ادعولى داخل الجيش قريب وهضطر اسيب شغلى

انا عندى 26 سنة

كنت واخد تاجيل عائل اسرة لانى اكبر اخواتى ووالدى متوفى لحين انتهاء استكمال اخواتى تعليمهم

بعدها قدمت ورقى فى ميعادى للتجنيد مع انى كتير نصحنى بعدم التقديم وانى بعد سن ال 30 ادفع غرامة وخلاص علشان علشان عندى عمل خاص ...
قدمت وكان املى فى الله كبير انى اخد اعفاء ولكن الدفعة كلها الى كانت مقدمة الجيش لبست دون استثناء ...

بدون ارجاء قالوا الكل داخل وانا مترشح ظابط احتياط ...

كده هضطر اسيب عملى الخاص وهى كانت شركة بينى وبين اتنين اصحابى والحمد الله كانت ناجحة

وعرضوا عليه :
1- اسيب الشركة بس فلوسى معاهم مقابل هامش ربح شهرى بسيط ووقت ما احب اخد فلوسى اخدها
2- افضل فى الشركة بس نتحاسب فى الاخر بعد فترة التجنيد وهما هيكون ليهم مرتب شهرى طبعا انا لاء لانى مش بشتغل معاهم ..
ومش عارف اعمل ايه

فى الشغل ؟ فى الجيش احاول انزل عسكرى افضل ولا العسكرى بتبقى بهدلة واهانة عن لما اكون ظابط ؟
تفسى ربنا يكرمنى واحاول اجى مكان قريب اشوف منه شغلى وفى نفس الوقت اقضى خدمتى ؟

تنصحونى بأيه على فكرة انا متزوج ومنتظر حبيبة قلبى بنتى ان شاء الله هتتولد وانا هكون فى اول 45 يوم ليه فى التجنيد..

ادعوووووووووولى ربنا يعديها معايا على خير وتنصحونى اعمل ايه فى الشغل

ربنا يقدملك اللي في الخير والصالح وبالنسبه للشركه خليك فيها والشركاء ياخدوا مرتب

راى تخليك فى الشركة

معلش قدر الله وماشاء فعل
ويمكن ده خير ليك
الافضل سيب فلوسك في الشركة عادي وهم يبقى ليهم مرتب نظير عملهم اواي بديل بحيث تقلل بقدر الامكان فارق الدخل
وان شاء الله الجيش خلص سنة وارجع شوف حياتك

ربنا يوفقك

قدر الله وماشاء فعل
وانت رايح كشف الهئه الأول اللي في حلمية الزيتون خد معاك قسمية الزواج عشان ينزلك عسكري وده قانون علي فكره عشان لما رحت انا كشف الهئيه قالولي الكلام ده بس كنت لسه خاطب مش كاتب كتابي

وحاول تشوف اي حد يظبطك بحيث تكون بحريه او اي حاجه من اللي بيروح اسبوع وياجز اسبوع او بيبقي في مبيت يعني بتروح الصبح وتروح اخر اليوم


بلاش ظابط عشان وجع قلب
خليك عسكري واهي سنه وهعتعدي

للاسف نظام متخلف ودي اول مرة تحصل من فترة ان الجيش يدخل الناس كلها من غير ارجاء

اعتقد ممكن تقدم تظلم بما انك متزوج وعندك طفلة

بالنسبة لموضوع عسكري او ظابط .. ال2 فيهم افادة ليك

يعني لو ظابط هتبقى مستريح اكتر والناس تحترمك وتعملك حساب .. الخ الخ + المرتب الكبير كل شهر وده تقريبا بعد 16 شهر بيبدأ .. بس في المقابل هتتأخر على شغلك 3 سنين

اما لو عسكري هتخلص بسرعة بس بردو مش بالاحترام المطلوب للاسف في جيشنا المصري

لو احتجت اي مساعدة انا هبعت لحضرتك اسم ظابط صاحبي في الهايكستب .. في التنظيم والادارة وممكن هو يقولك تعمل ايه بالظبط

