تجربة تفريغ نص بولو كلاسيك فى ابيزا 98 (الجزء الثالث)
السلام عليكم ورحمة الله وبركاته
انا عارف انى اتأخرت عليكم فى الجزء الثالث بس كنت حابب انه يكون الجزء الأخير وعشان كده كنت مستنى لحد ما أخلص شوية حاجات فاضلة فى العربية وده أخد منى اسبوعين من بعد الاستلام من الميكانيكى وهقولكم على سبب التأخير
فى البداية دى لينكات الجزء الاول والثانى عشان الناس اللى مش متابعة من الاول
http://www.nilemotors.net/Nile/334909-98.html
http://www.nilemotors.net/Nile/336274-98.html
اتكلمنا فى الجزء اللى فات على حل النص وعملنا شوية مقارنات بين الاختلافات اللى فى عربيتى واللى فى النص وكمان اتكلمنا على كيفية تركيب التكييف بطريقة الفبريكة
فى الجزء ده هنتكلم عن تسقيط الموتور نفسه وتركيب التابلوه والمشاكل اللى واجهتنى وطريقة حلها والاداء والتكاليف
تسقيط الموتور نفسه مفيهوش اى مشكلة لأنه شاله حتة واحدة وسقطه حتة واحدة على نفس القواعد ونفس الحوض
الخطوة اللى بعد كده انه بدأ يقفل فى التابلوه والضفيرة بتاعته وركب القاطمة والعدادات والزراير
http://nileup.com/up/uploads/nilemotors_13621813691.jpg
وده الشكل بعد التابلوه ما ركب
http://nileup.com/up/uploads/nilemotors_13621815151.jpg
كده يبقى احنا خلصنا جوه
نطلع بقى بره ونشوف ايه اللى كان ناقص
كابل البطارية اللى كان فى النص كان مقطوع من عند القواطيش وكمان الكابل بتاعى كان معمول بلدى والميكانيكى صمم انى اجيب كابل فابريكة عشان ميهربش كهرباء ويعمل مشاكل بعد كده وعلى فكرة ده سبب من اسباب تمليح القواطيش وكمان سبب من اسباب التعتيل فى الدوارة لأن الموضوع فرق كتير بعد ماركبت الكابل الفابريكة
ده شكل الكابل اللى كان فى النص
http://nileup.com/up/uploads/nilemotors_13621816151.jpg
كان فيه كاوتشة كوبلن داخلى مقطوعة بسبب الكلارك وهو بيشيل النص وجبت واحدة جديدة بالشحم والمسامير بتاعتها وطبعا دى مختلفة عن كاوتشة الكوبلن اللى كانت فى العفشة القديمة لأنها اكبر ومعروفة عند التجار بأسم كاوتشة كوبلن العفشة الكبيرة
http://nileup.com/up/uploads/nilemotors_13621817411.jpg
وكانت الخراطيم اللى طالعة وداخلة من الردياتير مقطوعين عشان يفضوا المياه منها قبل التخزين وحل الموضوع ده ان الميكانيكى راح للناس اللى بتعمل الخراطيم وخلاهم يعملوا وصلتين بقطر اقل عشان يباتوا جوه الخرطوم المقطوع وقفلهم بأفيز حديد عشان ميحصلش تسريب
طبعا الحل الاسهل انى كنت اجيب شجرة مياه بس الفكرة انى ملقتهاش استعمال ولو كنت دورت عليها جديد اكيد مكنتش هلاقيها اقل من 300 جنية ده غير فرق الخامات بين الجديد والفبريكة لكن الموضوع اتكلف 10 جنيه والنتيجة مفيش تسريب نهائى
الموتور كان طالع من النص من غير حساس شكمان بس الفيشة بتاعته كانت موجودة بالسلك, يعنى اللى قطع النص قطع قبل جسم الحساس نفسه مباشرة وساب السلك كله
