| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 11 1 2 3 4 5 6 ... الأخيرةالأخيرة
النتائج 1 إلى 10 من 103

  1. #1

    الصورة الرمزية hossam_elwani

    رقم العضوية : 13051

    تاريخ التسجيل : 16Jun2008

    المشاركات : 10,009

    النوع : ذكر

    الاقامة : اسكندريه

    السيارة: كروز هاى لاين 2013 بفضل الله

    السيارة[2]: هوندا ثم مرسيدس ثم بيجو 504 ثم نوبيرا 2 ثم نيسان صنى

    دراجة بخارية: no

    الحالة : hossam_elwani غير متواجد حالياً

    افتراضي بالصـــــور والتفاصيل تقريـــــرى الحصـــــرى لشيفرولية كروز فيس ليفت 2013 - Facebook Twitter whatsapp انشر الموضوع فى :

    hasad">

    السلام عليكم ورحمة الله وبركاته

    [gdwl] تقريرى المفصل المصور عن الكـــــروز هــــاى لايــن فيس ليفت بعد امتلاكها وتجربتى لها[/gdwl]




    مقدمه:


    فى البدايه انا اسف على التأخير فى اعداد التقرير لكثرة المشاغل وكنت على وعد معاكم لاعداد هذا التقرير من يوم ما استلمت العربيه








    http://www.nilemotors.net/Nile/331239-2013.html




    ولانى اعلم ان هناك من ينتظره كونى اول مالك للكروز الفيسليفت هنا فى المنتدى
    وبعد نزولها فى السوق المصرى والتزاما بوعدى فى اعداد تقرير مشرف لمنتدانا الكريم
    الى افضاله كتير عليا اليكم تقريرى المفصل من الاف الى الياء



    بس التقرير حيبقى طويل وآسف للاطاله مقدما



    هات كوباية شاى او شوية فشار وتابعنى







    بعد رحله طويله من البحث عن سياره مستعمله زى الالنترا الشكل القديم اوالميجان 2006 اولانسر شارك
    وطلعت من خلال بحثى بالدرس المستفاد وهو ان كل العربيات فى السوق المصرى معروضه تحت ستار الغش والكدب
    الا من رحم ربى ومفيش حد يقدر يجيب عربيه مستعمله الا لو كانت تحت عينه وعارف تاريخها كويس مع صاحب او جار او معرفه مقربه
    غير كده لا انصح بالمستعمل ابدااا ...
    ولذلك قررت ادخل على الجديد عشان اريح بالى وخصوصا انى مش من هواة التغير قبل 10 سنين على الاقل
    وفى رحلة بحثى عن سياره جديده متوافقه مع تطلعاتى وما احتاجه منها وفيها
    وبعد حيره مابين الالنترا 2013 واسترا كوزمو الجديده والتيسان صنى الجديده فئة السوبر صالون


    اليكم الاتى








    * الالنترا 2013

    سعرها بقى مبالغ فيه ومافيهاش وسائل امان من وسائد هوائيه او فرامل مانعه للانغلاق
    وخصوصا المفتاح المشفر (فاضيه من الاخر)
    وبنفس سعر الكروز هاى لاين (150000 جنيه وقت الشراء ) وبعد السرقات المتعدده لها بعدت عنها






    * الاسترا كوزمو الجديده

    لاغبار عليها بس لانها كانت بــ 167000 كانت قيمه مقابل سعر بالنسبالى
    وللاسف مكنش فيها وقتها تسليم فورى الا بأوفر بريس 10000 فطبعا استحرمت الزياده دى
    وخصوصا انى حجيب العربيه قسط فقلت اصبر لحد ماتيجى الدفعه الى حتوصل فى اخر 1
    وكانت المفاجئه وهيا زيادة سعر الدولار والعربيه زاد سعرها الى 187000 وطلعت بره امكانياتى خالص







    *النيسان الصنى الجديده

    ورغم انى كنت حاجز السوبر صالون فعلا الى انى ماعرفتش اتقبل شكلها ابدا
    على الرغم اعتماديتها كمكون يابانى ومن شركه عريقه زى نيسان
    ولان معيار الشكل كان مهم جدا بالنسبه لى صرفت نظر عنها
    + انه من خلال رؤيتى ليها فى الشارع لاحظت ان صاجها خفيف جدا وبيتأثر من اقل ضغط عليه
    وبالتالى شكل العربيه بيتبهدل فى وقت وزمن بسيط وده على النقيض من كل موديلات نيسان السابقه
    ولذلك بعدت عنها بعد المشوره والاستخاره
    ( على فكره انا بقالى عشر سنوات معايا نيسان صنى موديل 83 اوتوماتيك وقبليها نوبيرا 2001 من الزير
    و وقبليها مرسيديس 280 6 سلندر المشهوره بالتمساحه الله يمسيها بالخير
    كانت عربيه بجد ودى كانت بتاعت الوالد الله يرحمه فى السعوديه وكان بينزل بيها هنا فى مصر 6 شهور )

