هو احنا امتى هنبقى محترمين ؟؟؟؟؟

**rockana9112007** · 03-03-2013 09:44 PM

اولا السلام عليكم ورحمة الله لكل اخواتى فى المنتدى

ثانيا انا بعتذر عن العنوان بس بصراحة مش لاقى كلام اعبر بية عن مدى احباطى

الموضوع بكل اختصار انى كنت ماشى مروح فى امان الله ومعايا عربية الشغل وداخل على الملف اللى بيبقى قدام الجهاز فى 6 اكتوبر عشان امسك المحور .........مشغل التسجيل والدنيا لذيذة

الملف دة على الشمال والكل خارج من اليمين وبياخد الشمال عشان ياخد الملف

الاقى سواق تاكسى طاااااااااير طااااااير من الشمال وعدى من جنبى لدرجة انى مشفتوش وعمال ياخد غرز من بين العربيات اللى اصلا كلها ماشية بهدوء نسبى عشان هتدخل على الملف

المهم فى عربية كرايسلر m300 تقريبا عشان ماليش فى الكرايسلر قوى صاحبها بيكسر شمال عشان ياخد الملف والمعلم التكسجى جاااى فى نفس اللحظة من شمال صاحب الكرايسلر كااابس وطاير

بصراحة انا شفت المنظر اسبهليت .....مفيش حل غير ان التاكسى يلبس فى الكرايسلر عمووووودى

المهم ان سواق التاكسى عشان يخرج من المأزق دة اضطر انة يلف مع الكرايسلر وطبعا بسرعة عالية

فى ناس بتقف فى الملف دة عشان تركب مواصلات ...التكسجى كان هيشيلهم هيلاااا بيلاااا

والمعلم حك فى باب الكرايسلر

سواق التاكسى نازل عاوز يتخانق مع صاحب الكرايسلر وانة هو الغلطان انة مشفش سعادة الباشا وهو طاير من الشمال وان دة طريقة ونظام خدوهم بالصوت

اللى كانو راكبين التاكسى واحد وواحدة تقريبا من سوريا عمالين يقولو للسواق حرام عليك ولية السرعة دى كنت هتموتنا

انا بصراحة ربنا دمى فاااااااااار فاااار لانى كان ممكن اوى اتخبط مكان الراجل اللى اتخبط

نزلت من العربية وزعقت للسواق وقلتلة انة هو الغلطان وانا شاهد على كدة وحرام علية لانة كان ممكن يموت حد

صاحب الكرايسلر شاب باين علية انة ابن ناس قوى قوى قوى قوى ومؤدب مؤدب مؤدب ...الواد مش عارف يزعق للتكسجى ويسب للى خلفوة
الواد مصدوم ومش عارف يقول اية ولا يتصرف ازاى ...بصراحة اهلة مربينة زيادة عن اللزوم ودة اللى زعلنى .........المحترم لايمكن يأخد حقة فى البلد دى

لازم ابقى ابن .......... بلطجى عشان اعرف اخد حقى

التاكسجى بقى بيقول اية ....انتا اللى غلطان (لصاحب الكرايسلر ) وعاوز تكلم البوليس كلمة انا مبيهمنيش واللى انتا عاوزة اعملة

(طبعا المعلم عارف ان بتوع الشرطة ايدك منهم والارض واخرتها هترسى بعد المحضر والنيابة على خمسين جنية لاغير غرامة وكل واحد يشيل شلتة دة لو جم اصلاااااا

انا طبعااااا كنت هطق من الغيظ ........لامتى الشرطة هتفضل منفضة ومبتشتغلش ولحد امتى هنفضل بنتعامل بقوانين متخلفة جداااا جداااا مبتجبش حق حد حتى لو ماااات

وبالمناسبة عندنا سواق فى الشركة موت اتنين على الدائرى وقلب عربيتهم من فوق الدائرى تعرفو اتحكم علية بأية

شهر حبس ..........................................مع وقف التنفيذ
وانا طبعاااا متأكد زى الكل فى الشركة انة حمار سواقة وبيجرى بغشامة

طيب وبعدين هنفضل نموووت فى بعض كدة وخلاص محدش بيتحاسب
مصر من الاولى فى العااااااااااااالم فى حوادث السيارات ووفيات حوادث السيارات

اية الحل ......................مش عارف
بس لو الشرطة مشتغلتش يبقى نوفر مرتباتهم وعربياتهم اللى بتوصل الولاد المدارس والمدام السوق
نوفر الميزانية الللى بتيجى من لحم الشعب دة

ونعمل ميليشيااااات زى ليبيا ........لية لأ ....