حساس الشكمان ده انا بقالى اسبوعين بدور عليه وفضلت ماشى بالعربية طوول الاسبوعين من غيره بسبب انه غير حساس الشكمان اللى كان فى الموتور القديم والاختلاف مكنش فى الحساس نفسه, الاختلاف كان فى طول السلك!!!!! حساس الشكمان فى اى عربية بيركب بعد الشجرة مباشرة, والشجرة فى المواتير ال 1000 وال 1400 بتكون من قدام وقصيرة فبالتالى سلك الحساس بيكون قصير من 62 سنتيميتر الى 73 سنتيميتر لكن الشجرة عندى ماشاء الله نخلة!!!!! محتاجة السلك يكون 88.5 سنتيميتر وطبعا ده صعب تلاقيه لأن اذا كان النص نفسه جاى من غير الحساس يبقى هتلاقيه فرضانى وللا فى مكنة على الأرض؟؟!!!!! وكان الحل اننا نجيب اى حساس بأى طول بس أهم حاجة يكون نفس الفيشة واننا نقطع فيشته ونلحمه فى السلك بالفيشة اللى كانت فى النص بس انا مكنتش حابب حاجة زى كده بس كنت مضطر
طول الاسبوعين دوول وأنا قالب النت بحث عن حل بديل وسمعت شوية افتكاسات انك ممكن تلغيه وانه ملوش لازمة وحاجات غريبة, المهم وأنا ببحث عن البدائل لقيت حاجة غريبة جدا, لقيت ان نفس الحساس ده بيركب على عربيات تانية كتير وقولت يبقى اجيبه جديد بس المهم انه يكون بتاع ماركة عربية تكون اسعار قطع غيارها رخيصة, لقيت من ضمن الماركات علامة دايو, قولت تمام قوى, عايزين بقى نعرف دايو ايه؟ طلعت دايو ماتيز!!!!!! وكمان الفيات باندا والتمبرا, قولت خلاص انا هروح اجيبه من عند حد بتاع قطع غيار دايو جديد, بالصدفة كنت جنب واحد بتاع قطع غيار فولكس استيراد مشهور قوى عندنا بس مجاش فى بالى قبل كده انى اسأله, قولت مش هتخسر حاجة, والحمد لله لقيت عنده واحد بسلك طوييييل
http://nileup.com/up/uploads/nilemotors_13621818491.jpg
ركبنا الصدر اللى بيركب عليه الردياتير
http://nileup.com/up/uploads/nilemotors_13621819231.jpg
وركبت الشبكة والفوانيس القديمة
وركبنا البطارية وحطينا مياه للردياتير من الحنفية مؤقتا لحد ما اجيب مياه حمراء وحطينا زيت mobil xhp على الفلتر اللى جاى مع الموتور وعلى نفس سير التقسيمة وعلبتين زيت فرامل dot4 ودورنا
طبعا الصوت زى صوت الرعد لأن لسه ملحمش الشجرة مع الشكمان
جاب واحد بتاع شكمانات يلحم الشجرة مؤقتا مع الشكمان بتاعى لحد ما اركب الشكمان اللى كنت هاخده من عربية واحد صاحبى عشان اكبر من حيث القطر
http://nileup.com/up/uploads/nilemotors_13621820761.jpg
طبعا اللحام مكنش كويس لأن فيه فرق فى القطر نص بوصة بين الشجرة وبين شكمانى والفرق ده عمل تسريب جامد للهواء وبالتالى الصوت لسه موجود بس أقل من الأول شوية
ركبنا الطوربيدو الجديد واللى شكله كان مختلف عن اللى كان فى عربيتى لأن اللى كان عندى كان مدغدغ بس ركب عادى وشكله حلو
http://nileup.com/up/uploads/nilemotors_13621821701.jpg
كده فاضل اننا نركب فردتين الكاوتش اللى قدام عشان ننزل العربية ونسحب هواء من الفرامل ونطلع نجرب
