعا رحت صيانة ال1000 يوم السبت 16-2 لاوتوايجيبت ابورواش و اهم حاجه اني اقولهم على صوت الخروشة ده و كنت جايب زيت معايا شل هيليكس

الصيانه طبعا مصنعية مجانا و تم تغيير الزيت و الفلتر،،،، و فلتر التكيف لسه مجاش و مفيش دلايات ،،، كل ده مش مهم المهم الصوت ده ، لما خلصت الصيانة المهندسة قالت ان فبر الاكصدام الامامي مكانش متثبت كويس و هما ربطوه و طبعا العربية اتغسلت و دفعت كله 92 جنيه ( 57 فلتر زيت ، 5 جنية وردة فلتر ، 20 جنيه شحم )
اول لما ركبت العربية وانا لسه قدام المركز لقيت الصوت لسه موجود قلت هطنشه بقا لصيانة ال5000 تاني يوم اتصل مهندس من اوتوايجيبت يسال عالصيانه و مشكلتك اتحلت قلتله لا اداني معاد تاني يوم رحت قعدت 3 ساعات و جربت العربية معاه و الصوت راح الحمدلله و تم ربط فبر الاكصدام الامامي مره اخرى [/COLOR


سادسا و اخيرا : الفيديوهات:-

ملحوظة : الفيديوهات 1080P

فيديو لبداية التشغيل :
Nissan Sunny 2013 start up - YouTube

فيديو لتصفير عداد الرحلة و استهلاك البنزين : MOV_0595 - YouTube

فيديو للانذار : MOV_0609 - YouTube

فيديو للمرايات الطي كهربائي : MOV_0611 - YouTube

انا شاري دواسات و غطاء للعربية من سبينيس في مول العرب الدواسات ب 110 و الغطا بردو ب110

الدواسات باينة في الصوره دي و ميزيتها انها كبيره و مغطية كل اجزاء الارضية قدام بس للاسف مصورتش قدام و دي صورتهم ورا

[COLOR="rgb(160, 82, 45)"]اخيرا احب اوجه الشكر لكل من الاستاذ احمد مصطفى و الاستاذ LAND.CRUISER لاهتمامهم و اعضاء اخرين اعتذر ليهم لاني والله مش لاقي الموضوع اللي فيه المشاركات و شكرا لكم مره اخرى

و ده كان تقريري عن الصني اتمنى انه يكون عجبكم و منتظر اراءكم و اي استفسار انا تحت امركم ..
السلام عليكم ورحمة الله و بركاته