    وفى يوم واثناء ذهابى الى ستى سنتر اسكندريه بتاريخ 2013/12/25 لاحظت وجود الكروز الجديده
    عند البلال موتورز موزع منصور شيفروليه فركنت على جنب ونزلت اشوفها ايه الجديد فيها
    وسعرها كام لقيتها نازله بسعر 133000 اول فئه و 143000 لفئه الهاى لاين
    وكان فيه فعلا واحد اشترى بالسعر ده يوميها فئة الهاى لاين وكان تقريرى عنها فى الرابط اللاحق


    http://www.nilemotors.net/Nile/326836-2013.html



    وقد كان عزمت النيه على الشراء لانى عارف مميزات الكروز وعيوبها ..
    وخصوصا عيوبها فى الموديلات القديمه من انخفاض العربيه بشكل كبير ومبالغ فيه
    وقلة التسارع فى الطلعه وضعف الموتور على العربيه والى اختفت بشكل كبير مع تعديلات 2013
    واصبحت صفقه رابحه وخصوصا ان الموتور والفتيس هو هو الخاص بالاسترا الجديده
    يعنى ريحة الالمانى فيها والعربيه متينه وتعيش 10 سنين بدون اهلاك شكلا ومضموناً

    ولانى كنت بشترى تقسيط وكنت عايز اريح دماغى من التأمين
    فقررت الشراء من خلال كونتاكت كار قدمت طلب شراء من خلال فرعهم فى الداون تاون
    مرفق بيه 150 جنيه استعلام وانتظرت 4 ايام عشان اعرف هل تم رفضى او قبولى
    وطبعا القصه دى كانت فى فترة اجازة راس السنه يعنى من 12/27 الى يوم 1/1
    وكان الخبر الصاعقه عليا الا وهو انه تم رفض طلبى على الرغم من انى قدمت كل المستندات المطلوبه منى
    من كشف حساب بنكى وخلافه ورغم انى كنت حدفع 50% من تمن العربيه
    والى كل البنوك بتوافق على تمويلك لو تحقق الشرط ده فيك
    ولكن قد كان ما كان والسبب لما سألت ليه مدير فرع الدون تاون
    فكانت الاجابه ان عشان الشركه مابتمولش اى حد حاليا الا ذوى المرتبات العاليه والمضمونه ...
    يعنى من الاخر اتنصب عليا منهم واخدو 150 جنيه بالفهلوه وراحو على الارض وضاع الوقت منى على الفاضى ..

    المهم بعد الاحباط د وبعد يومين من الرفض غيرت الاتجاه على بنك عوده
    بعد البحث عن اسرع وافضل بنك فى تمويل السياره ورحت على الكمونى موزع منصورالمعتمد فى اسكندريه
    عشان اخد منه عرض سعر عشان اقدمه للبنك وده طبعا بعد ما اخدت موافقه منهم على التمويل فى اقل من 48 ساعه
    وفوجئت بأنهم موقفين بيع تماما عشان السعر حيزيد من 143000 الى 150000 طبعا انا جالى حاله من الاحباط لانه حلم وبعد عنى

    لكن اخدت قرار الشراء رغم الزياده و الى هون عليا ان العربيات كلها بلا استثناء غليت
    + ان الزياده لتانى مره متوقعه وبالتالى السعر ده يعتبر جيد مقابل اى عربيه فى السوق من نفس الفئه
    بعد الزياده وممكن الحلم يقضى حليه تماما لو استمر الجنيه فى انخفاضه امام الدولار الى ماشاء الله
    وده الى بيحصل الى الان ) وفعلا حصل ما كنت اتوقعه والعربيه زادت ووصلت لسعر 156000 حاليا الى وقت كتابة هذه السطور

    المهم اخدت عرض سعر من الكمونى على سعر 149000 بخصم 1000 جنيه عن منصور شيفروليه
    ولان الكمونى مكنش عنده كل الالوان فقلت اخطف نفسى لحد منصور شيفروليه نفسه فى الكيلو 21
    واشوف عنده كل الالوان على الواقع والى انا حطتها فى دماغى الا وهى الفضى والنبيتى والاسود والبلو واللون ده جديد
    وحصل ورحت على هناك ودخلت على موظف المبيعات واخدت منه ورقه عشان اروح بيها المخازن
    وهيا فى وش الفرع على الجانب الاخر من الصحراوى ووقف على بوابة المخازن الاولى
    وعطيتهم الورقه وشوفت لون لون على الطبيعه عشان اقارن
    واخذ القرار واليكم بعض الصور من المخازن وآسف على سوء الصور لان كان معايا موبايل متواضع جدا







































    وعشان اكمل الالوان الى قدرت اصورها اللون ده من معرض البلال موتورز
    وكان داخل دماغى جداااااااااا وحطه رقم واحد لكن بلدنا الحبيبه وجوها يخليك تندم بجد
    على اى لون غامق فعشان كده اخترت اللون الفضى




















    وده اللون الفضى الى انا جبته


































    وباقى الصور التاليه اخدتها فى يوم تالى ومن صالة المعرض الرئيسيه













































    ايه رأيكم؟؟







    المهم جالى الهام انى اخذ من منصور شيفروليه عرض سعر آخر موجه لبنك عوده احتياطى
    مش حيزعل وانا مش غرمان حاجه وفعلا اخدت عرض سعر بــ 150000 الف زياده الف
    عن الكمونى وعلى اخر لحظه قبل ما الفرع يقفل الساعه اربع ونص بعد العصر