كل البلطجة فى السواقة والجرى والعكس وشيل النمر عشان الكل متأكد انة مفيش حساب

لازم يكون فى حسااااااااب لازم عشان البلد دى حالها يتصلح

**matrix_it** · 03-03-2013 10:08 PM

احيييك على موقفك الرجولى ! ان شاء الله هتلاقى اللى يقف جنبك فى محنتك

**koheya** · 03-03-2013 10:20 PM

مش عارف اقول لحضرتك اية بس رايى الشخصى اننا لازم كل واحد ياخد قرار وينفذة انه يربى اولادة على الادب ومراقبة الله والضمير واحترام الاخرين علشان بعد 10سنين ان شاء الله ودى فترة مش كبيرة لما بنتى او ابنك يسوق او يتعامل مع الناس يكون متربى وعندة ضمير وبيخاف ربنا ونركز فى دة جدا وميخدناش البحث عن لقمة العيش عن اننا نربيييييهم .
دة لان اجابة سؤال حضرتك امتى حنكوم محترمين فدة صدقنى بعد ما اولادنا المحترمين يكبروا باذن الله ويكونوا نموذج فى الاحترام ودة الى بحاول اعملة مع بناتى وربنا يعيننى يا رب.اما فى الوقت الحالى فكل سنة وانت طيب المتربى ياخد باله من نفسة ولا يحتك نهائيا بقدر الامكان باى حد مش متربى لانة الخسران.
"ان الله لا يغير ما بقوم حتى يغيروا ما بانفسهم"
عزيزى الفاضل مصر استعمرها الكثير من مستعمرى العالم من ايام الفراعنه حتى الاحتلال الانجليزى بس كان اسوء احتلال استطاع ان يفسد مصر هوة الاحتلال المصرى لمصر العزيزة.

**Hyper3G** · 03-03-2013 10:20 PM

المشاركة الأصلية كتبت بواسطة matrix_it

احيييك على موقفك الرجولى ! ان شاء الله هتلاقى اللى يقف جنبك فى محنتك

اتفق معاك

**kimokaim** · 03-03-2013 11:58 PM

مافيش ادب ولا احترام في البلد دي اليومين دول ومن ساعة الثورة المنيلة بستيف الف نيلة

هل تصدق ان واحد راكب عربية لانسر وطالع في امان الله وهووووووووووب داخل فيه توكتوك من غير نور بالليل

وطبعا سواق التوكتوك اتصل وجات النجدة واتلمت بلطجية التكاتك وهجموا على صاحب اللانسر وخذوا مفاتيح عربيته وكان حيضرب !!

لولا انه دفع لهم فلوس وراضاهم وهما الغلطانين !!!!

الحادثة دي حصلت قدامي وفيييييييييييييين ؟؟ في المعادي !!! اصل التكاتك خلاص بقت تسرح في الكورنيش براحتها

________________

الحادثة الثانية :

دكتور وراجل كبير في السن شعره ابيض من كثر الشيب !! وقليل ادب ومش محترم خالـــــــص !

كان في أصدقاء لي من اسكندرية جايين عندهم ماستر في اكادمية جامعة الدول العربية

المهم خذت لهم شقة في المعادي ....... حصل لهم مشكلة وهما نايميين الوصلة بتاعت سخان الكهرباء ضربت

وفضلت المية نازلة لحد ما غرقت الشقة وربنا ستر لحقوها قي اخر لحظة

المهم طلعت المية على السلم ونزلت وحاولوا يمسحوها وخذوها من الثامن لحد الارضي لوحدهم

طبعا اتصلوا بيا وكان يوم جمعة وجبتلهم سباك بالعافية المهم زبط الدنيا

بعديها الاقي الراجل ده طالع بيتهجم عليهم وبيشتم !!! طبعا عارف انهم شباب ولاد ناس متغرين من اسكندرية

فعايز يعمل عليهم مرجلة !! فبدل انه يطلع يقول الحمد لله على السلامة محتاجين حاجة ؟؟

طلع يقل ادبه وكل الجيران تقريبا زي حالته !!

لما قالي صاحب المكتب بتاع العقارات أنه دكتور ومأمور اتحاد الملاك !! الصراحة جالي مغص

هو البلد دييييه خلاص عليه العوض ومنه العوض في اخلاقها ولا ايييييييييييييييه

المهم أتصل بيه صاحب المكتب وبهدله فراح الدكتور بيقوله خلاص اطلع استسمحهم لو عايز !!!!!

