تحذير هام لاعضاء المنتدى المحترمين
السلام عليكم اولا العربية نوبيرا 2 سنة 1999 1500 سى سى وكنت قريت فى المنتدى هنا معلومة عن ملح الليمون وانه بينضف دورة التبريد المهم كنت هعمل صيانة فى العربيةوهغير كوعة الترموستات وقلت احط شوية ملح ليمون فى القربة علشان انضف الدورة المهم حطيط تقريبا ما يعادل كباية شاى صغيرة ومشيت يوم وتانى يوم كنت رايح للميكانيكى اركب الترموستات واظبط شوية حاجات كدة وانا ماشى العربية سخنت جه فى بالى ان اترموستات قفشت تانى لقيت العربية مفيهاش مية وزودت ميه لقيت العربية بتخر مية من ورا الماتور اسفل المانافول المهم روحت للميكانيكى لقينا الزور الى خارج من البلوك الى هوة امام طرمبة المية مليان صدا ومهرى تقريبا الملح الى حطيتة اكل الصدا وهرى الزور الميكانيكى قالى دى حاجة عمرها ما بتحصل ولازم نشيل المكنة وتروح لخراط ويشحط ماسورة تانية ونركب المكنة تانى وطبعا المصنعية بتاعت الميكانيكى 250 جنية والخراط الله اعلم وربنا يستر
فنصيحة للكل محدش يحط اى حاجة فى الردياتير خصوصا لما العربية تبقى موديل قديم عشان ميحصلوش الى حصلى وكمان لو هى واخدة على مية الحنفية خليها حنفية عشان تمشى معاك والله اعلم
ولو حد عندة اى معلومة عن الموضوع دة يعنى ينفع اى خراط يعمل زور من غير ما افك المكنة ياريت
ومصنعية الميكانيكى لفك وتركيب المكنة كويس كدة ولا كتير وربنا يسترها على الجميع