    وجهزت نفسى تانى يوم عشان اروح اخلص الورق فى البنك واستلم العربيه فى نفس اليوم من الكمونى
    وصحيت الصبح بدرى الساعه 9 وتوكلت على الله وانا فى الطريق كلمت الكمونى عشان يجهز العربيه مسافت ما اخلص الورق فى البنك

    قالى : اوك بس عايز اقولك حاجه

    قلت: له خير

    قالى : بالنسبه للفاتوره بتاعت العربيه حدهالك بسعر 143000 بس

    قلت : ازاى المفروض الجنيه الى حدفعه اخد بيه فاتوره

    قالى : والله ده نظام الشركه عندنا

    قلت : انا اسف لو مش حتقدر تدينى فاتوره بكامل تمن العربيه يبقى مش حشترى من عندك
    هو انا اضمن منين مش ممكن يكون فيه مطب فى القصه دى فى المستقبل
    ومطلعش منه وبعدين هو انا بلعب معاك مقلتش ليه كده من الاول عشان اوافق ولا ارفض

    قالى : هو ده العادى وكله شغال كده

    طبعا انا قفلت السكه معاه وانا فى قمة العصبيه الفهلوه والنصب المصرى وراك وراك مطرح ماتروح فى مستعمل ولا جديد

    واضريت بدل ما اخلص الاجراءات واستلم العربيه فى نفس اليوم انى اغير الورق فى البنك
    وعرض السعر من منصور بدلا من الكمونى وكنا يوميها يوم الثلاثاء

    طبعا ده اخد 24 ساعه كاجراء ادارى وتقنى فى البنك وخلص يوم الاربعاء
    وكان ميعادى اخلص مع منصور يوم الخميس

    المهم يوم الاربعاء باليل
    عرفت كإشعاعه غير مؤكده ان العربيه حتزيد تانى لــ 157000 بدلا من 150000
    يعنى زاد 7000 جنيه لتانى مره واتأكدت بنفسى من الموزعين لانهم كانو موقفين بيع كالعاده عشان الزياده المرتقبه

    انا كالعاده جاتلى حالة احباط لانكم عارفين ان سعر العربيه بيحدد فى لحظة الاستلام يعنى لاقيمة لعرض السعر الى انا اخدته

    واتصلت بمندوب المبيعات فى منصور شيفروليه كان تليفونه مقفول

    سألت ربنا ودعيت لو فيها خير يكملها على خير ولو فيها شر يبعدنى عنها .. وكان املى فى ان منصور يخلص معايا على السعر القديم 150000

    عزمت النيه وروحت يوم الخميس الساعه 8 قدام البنك فرع جليم فى اسكندريه واتصلت بمندوب المبيعات كان فتح تليفونه

    وقلت له : هو العربيه فعلا زادت

    قال : مين الى قال ليك كده يا فندم

    قلت له : سمعت امبارح بليل انها زادت ومن الموزعين الكلام ده

    قال : انا داخل على المكتب ومتقلقش انت على قديمه ومفيش مشاكل

    قلت له : خير ان شاء الله ومتشكر جدا

    وقفلت التلفون وانا فى قلبى ريبه ومش متطمن لانى اتعودت فى الحياه ان مفيش حاجه مضمونه ابدا
    المهم خلصت فى البنك الورق و الشيكات وتعهد الدفع من البنك لمنصور
    وبعد ما خلصت كل حاجه ولقيت معتز بيتصل بيا طبعا انا كنت كده وكانت الساعه فى وقتها 9.20 صباحا

    وقلتفى نفسى اه انا خايف من الى جاى فى المكالمه دى

    رديت عليه

    وقالى : استاذ حسام انا اسف فعلا العربيه زادت لــ 5000 جنيه وفى لخبطه عندنا فى الشركه
    وسبنى نص ساعه وحشوف اذا كنت حعرف امشيها معاك بالسعر القديم ولا لا

    قلت له : ابقا شاكر فضلك وفى انتظار تليفونك

    شويه واتصل

    وقالى : انا مشيتلك الموضوع مع مديرى على السعر القديم بس فيه مشكله تانيه

    قالت له : خير

    قال لى : البنك وقف التعامل مع جميع البنوك حاليا وخصوصا بنك عوده

    قلت له : وانا مالى انت مطلع عرض سعر للبنك بتاعى وجاى تقولى الكلام ده دلوقتى بعد ماخلصت كل حاجه مع البنك

    قالى : والله مش عارف اقولك ايه ده كلام مديرى ليا

    قولت له طيب ادينى رقم اكبر واحد فى المبيعات فى منصور عشان اتفاهم معاه

    قالى : اوك خد الرقم عندك

    المهم اخدت الرقم واتصلت بيه وكلمته وفهمته القصه من اولها لاخرها وهو كان مدير مبيعات الملاكى على مستوى الجمهوريه فى منصور شيفروليه

    قالى : سبنى نص ساعه واتصل بيا

    اخدت بعضى ورحت فطرت على البحر وشويه واتصلت بيه

    وقالى روح الفرع وورقك كله خالص وعلى السعر القديم 150000
    ولو اى حد كلمك هناك او عطلك اتصل بيا فورا طبعا انا فوجئت من قوة لهجته وثقته فى ان الموضوع خلص وفرحت جدااا

