تقرير هام جدا عن ميكانيكي الاسكودا على الزفتاوي عند الوفاء والأمل

اليكم تجربتى مع السيد الدكتور العلامه على بك الزفتاوى ........... انا رحتله من مده طويله بناء على نصيحه الاخوه فى المنتدى و بعد النفخه الكدابه و الانزحه الغير مبرره بدء الشغل فى المحروقه ( العربيه ) و بصراحه الراجل صنايعى جدا و غير قاعده الكربراتير للموديل الاعلى بتاع الالفين و نضف الكربراتير و طلع عينى انزحه انه مش بيحب يشتغل فى عربيه اشتغل فيها حد قبل كده و ان الكربراتير متغيره فيه حاجات و بعد المحايله و الشكر فى عبقريه معاليه ( طبعا كنت ندمان انى رزعت المشوار ) خلص شغل و ظبط الموتور و بصراحه العربيه بقت ناعمه زى الحرير المهم مشيت من عنده و اديته المبلغ اللى طلبه ( 90 جنيه ) بالاضافه لعشرين جنيه للصنايعيه و روحت البيت ركنت العربيه و سافرت تانى يوم صباحا لراس سدر طبعا العربيه طول الطريق و لله الحمد طياره و الحراره مش محصله 80 و الدنيا حلوه جدا المهم وصلت راس سدر و ركنت و لما رجعت ادور العربيه مش عايزه تدور و لماتدور تبطل و بدأت المعاناه لازم رجلى على البنزين المهم فى طريق العوده مفيش مشكله لأنى دايس بنزين روحت للباشا تانى و قولتله انى كنت عنده من اسبوعين و العربيه وطيت تانى قاللى ماشى و حددنا ميعاد بعدها بشهر للتصليح و روحت فعلا و بدء الاصلاح و التظبيط و الانزحه للمره التانيه و غيرلى الزيت و دفعت كل اللى طلبه مع اكراميه للصنايعيه و نبهت عليه انه يعلى العربيه شويه لأنها بتوطى تانى بعد ماتسخن قاللى انه عارف شغله بمعنى اصح - مالكش دعوه - مشيت من عنده و انا فى الطريق العربيه بدأت تقطع تانى اتصلت بيه قاللى ايقى هاتها بكره و لسوء الحظ انا الكونتاك سوستته باظت من كتر اعاده التدوير و مابقاش يرجع و الصبح و انا بادور نسيت ارجعه بعد التدوير المارش اتحرق و الحمد لله ............و دى كانت قصتى معاه مع وعد بعدم العوده ليه مره تانيه اسف على الاطاله بس حبيت احذركم لأنه عمل معايا حركه تانيه سخيفه جدا لما سألته عن سعر الفتيس الاستيراد قاللى انه لسه جايب واحد من يومين و سعره 1250 جنيه زى الفل و اتفق معايا يجبلى واحد و زى مانتو عارفين انا تاجر قطع غيار و عارف ان سعر الفتيس الاستيراد 600 جنيه او 700 بالكتير على العموم انا قلت احذركم و الله الموفق .