تقرير 500 كيلو سوزوكى سيلاريو 2013
السلام عليكم
انا امبارح عملت حوالى 500 كيلو بالسيلاريو وحابب انقل تجربتى معاها
اول واحه العربية من غير ولاعة سجاير يعنى لو فى حد فاسد جنبى عايز يلوع سجاير الافضل يكون معاه ولاعه او مش يشرب فى العربية افضل :nemoflow:
الكراسى بتاعتها مريحه جدا جدا فى السفر ومش متعبه
الازار الامامى بتاعها مش فيه وحده رفع وفيه حاجه غلسه شوية ان لازم الى جنب السواق هو الى يرفع الازار لانى مش حعرف اتحكم فيه من عند السواق يعنى لو هوه مش عايز يرفعه مش حعرف انا ارفعه غير من عنده هو يعنى من الاخر انزله من العربية لو مش سمع الكلام :44:
الفتيس الحارات الخاصه بالنقل الفتيس صغيره و الفتيس فى المجمل ناعم وحلو
زرار الانتظار مكانه مش عاجبنى لانه موجود تحت الكاست ودى غريبه شوية
الكاست بتاع العربية جميل جدا جدا وبيشغل سىديهات وفى مكان للفلاشه جنب مكان الولاعه الفاضية وصوت المساعات كويس جدا جدا بتاعت العربية :vctry:
اولا العربية من جوه كويسه بس لو حد طويل شوية يزيد عن 175 سم قعد ورا حيحس انه مضايق شوية الافضل يكون قصير :049:لكن قدام مريحه جدا جدا اى ان كان طوله
العفشة ناشفه شوية من الاخر متوسطه وده الى عودتنا عليه السوزوكى لانى جرب الماروتى برده نفس النظام وانت ماشى بس مجربتش بالنسبه للناس الى قاعده ورا نظامهم ايه فى العفشه بس قالولى انهم مرتاحين ومش حاسين بحاجه مش عارف ده بيجاملونى ولا ايه بالظبط :argue1:
العربية ثابته على الطرق الطويله والباور بيفصل على 110 او 120 تقريبا وده شيئ انا شايفه كويس جدا
صوت الماتور كويس مش غالى بس لو الدنيا ساكته وقافل الشباك حتسمع صوته خفيف وانت لسه على الاول والتانى لكن بعد كده وانت بتجرى مش حتسمع صوته خالص العزل ممتاز
العربيه سحبها كويس جدا لكن بيقل حاجه بسيطه وانت مشغل التكيف على 3 لكن مش حتحس بالفرق اوى الا لو انت محمل رغم انى مش شغلته كتير لان الجو عندنا كويس فى اسكندرية :tumb:
التكيف بتاعها صراحه اجمل حاجه قوى جدا
الفرامل بتاعتها ممتازه وخصوصا انها abs وبتلم معاك بسرعه لدرجه انى كنت ماشى على 80 ولقيت مطب قدامى صغير فدوست فرامل فجاه ولمت معايا قبل ما اعدى المطب الحمد الله ان محدش كان ورايا كان زمانه على حجرى :khd:
فى المجمل العربية جميله جدا وشبابى و فى السحب والتجميع ماشاء الله والشكل الداخلى بتاعها تحس بالفخامه يمكن علشان نقلت من ماروتى لسيلاريو يمكن سعرها غالى شوية وده حال بلدنا لكن هى تستاهل بصراحه
اشوفكم على صيانه ال1000 ان شاء الله واقولكم اخر الاخبار :bye:
