الموضوع: تقييم عن كيا ريو 2013

السلام عليكم ورحمه الله وبركاته

حبيت المرة دي أكتب التقرير على رواقة و في حجات كنت نسيت ازودها عن الموضوع الفات الكان في اختلفات في الرأي


حبيت أشارك تجربتي ٥ شهور مع كيا ريو 2013 ...
أول حاجة أنا إشتريتها من ELTAREK الإسكندرية الحجز كان 500 جنيه و بعد كدة بأسبوع دفعت المبلغ
كان ممكن أستلم العربية في ساعتها لكن أنا حبيت مامشيش بها غير لما إخلاص وراها و تبقى عال ترخيص..
المهم استلمتها بعديها بيومين كان وراها خالص و هما ناس محترمين بصراحة بعتو معايا راجل خلاسلي الترخيص

تجربتي :

-العربية واسعة من جوا عكس لو أنت شفتها من برا حتحس غير كدة خالص

-انا جبت فئة السيدان الأبل Highline جنوط (15) sport/ أوتمومتيك 6 نقلات ول steptronic بتاعها 4 نقلات/كاسيت aux/ بلوتوث/ اربع سمعات صوتهم نقي و كويس/و مكان التخزين الفي التابلوه مكيف يعني ونتا مشغل التكيف ممكن تسئاع أي حاجة جوا

-أول ماركبت فيها استغربت طبلوها مشاء الله كبير و مش مبين خالص الكبوت و ده العادي معظم العربيات الجديدة كدة كبوتها مش باين

-عافشثا مريحة عكس السيراتو القديمة

-سحبتها جميلة ولا يبان خالص إنها 1400 cc و موتور بتاعها أسد في الحرق

-لو عايز تشد و غرز أقلبها ستيبترونيك عشان ونت سيبها على D بتبقى سحبتها أضعف شوية و هي على 2 و 3 rpm و ده يمكن عشان نظام eco بيبقى شغال وقتها بس بعد كدة بتفتح معاك بعد 60 km لكن لو جايبها على steptronic سحبتها بتبقى أقوى... بتفرق في تسقيط النقلات و السحب

-الثبات بتاعها كويس شغالة معاك كدة غرز و تنطيط و شد يا معلم....بلاش أقارن بأي عربية تانية عشان مفيش حد يزعل مني أو مكونش حكمت على أي عربية تانية غلط

-فراملها مريحة من أول لمسة بتهدي معاك

-مافيهاش عداد حرارة لكن فيه علامة بتظهر لو سخنت لاقدر الله

-مريتها التلاتة كاشفينلك الطريق مش لازم تبص بداهراك ونت بتركن أو ونت راجع ورا

-استهلاك البنزين معقول يعني تقريبا 7.2 ليتر كل 100 كم ...أول ما العربية جات كان استهلاكها أزيد ممكن عشان كان لسة الموتور بيتلين

-نظام eco فيها عشان ماتحرائش بنزين بتبقى مكتوبة على العداد و بيتشال لما تقرص على الدواسة و ممكن يتلغا تمشي عادي من غيره

-التكيف فيها محترم بيسئع على طول ونتا واقف أو ماشي بالعربية مش بتفرق

-المضايقني فيها إنك لازم تقفل ازاز العربية أبل ماتعمل lock عشان القزاز مش بيقفل لوحده ..بس مش حوار يعني اتعودت

التوكيل: EIM Renault / Kia
أنا عاديت 7000 كيلو يعني سبعة و شوية كدة
-رحت التوكيل بعد 1000 كيلو منغير ماحجزت ولا حاجة و هو توكيل محترم غيرلي الزيت و الفلتر و كشف على الميه و دفعت تقريبا 350(جماعة لأي حد بيحط زيت لأول مرة ...حتحس إن العربية صوتها عالي خشن شوية معاك لكن بعد ما عملت 1700 كيلو تقريبا الصوت بتعها هدا و رجعت زي الأول يمكن أهدا كمان)
-تاني مرة كان على 5000 كيلو و ربط فيها العفشة و نضف فيلتر التكيف و كشف على الفرامل و غاسلو العربية و كل ده و مادفاعتش حاجة

و الحمد لله العربية مريحة و جميلة و ماشية تمام مشاء الله

KIA تورط نفسها جامد في موديلتها الجديدة و التوكيل مريح و محترم

أكيد طولت عليكم بس البيفكر و لسة متردد يا عم أه ماشية معايا تمام و أنا كنت متردد في البداية زيك ...

يا ريت يا جماعة أي إستفسارات تبقى هنا مش في الموضوع القديم عشان كان في تقييم غلط و أنا اتسرعت في كتابته ...