الجنط مش عايز يركب!!!!!!!!! الجنط الفبريكة مقاس 13 والعفشة الجديدة طنابيرها وجهاز الفرامل اكبر من القديمة وده اللى مخلاش الجنط يدخل اساسا (ازاى مفكرتش فى حاجة زى كده؟؟!!!!!!), الميكانيكى قاللى لازم على الاقل جنط 14 , طبعا مكنتش عامل حساب حاجة زى كده, يعنى المفروض اجيب جنوط وكاوتش
كلمت واحد صاحبى قاللى عنده الجنوط الحديد ال 14 بتاعت الاوبل فيكترا, قولت تمام قوى لأن اكيد ابعاد المسامير زى بعض وده حل مؤقت لغاية ما أطلع من عند الميكانيكى وأجيب جنوط وكاوتش لأن كان لازم استلم العربية اليوم ده لأن تانى يوم الميكانيكى كان اجازة وكمان الساعة كانت 11 بالليل ومكنتش هلحق اجيبله حاجة
جيبنا جنوط الفيكترا وبنركب واتفاجئنا ان صرة الجنط بتاع الفيكترا اصغر من صرة الطنابير بتاعتى, وركبناها حشر وركبنا اللى قدام بس وسيبنا اللى ورا 13
نزلنا العربية وسحبنا هواء من الاربع عجلات وشيكنا على الانوار والمروحة شغالة وكله تمام, وطلعنا نجرب
http://nileup.com/up/uploads/nilemotors_13621822811.jpg
طبعا طالع متعكنن عكننة جامدة لأن بعد كل المجهود والوقت ده طالع بالعربية من عند الميكانيكى ب فردتين كاوتش قدام 14 وورا 13 وصوت الشكمان اللى كان بيفرج الناس عليا ومخلينى مش سامع صوت الموتور اساسا وبالتالى مش قادر احكم عليه وكان بيرج العربية كلها لدرجة ان الطرمبة جالها ارتجاج وده اللى خلاها فصلت منى الجمعة اللى فاتت, وكمان مفيش حساس شكمان ومخلى العربية تبرجل
طبعا مفيش مجال للتجربة اساسا ولفيت ورجعت تانى نزلت الميكانيكى عند الورشة وقاللى 1000 كيلو وتعالالى نعمل السرفيس بتاعها بس اهم حاجة كل يوم تكشف على الزيت والمياه
وطلعت على واحد بتاع جنوط استعمال انا عارف انه بيسهر عشان اشوف جنط ليا, مشيت حوالى 5 كيلو بدأت اسمع صوت ونة!!!! بتبان وانا دايس بنزين وبتروح لما بدوس دبرياج, كده يبقى فيه حاجة فى الفتيس, لفيت ورجعت للميكانيكى وقولته يبصلى على زيت الفتيس عشان الصوت ده, فعلا لقينا الزيت ناقص حوالى 2.5 كيلو وساعتها صاحب الورشة بص للصنايعى نظرة لووم رهيبة معناها انك ازاى مبصيتش على حاجة زى كده كانت ممكن تطير الفتيس لو اللى سايق مخدش باله من الصوت ده وقاللى كويس انك جيت على طوول وممشيتش عليه كتير وزودنا الفتيس بزيت موبيل لون الجركن ابيض بدرجة 90 80w api gl5ومرداش ياخد منى حق الزيت اللى زوده, وطلعت من عنده والصوت راح خالص
تانى يوم الجمعة جالى مشوار مهم قبل الصلاة لوادى النطرون!!!! اليوم ده عملت حوالى 300 كيلو وطول السكة ماشى 100-120 وجيت فى وقت اضطريت امشى 160 بس كان لمدة حوالى 5 دقائق بس كان غصب عنى
اول 4 ايام كنت بنقل على 2.5 – 3.5 rpm وبعد كده بدأت ازود الموضوع تدريجيا لحد مابقيت بوصل ل 5800 rpm وده مش على طول وغالبا بيكون على الغيار التانى والتالت لأن كل مشاويرى كانت جوه البلد