    وشديت الرحال من قلب اسكندريه لفرع منصور فى الكيلو 21 على الصحراوى
    عشان استلم ووصلت فى ساعتين من الزحمه الرهيبه دخلت على مندوب المبيعات وانا على التليفون مع مدير مبيعات الملاكى
    وعطيته التليفون وقلت له كلم وشوف حيقولك ايه

    اخد التليفون وسمع الكلام وقالو تمام يافندم خلاص

    وقفل الخط وبصلى وقالى هو انت عملت ايه وجبت واسطه مين عشان يحصل كده

    قلت له : ابدا تساهيل ربنا والنصيب والى مكتوب ليا حاخده

    خلصت الاجراءات معاه ووقفت على الاستلام عشان مكنتش لسه جبت وثيقة التأمين
    ومش حيسلمونى العربيه الا بيها وطبعا اتأجل الاستلام ليوم الاحد عشان شرك التأمين بتشتغل من يوم الاحد

    ويوم الاحد رحت وخلصت كل حاجه واستلمت العربيه فى عصر يوم الاحد ب
    عد فحصها كويس جدااطبقا لنقاط الفحص المذكور فى الموضوع ده الى كنت عمله من شهور


    http://www.nilemotors.net/Nile/308039-a.html




    واستلمت معاها غطا ووتر بروف للعربيه هديه من منصور



    فولت العربيه من امارات مصر وروحت ودخلتها الجراج



    خلصت الترخيص فى اسبوع مرير والحمد لله


  2. #2

    الصورة الرمزية hossam_elwani

    رقم العضوية : 13051

    تاريخ التسجيل : 16Jun2008

    المشاركات : 10,009

    النوع : ذكر

    الاقامة : اسكندريه

    السيارة: كروز هاى لاين 2013 بفضل الله

    السيارة[2]: هوندا ثم مرسيدس ثم بيجو 504 ثم نوبيرا 2 ثم نيسان صنى

    دراجة بخارية: no

    الحالة : hossam_elwani غير متواجد حالياً

    افتراضي -

    وبعد التفاصيل الكتيره دى اليكم تقييمى ومواصفات العربيه والتقييم حيبقى من واحد لعشره حسب درجة رضائى عن الجزئيه المقيمه

    حبتدى بعرض مواصفات العربيه





    *الشكل الخارجى

    تقييمى : 10/8

    جذاب وفخم جدا وخصوصا بعد التعديلات الجديده من تغيير للاكصدامين
    والفوجات والشبكه الاماميه واصبح شعار شيفروليه اكبر
    وكمان نهاية الفانوس الامامى عند نقطة اللاتقاء مع الرفرف اصبحت فضيةاللون
    وسحبت الفانوس للخلف وبقى شيك بخلاف الفانوس فى موديل 2012
    كانت الجزئيه دى سودا وكمان شكل الجنوط 17 بعرض 215 ارتفاع 50 فرق كتير مع العربيه لانها بالجنط الــ 16
    بحس انه صغير عليها عايزه مش اقل من 17 و18 بوصه (ملحوظه : جنط الاستبن عادى مش اسبور مقاس 16 ارتفاع 60 )




    تبقى السلبيه الوحيده من وجهة نظرى وهو شكل الفوانيس الخلفيه
    وان شاء الله حغيرهم بفوانيس ليدات بتقلب كيان العربيه تمام وتحسها مرسيدس

    وكمان بخل منصور فى انه ماينزلش الهاى لاين بمقابض خارجيه مطعمه
    بالنيكل لانها كانت موجوده فى الهاى لاين 2012 وفرقه برضه فى الشكل الخارجى من غيرها

    العربيه ارتفعها زاد تقريبا 1سم ودى مأثر بشكل ايجابى على الشكل الخارجى
    للافضل ولاحظ الفبره السودا الى تحت الاكصدام الامامى الى كانت فى الموديل السابق بتحك فى طوب الارض

    الجميل ان العربيه جى فيها من قدام جزئيه فبر بها اماكن مسامير لتثبيت اللوحات
    دون الحاجه للتخريم فى الاكصدام بشكل عشوائى عشان تركب اللوحات و
    طبعا فى الخلف نفس الكلام بس على الصاج وانا ركبت اللوحات الانجليزيه الالمونيوم
    على ابعاد المسامير فى السياره وبعدين ركبت اللوحات عليها بمسامير المرور
    عشان اتجنب التخريم فى الصاج لانكم عارفين ان اللوحات الجديده لها ابعاد معينه بتتركب مها
    كمان من الحاجات الى مفيده جدا وخصوصا فى بلدنا الحبيبه هو الفبر الداخلى
    الى موجود فى الفجوات عند الاطارات الخلفيه والاماميه والى بتحمى جسم السياره نفسه من البارومه
    فى الشتاء وبيبقى تنظيفه سهل جدا حتى بدون الذهاب للمغسله
    وكمان بيحمى جسم العربيه من الزلط الصغير الى بيبقى ماسك فى الكواتش وانت ماشى والجزئيه دى كنت مفتقدها جداا فى الصنى الجديده

    *الشكل الداخلى للصالون

    تقييمى : 10/9

    اول ما تدخل العربيه نور الصالون والكنسول يشتغل بشكل تلقائى وكأنها بترحب بيك
    اصاءة الكونسول والكاسيت الجديد بقت ازهى واجمل وممتعه جدا فى الليل