وربنا معاك بجد

ربنا معاك و يقويك على الجيش و مبروك البنوته و تربيها فى خيرك ان شاء الله

رأى لو انت واثق فى اصحابك يبقى تكمل معاهم فى الشركه و هما يبقى ليهم مرتب شهرى و اكيد بعد ما تخلص جيش الشركه هتبقى اكبر مش هتفضل زى ما هيه يعنى و تبقى انت الكسبان فى الموضوع ده لان راس مالك كبر فى الشركه
و ربنا معاك و يوفقك فى الجيش

الف شكر لرد حضرتك ودعاءك ليه بظهر الغيب

اقتباس:

---

المشاركة الأصلية كتبت بواسطة أبو صلاح

معلش قدر الله وماشاء فعل
ويمكن ده خير ليك
الافضل سيب فلوسك في الشركة عادي وهم يبقى ليهم مرتب نظير عملهم اواي بديل بحيث تقلل بقدر الامكان فارق الدخل
وان شاء الله الجيش خلص سنة وارجع شوف حياتك

ربنا يوفقك

---

ربنا يسهل الى فيه الحال بس للاسف انا حاسس ان دخل الطمع ليهم وهيفضلوا انهم يطلعونى من الشركة وبدل ما الربح يتقسم على 3 هيتقسم على اتنين وده الى شيفه فى عنيهم لانهم عارضين عليه حلول كل حل اصعب من التانى

اقتباس:

---

المشاركة الأصلية كتبت بواسطة algazar2

ربنا معاك و يقويك على الجيش و مبروك البنوته و تربيها فى خيرك ان شاء الله

رأى لو انت واثق فى اصحابك يبقى تكمل معاهم فى الشركه و هما يبقى ليهم مرتب شهرى و اكيد بعد ما تخلص جيش الشركه هتبقى اكبر مش هتفضل زى ما هيه يعنى و تبقى انت الكسبان فى الموضوع ده لان راس مالك كبر فى الشركه
و ربنا معاك و يوفقك فى الجيش

---

الف شكر لرد حضرتك ونصيحتك ليه بس انا حاسس ان الطمع ابتدى يدخل ليهم وهيفضلوا انى اطلع من الشركة

اقتباس:

---

المشاركة الأصلية كتبت بواسطة eng f3lix

للاسف نظام متخلف ودي اول مرة تحصل من فترة ان الجيش يدخل الناس كلها من غير ارجاء

اعتقد ممكن تقدم تظلم بما انك متزوج وعندك طفلة

بالنسبة لموضوع عسكري او ظابط .. ال2 فيهم افادة ليك

يعني لو ظابط هتبقى مستريح اكتر والناس تحترمك وتعملك حساب .. الخ الخ + المرتب الكبير كل شهر وده تقريبا بعد 16 شهر بيبدأ .. بس في المقابل هتتأخر على شغلك 3 سنين

اما لو عسكري هتخلص بسرعة بس بردو مش بالاحترام المطلوب للاسف في جيشنا المصري

لو احتجت اي مساعدة انا هبعت لحضرتك اسم ظابط صاحبي في الهايكستب .. في التنظيم والادارة وممكن هو يقولك تعمل ايه بالظبط

وربنا معاك بجد

---

الف شكر ليك يباشا وانا بعت لحضرتك رسالة على الخاص ومنتظر الرد فى اقرب وقت

ربنا يقدرك ويعدي ايامك علي خير ..

قدر الله وما شاء فعل, وربنا يباركلك فى البنوته , وراى انك تصلى استخارة وتخليك فى الشركه للاسباب الاتيه:
1- يكون ليك عمل بعد الجيش.
2- لو اخد جزء من الارباح حتى لو مرتب حيكون كويس , على الاقل يغطى المصاريف, وانت ليك فى راس المال.
3- مشروع ناجح خسارة انك تسيبه.
وربنا ييسرك الحال.