طالما الموضوع دخل فى جنوط وكاوتش يبقى ده ميعاد الخطوة اللى كنت مأجلها
جنط الفابريكة بتاع سيات ابيزا كوبرا gti موديل من 97 الى 99 مقاس 16 بوصة وعرض 6 بوصة و 4 مسمار
http://nileup.com/up/uploads/nilemotors_13621823761.jpg
كاوتش مقاس الفبريكة 16 45\195 تايلاندى ماركة accelera
http://nileup.com/up/uploads/nilemotors_13621824571.jpg
طبعا الاحساس بعد التركيب كان حاجة تانية خصوصا ان الكاوتش ال 13 بتاعى كانت حالته صعبه
لسه بطلع من عند بتاع الكاوتش ورايح ارجع الجنوط اللى كنت واخدها من صاحبى وبعديه بحوالى 10 كيلو لبست حفرة على سرعة بالعجلة الامامية شمال عملت كاللو فى فردة الكاوتش!!!!!!! ياجدعان ده انا ملحقتش اروح البيت بيهم, طبعا المفروض ان الفردة دى تتغير وربنا يسهل, مشكلة مقاس الكاوتش ده انه محتاج طريقة سواقة خاصة عشان ميعملش كده, يعنى من الاخر عينيك تبقى فى وسط راسك وتفادى المطبات قبل ماتفادى البنى ادميين, وعلى قد ما الموضوع ده مش عملى خصوصا فى شوارع مصر المحروسة لكن خلانى مجريش فى الحتت اللى مينفعش يتجرى فيها
تانى يوم ظبطت زوايا وبكده يبقى فاضل الشكمان وحساسه
طول الوقت ده كنت مستنى صاحبى اللى كنت هاخد منه الشكمان اللى فى عربيته بس فى الاخر اكتشفنا انه مش هينفع!!!! لأن ده شكمان موتور VR6 2800 سى سى 6 سليندر ولو ركب عندى العربية مش هتجرى لأن مش هيكون فيه كبس بسبب كبر حجم المواسير
وفى الأخر رسينا انى اركب شكمانى وانه مش هيفرق ومش هيكتم وممكن فيما بعد اجيب علبة اكبر او فلتر سبور
تانى يوم اشتريت حساس الشكمان عشان الراجل بتاع الشكمانات يركبهولى وهو بيظبط شكمانى, وبما ان الراجل ده راجل فاهم كويس فقالى ان علبة الشكمان بتاعتى تشيل لحد موتور 1800 مع انه كان ممكن يقولى انها لازم تتغير وقاللى ان علبة البيئة ملهاش لازمة وان هى اساسا فاضية من جوه وبترن وانه هيجيب ماصورة 2 بوصة تاخد من الشجرة لباقى ماصورة الشكمان (يعنى ننزل من واسع لأضيق عشان الكبس) والماصورة دى هركب فيها صامولة عشان يركب فيها الحساس
http://nileup.com/up/uploads/nilemotors_13621826181.jpg
بعد ما خلص اللحامات دورت العربية وأول مرة كنت اسمع صوت موتورى وطلعت جربت والنتيجة مرضية الحمد لله بس سامع صوت كركرة وغالبا ده من عدم توافق العلبة مع الموتور
الجمعة اللى فاتت قبل ما أعمل الشكمان العربية وقفت منى!!!! كنت واقف على طلع وبدوس بنزين عشان امشى لقيتها بتلت وبعدين بطلت, ادور مش عايزة تدور, ادور مش عايزة تدور, ادور مش عايزة تدور, فتحت الكابوت وبصيت على الكابلات كله تمام, اسمع صوت الطرمبة, مش سامع, الطرمبة فصلت, روحت لكهربائى وفكها عشان اجيبله واحدة زيها, بعد ما فكها وصلها على كهرباء خارجية راحت اشتغلت, طلع ان كان سلك الارضى بتاعها مهزوز, ومن بعدها مشيت عادى.