    التابلوه شكله فخم جدا وخاماته جيده جدا ( كان ينقصه انه يكون طبقة فينيل مع جلد فى الجزء العلوى
    من التابلوه زى الالنترا لكن فى باقى اجزاء التابلوه كبلاستيك فهو اعلى جوده مماهو فى الالنترا مثلا )
    وكل الازرار فى منتاول ايدك وفتحات التكييف بشكلها الجديد اعطت طابع اكثر عصريه
    من الفتحات فى الموديل السابق وتشبه الى حد كبير فتحات تكييف الفورد فوكاس الجديده
    العدادات مضيئه بأستمرار فى الليل والنهار لرؤيه واضحه

    ودى شوية صوره تفصيليه

    العدادات


    بس للاسف كمبيوتر العربيه مش زى بره زى الصوره دى




    الطاره والمالتى فانكشن


    الشماسه اليمين ومرايتها


    مفاتيج الازاز الكهربا والتحكم فى قفل الابوب والتحكم فى الرايات الجانبيه ومقابض فتح الابواب من النيكل


    التابلوه والكنسول والاضاءه الجميله المريحه للعين


    الولاعه والطفايه ومكان الاكواب



    مكان حفظ فوق الكاسيت وكبير زياده وللاسف مفيهوش مكان للـ usb زى ماهو موجود بره مصر


    مفتاح النور والتحكم فى درجة اضاءة التابلوه وتلاحظو ان فتحات التكييف عليها حليات نيكل


    مسند اليد بين الكرسيين الاماميين وتقدر تتحكم فيه للامام وللخلف والمسند مكسى جلد بطبقة فينيل وبخياطه دبل

    وهو مقفول للخلف


    وهو مفتوح الى الامام



    مكان تخزين فى المخدع




    مخرج 12V خلفى بين الكرسيين


    الابواب فيها اجزاء جلد بطبقه فينيل


    جراب نضاره والسقف واضح خامته ممتازه زى المشمع كده سهل الغسيل بعكس عربيات تانيه موكيت بيتوسخ بسرعه
    مع العوامل الجويه وصعب تنظيفه وكنت بعانى منه فى النوبيرا




    التابلوه بقى بمفتاح عكس الموديل السابق كان بدون وفيه لمبه قويه







    كاوتش مانع لدخول المياه لداخل الصالون وممتاز جدا فى مصر فى ظل الفياضانات
    الى بتبقى موجوده فى شوارع مصر فى الشتا وتعدى الابواب وفعلا الميه بتخدل فى بعض العربيات




    باب بجراب صغير تحت بكر الاضاءه زى الى فى الاسترا تمام





    الارضيه موكتها خامته ممتازه جدا ومحمل عن عربيات تانيه كتير وبيجى مع العربيه
    طقم دواسات موكيت خامتهم ممتازه بجد وبيغطو حوض كل الارضيه تمام
    وبيعزلو الصوت للافضل والدواستين الاماميتين لهم اماكن تثبيت فى الارضيه لضمان عدم التحرك






    *وضعية القياده

    ممتازه وتشوف الكبوت بسهوله لانى من الناس الى بتحب العربيات الى تشوف كبوتها
    وانت سائق بتحسسك بالفخامه وبتعرف منها ابعاد العربيه المرايات كبيره ورؤيتها ممتازه ووسع الصالون هايل لخمس افراد
    الكراسى ناشفه شويه زى الاوكتافيا مثلا وكل الالمانى وده يرجع لكثافة الفوم
    الى اعتقد انه بيعيش اكتر ومابيهبطش بخلاف الالنترا مثلا احس انه اطرى واريح والله اعلم
    ويمكن بعد ما اعمل فرش جلد ليها القساوه دى تخف شويه

    *النظام الصوتى

    تقييمى :10/8

    ممتاز والراديو رائع بس بدون اريال مش تمام لازم تركب الاريال الى فوق السقف عشان تاخد منه احلى محطات

    بس الملاحظ انه مفيش تويترات عكس الموديل السابق كانو موجودين فى القوايم الاماميه
    واعتقد ان وجودهم كان حيخلى تقييم الاداء الصوتى للافضل
    والجميل انك لو كنت مشغل الكاسيت راديو او اسطوانه وكنت راكن العربيه
    وقاعد جواها مثلا بيقفل لوحده بعد 20 دقيقه مثلا انا محسبتهاش بالزبط توفيرا وحفاظا على بطارية العربيه
    وكمان لو كنت راجع من مشوار ومشغل الراديو او اسطوانه
    وقفلت العربيه وشيلت المفتاح وفتحت الباب الكاسيت يقفل لوحده بدون تدخل منك عشان متنساش
    ومن ضمن خصائص النظام الصوتى انكم ممكن تضبطه على بداية تشغيل بارتفاع صوتى معين
    وكمان تفعل نظام ارتفاع وانخفاض الصوت مع زيادة ونقص سرعة العربيه
    وعملين اضافه جميله الا وهى انهم سايبين فتحات بيضاويه فى الرف الخلفى
    لاضافه سماعات فى المستقبل ان اردت (كل السماعات فى العربيه فى الابواب)
    طبعا التحكم سهل وجميل من خلال المالتى فنكشن فى طارة الدركسيون

    مزيل ضباب للزجاج الأمامى ( موجود فى معظم العربيات المكيفة بس يدوى )
    لكن فى الكروز ماعليك سوى ان تضغط على زرار مزيل االضباب حتى يعمل اوتوماتيكى
    auto rear and front defrost




    العربيه بيجى معاها مفتاحين سكينه زى بعض تمام عليهم شعار شيفروليه
    تقدر تفتح منهم الشنطه والابواب وفيه ميزه امنيه عند فتح الابواب انه مابيفتحش الا باب السائق فقط
    عند اول ضغطه عشان لاتفاجىء بأن واحد نط جنبك وبيثبتك مثلا لاقدر الله وفى تانى ضغطه بيفتح كل الابواب




    عند فتح شنطة السيارة تضئ مصابيح اللوحة الخلفية وطبعا لمبة الشنطه من الداخل (مفتاح فتح الشنطه بدون ريموت موجود بين لمبات اللوحات)

    باب الشنطه مبطن من الداخل

    الكبوت مبطن من الداخل



    * الموتور والفتيس وتجربة القياده



    تقييمى : 10/7

    طبعا الموتور اتغير تماما عن الموديل السابق واصبح ايكوتيك 115 حصان 2 كامه 16 صباب
    وهو نفسه طبق الاصل بكل تفاصيله حتى التكييف الى موجود فى الاوبل استرا الجديده

    اول ما تدور العربيه صوتها بيبقى عالى نسبيا للتسخين وبعد كده ماتسمعش الصوت تماما

    ومؤشرات العدادات بتعمل وضع الاختبار زى الاوبل الاسترا تمام

    والابواب بتقفل اوتوماتيك على سرعة 10كم وبتفتح اوتو اول ماتجيب عصا الفتيس على p

    السحب ممتاز وتحس ان العربيه بتشدك شد الى الامام واقصى عزم بتاخده عند الوصول لــ 4000 لفه فى الدقيقه

    دواسة البنزين بطيئه نسبيا فى الاستجابه واعتقد ده عشان كهربا مش وير سلك
    نقلات الفتيس مريحه للموتور جدا لان الفتيس 6 سرعات (ستيبترونيك)
    يعنى الاربى ام مابيعديش 3000 لفه فى الدقيقه الا لو عملت كيك داون وبيبقى صوت الموتور برضه هادى
    يعنى العربيه مناسبه جدا لمحبى المواتير الصامته على السرعات العاليه
    بس للامانه نفلات الفتيس محسوسه خصوصا فى النفلات الاولى
    ولكن مع التعود وضبط رجلك و احساسك بالعربيه بتقدر تخفف الاحساس ده لحد كبير
    وفعلا اليابنيين متفوقيين جدا فى الفتايس الخاصه بعربياتهم
    وعلى فكره كود الفتيس للكروز وتركيبته الميكانيكيه مختلفه عن الفتيس فى الموديل 2010
    وده لتفادى كل الاخطاء او الاعطال ان وجدت فى الموديل السابق

    ولكن الشىء بالشىء يذكر الموتور والفتيس فى السرعه والاستجابه جبار بجد

    الى يخنق هو ان الفتيس بيبقى احيانا وانت ماشى على سرعة 70 مثلا فى طريق زحمه نسبيا
    جايب النقله السادسه وده بيخنق العربيه وبتضر تعمل كيك داون كل شويه عشان التسارع يكون كويس وده بيجى على حساب استهلاك البنزين

    *الفرامل

    تقييم 10/8

    جيد جدا وتلحق لما تطلبها والعربيه ديسكات ورا وقدام وطبعا ABS

    * استهلاك البنزين

    تقييمى : 10/7

    العربيه انا فولتها 60 لتر( من مميزات الكروز كبر سعة التنك 60 لتر
    الى بيخليك تسوق براحتك وتنسى البنزينه شويه) عملت بالزبط 600 كيلو وكان 80% من الطرق
    الى مشيت عليها داخل المدينه تقريبا والباقى طريق سريع
    وكل شويه مطب واطلع منه يعنى الصفيحه بتعمل 200 كيلو متر
    وده اعتقد والى الان ولحد ما العربيه تلين تمام بعد 5000 كيلو كويس جدا
    خصوصا انه جوه البلد وفى طرق مزدحمه لو طريق طوالى مش حتقل بأى حالى من الاحوال عن 250 الى 280 كيلو متر فى الصفيحه
    كمبيوتر العربيه من سرعة 80 الى110 بيدينى قراءة استهلاك البنزين 7.3 لتر لكل 100 كيلو متر
    وعلى فكره عداد الرحلات دقيق الى حد كبير بخلاف بعض السيارات
    وملاحظتى الفتيس الــ 6 سرعات موفر للبنزين فى الطرق السريعه فقط
    لكن على العكس مما صمم عليه فى الطرق المزدحمه بيخلى العربيه تستهلك بنزين اكتر
    ومن ضمن سلبيات العربيه هو نصف قطر الدوران صغير
    وحتاج حرص فى الدوران بالعربيه فى الملفات لان نصف قطر الدوران 10.9 متر

    * الثبات

    تقييمى : 10/9

    ممتاز ومش محتاجنى اتكلم عليه لان الكروز العربيه الوحيده من العربيات الكوريه الى موجوده فى
    مصر الى مشهود ليها بالثبات على السرعات العاليه والمنحنيات

    *العزل

    تقييمى : 10/9

    فوق الرائع تقفل الازاز ماتحسش بحاجه انت فى عالم آخر وحيبقى 10/10
    لو تم تغيير نوع الكاوتش kumho solus kh17 لان صوته مش تمام على الطريق

    * العفشه

    تقييمى 10/8

    بمجرد ضبط الهواء فى الكاوتش كما هو مبين على قايم الباب 32 psi
    لو العربيه راكب او اتنين مثلا و 39 psi لو العربيه محمله خمس افراد
    وشنط وخلافه اداء العفشه ونعومتها جيد جدا يعنى لا نعمه اوى ولا قاسيه
    وفى النقر والحفر مابحسش برزع او خبط وكأن لم يكن
    وده كله على الرغم من وجود الجنط الــ 17 بوصه
    لاول مره فى الكروز فى مصر بس انا حريص جدا فى المطبات خوفا من البلالين المشهوره فى الكاوتش الــ 17

    ودى صور للتعليق الخلفى





    * التكييف

    تقييمى 10/8

    ممتاز وبيسقع الصالون فى دقائق معدوده وصوت المروحه هادى جدا على السرعات 1 و 2
    ولكن ابتدائا من 3 الصوت بيبقى واضح وتكييف الكروز اصلا مشهود له بالكفائه وقوة التبريد هنا وفى الخليج
    والجميل فيه انه مابيأثرش على الموتور اطلاقا يعنى شغال زى مش شغال مش حتحس بحمله على الموتور خالص ..

    الشنطه واسعه جداا وتلبى كل احتياجاتى وسعتها 450 لتر

    [gdwl]الى كان نفسى يبقى فى العربيه[/gdwl]


    *البلوتوث وحستعوض عنه بأى جهاز محترم فيه gps ويتضمن الوظيفه دى

    *المرايات الضم لانها مريحه بالنسبه ليا بغض النظر عن الشياكه لما بدخل العربيه الجراج بضطر اقفل المرايات يدوى عشان ماتتجرحش

    * USB لانه بيسهل تشغيل الملفات الصوتيه وممكن يتم تعويضه بنفس الجهاز المتضمن gps ومن خلال خاصية fm

    *مكان لتبريد المشروبات فى التابلوه

    *الكراسى كنت اتمنى انها تكون فى الهاى لاين جلد زى ده وخصوصا فى التفصيل
    والشكل الى مش عارف لو عملته عند جينز كار حيطلع زى كده ولا لا




    فى نهاية التقرير اتمنى انى ما كونش طولت عليكم ويكون التقرير مفيد وممتع وفى انتظار المالك التانى للكروز 2013 فى المنتدى

    وربنا يحفظنا جميعا من شرور الطريق

    ارجو عدم النقل الا بذكر المصدر


    تحياتى وتقديرى للجميع


  3. #3

    الصورة الرمزية Mohyeldin1974

    رقم العضوية : 129114

    تاريخ التسجيل : 04Sep2012

    المشاركات : 833

    النوع : ذكر

    الاقامة : القاهره/ London

    السيارة: Xxxxxx

    السيارة[2]: Astra cosmo

    دراجة بخارية: no

    الحالة : Mohyeldin1974 غير متواجد حالياً

    افتراضي -

    الف مايوم مبروك وربنا يباركلك فيها ويكفيك شرها

    ان الله لا يغير ما بقوم حتى يغيروا ما بأنفسهم


  4. #4

    الصورة الرمزية Ahmedhussein007

    رقم العضوية : 78571

    تاريخ التسجيل : 25Aug2010

    المشاركات : 879

    النوع : ذكر

    الاقامة : Cairo-Fayoum

    السيارة: Corolla06-Lancer ex sport

    السيارة[2]: Vectra98-Megan06pano

    دراجة بخارية: no

    الحالة : Ahmedhussein007 غير متواجد حالياً

    افتراضي -

    تقرير ممتاز ورحله ممكن تكون شويه عذاب بس انتهت على خير الف الف مبروك وربنا يديك خيرها ويكفيك شرها

    رضيت بالله ربا وبالاسلام دينا وبمحمدا صلى الله عليه وسلم نبيا ورسولا
    Ahmed hussein
    ______________
    mido353235 سابقا


  5. #5

    SYD

    الصورة الرمزية SYD

    رقم العضوية : 94704

    تاريخ التسجيل : 14Apr2011

    المشاركات : 12,403

    النوع : ذكر

    الاقامة : Haram - Giza

    السيارة: OPEL VECTRA 2.0

    السيارة[2]: Seat IBIZA 1999

    دراجة بخارية: NO

    الحالة : SYD غير متواجد حالياً

    افتراضي -

    الف 1000 الف مبروك العربية
    ربنا يباركلك فيها يارب وتتمتع بيها
    تقرير فوق المحترم ومتكامل وحيادي
    وفعلا الدايو بنت عم الاوبل - بس يبقي للاوربي مذاق ورونق مختلف

    بطلب التثبيت وتعديل حجم الصور لأن مش كلها حملت معايا

    تحياتي

    Eng. Mohamed Sayed | MS Networking Trainer
    IBIZA MK2 (Typ 6K) APQ 1.4 MPI R4 44KW - 60hp

    <a href=http://www.nilemotors.net/Nile/signaturepics/sigpic94704_5.gif target=_blank>http://www.nilemotors.net/Nile/signa...pic94704_5.gif</a>

    صفحة القسم علي الفيس بوك


  6. #6

    SYD

    الصورة الرمزية SYD

    رقم العضوية : 94704

    تاريخ التسجيل : 14Apr2011

    المشاركات : 12,403

    النوع : ذكر

    الاقامة : Haram - Giza

    السيارة: OPEL VECTRA 2.0

    السيارة[2]: Seat IBIZA 1999

    دراجة بخارية: NO

    الحالة : SYD غير متواجد حالياً

    افتراضي -

    علي فكرة
    بالنسبة للاستهلاك هيظبط معاك ان شاء الله بعد اول سيرفيس

    والله المستعان
    ،
    ،

    Eng. Mohamed Sayed | MS Networking Trainer
    IBIZA MK2 (Typ 6K) APQ 1.4 MPI R4 44KW - 60hp

    <a href=http://www.nilemotors.net/Nile/signaturepics/sigpic94704_5.gif target=_blank>http://www.nilemotors.net/Nile/signa...pic94704_5.gif</a>

    صفحة القسم علي الفيس بوك


  7. #7

    الصورة الرمزية speed_magnum

    رقم العضوية : 130965

    تاريخ التسجيل : 05Nov2012

    المشاركات : 1,046

    النوع : ذكر

    الاقامة : NasR CiTy

    السيارة: non

    السيارة[2]: Corsa new faceLift

    الحالة : speed_magnum غير متواجد حالياً

    افتراضي -

    أسأل الله أن يؤتيك خيرها ويكفيك شرّها

    ولو اجتمعوا على ان يضروك بشيء لن يضروك الا بشيء قد كتبه الله لك


  8. #8

    الصورة الرمزية amr.elsayed

    رقم العضوية : 32825

    تاريخ التسجيل : 13Feb2009

    المشاركات : 3,559

    النوع : ذكر

    الاقامة : alex

    السيارة: Lanos 2016

    السيارة[2]: Logan 2010..Elantra 2014

    دراجة بخارية: ..............

    الحالة : amr.elsayed غير متواجد حالياً

    افتراضي -

    الف مبرووك يا باشا والف شكر على التقرير الرائع
    وان شاء الله تكون وش السعد عليك


  9. #9

    الصورة الرمزية shaaban2008

    رقم العضوية : 20432

    تاريخ التسجيل : 28Sep2008

    المشاركات : 544

    النوع : ذكر

    الاقامة : NASR CITY

    السيارة: lancer shark 2015

    السيارة[2]: verna 2013

    دراجة بخارية: ====

    الحالة : shaaban2008 غير متواجد حالياً

    افتراضي -

    تقرير رائع وتسلم ايديك علي المجهود الطيب
    ربنا يجعله في ميزان حسناتك وياريت يتم تثبيته لتعم الفائده

    لو رُزق العبد الدنيا بما فيها ، ثم قال : الحمد لله لكان إلهام الله له بالحمد أعظم نعمة من إعطائه الدنيا ، لأن نعيم الدنيا يفنى ، وثواب الحمد لله يبقى .


  10. #10

    الصورة الرمزية mahmoudysf

    رقم العضوية : 34626

    تاريخ التسجيل : 05Mar2009

    المشاركات : 4,339

    النوع : ذكر

    الاقامة : om eldonia

    السيارة: Octavia A4 2002

    السيارة[2]: Daewoo Nubira 1 1997

    دراجة بخارية: NOT YET

    الحالة : mahmoudysf غير متواجد حالياً

    افتراضي -

    hasad">

    تقرير ممتاز
    ربنا يديك خيرها ويكفيك شرها

    في الماضي كان الخطر الكبير الذي يواجه المصريين النظام الفاسد
    الان الخطر الاكبر الذي يواجه مصر والمصريين هو الجهل



 
صفحة 1 من 11 1 2 3 4 5 6 ... الأخيرةالأخيرة

المواضيع المتشابهه

  1. مشاركات: 86
    آخر مشاركة: 30-12-2013, 07:05 PM
  2. سيارات سيات لعام 2012-2013 - بالصور والتفاصيل
    بواسطة SYD في المنتدى ::: أهـــم مـوضـوعــات القســـم :::
    مشاركات: 4
    آخر مشاركة: 21-04-2013, 04:13 PM
  3. اصبحت المالك الثاني للكروز فيس ليفت 2013
    بواسطة grinsh في المنتدى شــيفـرولــيه
    مشاركات: 19
    آخر مشاركة: 02-04-2013, 11:51 PM
  4. مشاركات: 87
    آخر مشاركة: 05-03-2013, 07:36 AM
  5. عرض السبع بالتفصيل والتفاصيل لنيسان 2013
    بواسطة zambarota في المنتدى نيـــــــــسان
    مشاركات: 2
    آخر مشاركة: 01-01-2013, 11:41 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2