ليه يادكتور هو انت مابتجيش الا بالعين الحمرا والزعيق ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟

فعلا البلد حصلها حاجة بعد الثورة المباركة اللي هلت علينا ...............

**Y a r i s** · 04-03-2013 06:12 AM

لا هو الاحترام خلاص بحححححح

والجديد دلوقتي وبالذات في اكتوبر ومع وسع الشوارع انك تلاقي عربية جمبك يعمل غرزة ويخشلك في الرفرف. بتاعك وكانك مش موجود اساساً .... انا بصراحة بقيت اوقف مزبهل وبسئل نفسي سؤال هيا الناس دي اتعلمت السواقه دي فييييين بالزبط ومين العبقري الي علمهم السواقه بالشكل ده

**rockana9112007** · 07-03-2013 09:12 AM

شكراااا للجميع مشاركاتكم

بس اللى ضحكت علية بعد كدة

ان الواد التكسجى لما الولد والبنت اللى راكبين معاة غلطوة ......بيقولى اصلة كان عاوز يبوسها فى التاكس وانا زعقت معاهم عشان كدة بيغلطونى هنا

قلتلة طب وانا يسطى برضة بقول انتا اللى غلطان ...........يقولى انتا شكلك راجل طيب .......قصدة راجل ابن ..........

**rockana9112007** · 07-03-2013 09:16 AM

بس برضة انا مع الرأى القائل

اننا لازم نعمل عقاب للمخطئ فى الشارع ويكون عقاب فورى عشان الناس تتردع مش هستنى موظف الشرطة المتكاسل وموظف النيابة المهمل وفى الاخر يضيع الحق من صحابة

لان هما تحولو لموظفين متكاسلين واللى يهمهم فقط مرتب اخر الشهر من الحكومة ويكش البلد تولع باللى فيها

**khaled_sabry** · 07-03-2013 11:03 AM

المشاركة الأصلية كتبت بواسطة fepsceasar

انا ليا جار كبير فى السن وقليل الادب وابنه حمار سواقة خبطنى وهو راجع والواد فضل ساكت وابوه عمال يجعر ويلم الناس بطريقة خدوهم بالصوت وقال يعنى انا اللى خبطته
ربنا ينتقم منه يا رب
المشكلة فى التربية الزيادة ..بتبقى مكسوف ترد ومذهول من الموقف وتقول ده راجل كبير ..لكنه فعلا انسان مهزا وانا بلوم نفسي انى احترمته واحترمت نفسي..
متهيالى كان المفروض شرشحة بشرشحة ..انا متهيالى كان مستنى اشتمه ويجيب الحق عليا وخلاص..لكنى حتى ما شتمتوش

دى مشكله فعلا موضوع التربيه ده
انا الحادثه الوحيده اللى حصلتلى فى حياتى كانت من ميكروباص رمسيس- سايقاه واحده ست كمان (كان بيودى اطفال المدارس)
هى خبطتنى فى التقاطع فى بوز العربيه - ماعلينا لكن اللى زاد الطينه بله انها كانت عاوز تهرب فزودت بنزين ففضلت تزق فى عربيتي 10 متر علشان تطلع منى لغاية لما لبستهعربيتي فى عربيه تانيه كانت راكنه و الميكروباص بتاعها اتحشر فى العربيتين بتاعتى و العربيه التانيه اللى راكنه ) و كنت حفعص البواب اللى كان بيمسح العربيه الراكنه
طبعا انا كنت مزبهل و مش عارف انطق اصلا و هى نزلت تشرشحلى !!!! و انا مش عارف افتح باب العربيه اصلا لأن الرفرف الشمال و باب السواق اتفعصو جامد - ده غير الرفر اليمين اللى اتدمر من الخبطه الاصليه
و لما فقت من ازبهلالى مابقتشى عارف اكلمها علشان هى ست

-

الموضوع: هو احنا امتى هنبقى محترمين ؟؟؟؟؟

LinkBack

أدوات الموضوع

عرض

هو احنا امتى هنبقى محترمين ؟؟؟؟؟ - انشر الموضوع فى :

-

-

-

المواضيع المتشابهه

صحاب جين 2 محترمين

اخر دفعة كارينز دخلت الوكيل كانت امتى والدفعة الجديدة امتى الرجاء الافادة

اخر دفعة كارينز دخلت الوكيل كانت امتى والدفعة الجديدة امتى الرجاء الافادة

حد يعرف امتى هيوانداى اى 20i تيجى مصر امتى؟

الكلمات الدلالية لهذا الموضوع

المفضلات

المفضلات

ضوابط المشاركة