زيارة لمركز ارتوك اوتو القطامية
السلام عليكم ورحمة الله وبركاته
امبارح كنت حاجز عن مركز ارتوك اوتو القطامية علشان اكشف على العربية فى الحاجات دى:
1-صوت الموتور عالى
2- شاكك فى صوت فى الدركسيون مع اللف
3-موضوع الهوا السخن من قتخات التكييف
4-كشف على العفشه
5-موضوع الطقطقة مع فتح الزجاج ( كان معاكم فى موضوع سابق)
6-موضوع فتح الزجاج لوحده ( كان معاكم فى موضوع سابق)
7-تشغيل الكونر لايت
نبدأ بسم الله تقييم الرحله:
أ- المشوار : مشوارهم لحد ما مش متعب،، بالنسبة لى اسهل من غمرة بكتيير
ب-المكان : كمكان مميز جدا ،، شيك وتحب تقعد فيه ،، بس البشر هناك قليلين جدا كعدد ،، عدد مهندسى الاستقبال قليل ،، اماكن الشغل كتيير جدا ،، حوالى 32 كوريك ،، بس للاسف العمالة قليلة جدا ،، اللى شغالين حوالى 4 بس ،، وللاسف هو كمبيوتر واحد بس هو اللى بيعدى على العربيات كلها ،، فده طول الوقت جدا ،، رحت هناك على 11:30 وخلصت الساعه 5:30 تقريباً
ج- نيجى بقى للعك اللى حصل:
اول ما قابلت المهندس وبيسالنى فى ايه ،، قولتله على اللى فوق ،، قاللى انه هيكشف على موضوع صوت الموتور العالى والدركسيون و التكييف و العفشة .
بالنسبة لموضوع طقطقة الزجاج ،، قالى ده شوية تراب وهنضفهم باسبراى ،، قولتله اوعى الاسبراى يعمل بقع فى الزجاج ،، قالى لا ده زى مزيل الصدأ مش هيعمل حاجه ،، قولتله ماشى.
موضوع فتح الزجاج لوحده ،، قالي بيحصل دلوقتى؟؟ قلتله لا هو حصل مرة واحده ،، قالى ماهو انا لازم اشوفها ،، قلتله هى حصلت يعنى بكون بهيس عليك؟؟؟قالى لا ،، قعد بقى يفتح ويقفل فى الشباببك طبعا محصلتك ،، قاللى ههحطها على الكمبيوتر واشوف
جينا بقى لموضوع الكورنر لايتس ،، حسسنى انى بكلمه عن اوبشن فى الستالايت مثلا
قعد بقي يشاورلى على اللمبة بتاعت الشبورة التانية وممكن يخيهالى شغالة علطول ليل نهار !!!
قولتله اللى حضرتك بتتكلم عليه ده اسمه Day light اللى انا عايزه ده اسمه corner lights ، قعدت اشرحله فيها وهو يقنعنى ان مفيش حاجه اسمها كده ،، قولتله ده انا شايفها على اليوتيوب ،، قالى مفيش حاجه كده!!!
المهم كبرت دماغى ،، قاللى عايز اشغلك الشبورة ليل نهار ( حتى ما يعرفش اسم الاوبشن بتاع العربية اللى المفروض شغله فيها) قلتله لا خلاص ،،كنت اتخنقت منه
طلعلت فى الاستراحه اللى فوق،، وكنت شايفه العربية طبعا مركونه ليها فترة على ما حد بدأ يبص فيها.
وانا موجود هناك بدردش مع واحد ، اتكلمنا فى موضوع الكورنر لايت قاللى ده انا شغلته بس فى المركز بتاع غمرة ،، طبعا انا اتنرفزت ،، يعنى المفروض انهم بيعرفوا يشغلوه اهو !! ،، رحت مكلك المهندس تانى ،، قعد بقى يكلمنى تانى على ال day light ومفيش حاجه من اللى بقوله عليها ،، قولتله يا عم ان كان فى واحد جنبى هنا بيقول انه عمله عندكم فى غمرة؟؟!! قلتله اهو معاك كلمه ،، فضل الراجل يمين شمال يفهمه ووصفله عربيته علشان يبص عليها ،، راحو كلهم عند عربية الراجل ده يبصوا عليه ،، قاللى حاضر هنعمله.
المهم فضلوا بقى يشتغلوا فيها وركنوها تانى على بال ما الكمبيوتر فضى علشان يظبطوها ،، قعدوا تقريبا ساعه العربية على الكمبيوتر او اكتر ،، وكل ما يعمل حاجه الداى لايت هو اللي يشتغل ومش عارفيين يشغلوا الكورنر لايتس ،،يمين شمال فييين و فييين لما شغلوها ،، شغلوها مع النور الواطى (الزينون).
طبعا قمة الملل والموبايل خلص شحن ،، ووقت طويل جدا قرب ال 6 ساعات على ما خلصوها ،، قالولى هنغسلها ،، ومش هدفع حاجه علشان طبعا الضمان
نيجى بقى للنتيجة النهائية:
1-رغم انا اكدت على الاسبراى ما يبقعش،، الاسبراى فيه زيت،، والقزاز منظرة زباله ،، مهما يتمسح ويتفتح ويتقفل برضه بيبوظ تانى!!!! الباشا قاللى شوية وهتروح لوحدها
2-العربية فيها شحم من جوة فى الصالون ،، رغم انهم غسلوها بس غسيل اى كلام
3-الكورنر لايت شغال ،، بس مع النور الواطى ،،، وبرضه شغلى الداى لايتس !!!
4-بالنسبة لموضوع الهوا السخن ،، انا عارف من الاول انهم مش هيحلوا حاجه ،، بس الباشا قاللى ان عمل للعربية re-setting علشان بوابات التكييف مكنش مظبوطة !!! طبعا اي كلام فى البتنجان،، قولتله انا بكلمك على الهوا الخن اللى جى من بره ايه علاقته بالكمبيوتر وبوابات التكييف؟؟!!
قالى مانت ممكن تقفل الفتحات،، قولتله طيب اللى تحت اعمل فيها ايه؟؟ قاللى ملهاش حل ،، قلتله قول كده من الاول وبلاش تقوللى كمبيوتر و re-setting والكلام ده علشان انت مش بتكلم واحد جاهل!!
5-بالنسبة لصوت الموتور قاللى كويس والكمبيوتر مطلعش حاجه
6-العفشة ربطوها وشحموها وظبطوا ضغط الاطارات
7-الدركسيون تمام ومفيهوش حاجه.
الخلاصه بعد ده كله اللى طلعت بيه ان العفشة بقيت احسن والكورنر لايتس اشتغلت.
معلش ان كنت طولت عليكم بس حبيت انقل كل حاجه بالتفصيل الممل علشان ماكونش ظلمتهم وعلشان اسيب الحكم ليكم من خلال اللى حصل ،، بس انا عن نفسى مضايق حدا لان مكونتش متخيل ان توكيل العربية دى بالضعف ده والمهندس بالجهل ده لانه مش دارى بالحاجه اللى بيشتغل فيها ومكلفش نفسة يسال حد تانى + مستوى النظافه مش حلو والوقت كتير جدا على الحاجات اللى كنت طالبها
بس اللى فرحنى انى لاقيت الناس كتير بيشكروا فى العربية دى والناس ماشية معاها من ال A4 لغاية الفانتازيا ،، وكل ما يشتروا حاجه برة الاسكودا يرجعولها تانى
والسلام ختام