امبارح الجمعة سافرت القاهرة عشان مقابلة القسم, طوول السكة 140 160 وشوية 170 180 والحياة حلوة, كان فيه صوت عندى مش عارفله تفسير وسئلت عليه ايهاب منصور أثناء المقابلة, جيت ادور الموتور مش عايز يدور, طرمبة تانى!!!! شيلت الكنبة دب دب دب برده مفيش, يبقى لازم تتحل, بعد ما ايهاب حل الطرمبة فعلا لقينا كلبسات الكبلات اللى فى الطرمبة ملخلخة وايهاب خلعها وديقها بالبنز وركبها تانى وفعلا بطلت تتهز
وكان عندى مشكلة تانية فى الطرمبة وهى انى لما بفول المؤشر مش بيوصل للأخر وقد ساهم الاخ مصطفى شعلان فى تشخيص العطل وقال ان الشريحة لازم تتنضف عشان دراع العوامة مش بيطلع للأخر, عموما اكتشفنا بعد كده ان مش ده السبب بس برده نضفنا الشريحة ودخلنا الطرمبة غرفة العمليات برعاية الدكتور ايهاب وكل واحد من الاعضاء الحاضرين ساهم ب أداة من ادوات العملية, الجزء بتاع الشريحة اتفصص واتنضف بفرشة سنان وصنفرة
http://nileup.com/up/uploads/nilemotors_13621827841.jpg
http://nileup.com/up/uploads/nilemotors_13621829811.jpg
http://nileup.com/up/uploads/nilemotors_13621830281.jpg
http://nileup.com/up/uploads/nilemotors_13621830761.jpg
والحمد لله كل حاجة ركبت مكانها بسلام والعربية دارت بس لسه مشوفتش موضوع المؤشر لأنى لسه مفولتش بس عموما ايهاب متأكد انها هتظبط لأن السبب طلع فى طريقة تركيب الطرمبة نفسها وعدلتها
بالنسبة لأستهلاك البنزين فى الموتور الجديد: انا عملت اليوم ده 500 كيلو 90% طوالى معظمهم سرعات عالية و rpm مش اقل من 4500 والباقى داخل المدينة واللمبة لسه منورتش
نيجى بقى لتكاليف موضوع تفريغ النص زى ما وعدتكم انى هكتبه فى الجزء الأخير:
سعر النص: 5500
مصنعية: 1500
كاوتش وجنوط: 3000
طلبات(زيوت وكاوتش كوبلن و حساس شكمان........) 500
نثريات(مصاريف نقل و اكراميات) 500
المجموع= 11000 جنيه ولسه السمكرة والدوكو
طبعا سعر النص من الواضح انه معمول فيه واجب بس موضوع الجنوط والكاوتش اللى مكنتش عامل حسابهم خلونى غير مستفيد بالواجب (الحمد لله)
انطباعى وتقييمى للموضوع بالكامل:
أولا: السلبيات:
فلوس كتيرة اتصرفت كانت ممكن تركبنى ابيزا موديل 2000 كاملة
اجهاد بدنى رهيب لأنى كنت برجع من شغلى على الميكانيكى كل يوم لمدة 10 ايام مدة التسقيط
ضغط نفسى وذهنى جامد بسبب خوفك ان بعد كل ده متبقاش مبسوط من الشغل اللى هيتعمل فى عربيتك
ثانيا: الأيجابيات:
معاك عربية عارف كل مسمار فيها حالته ايه
تحويل كامل للعربية كأنها طالعة من المصنع بالمواصفات اللى انت مختارها
فى النهاية احب اوجه نصيحة لكل اللى بيقرأ موضوعى
خلى بالك, الموضوع مش سهل لأنك طوول ما انت بتعمل فيها هتتفاجئ بحاجات مكنتش عامل حسابها وطالما بدأت يبقى مش هينفع توقف غير لما تخلص ودايما اعمل حسابك على فلوس اكتر من اللى انت كنت حاسبها لأنك مش بعد كل المصاريف دى هتيجى تستخصر فى حاجة زيادة عن الحسبة طالما العربية طالباها
عايز موتور اقوى من اللى فى عربيتك يبقى تجيب موتور بفتيسه بكونتروله
عايز باور يبقى تجيب طقم الباور
عايز تكييف يبقى تبيع عربيتك وتجيب واحدة مكيفة فابريكة
عايز الحاجات دى كلها يبقى برده تبيع عربيتك وتنقى واحدة على كيفك
بس برده اكيد الواحد حس بمتعة حاجة معملهاش قبل كده والحمد لله النتيجة طلعت مرضية
تحت امركم فى اى استفسار
ربنا يستر طريقكم
السلام عليكم ورحمة الله وبركاته
:bye::bye::bye: