عربية نقل خبطت عربيتي النهارة الصبح

**Strong** · 03-08-2008 06:24 PM

حاجة غريبة أول مرة أشوف كده

أنا مش باركن العربية عند البيت علشان الناس اللي بتتسلى وتخربش العربية وهي واقفة بالمفاتيح ، غير الموتوسكلات اللي بتحمل عليها وبتسبب حفر وحاجات زي دي في العربية ، فباركنها دايما في مكان لا زرع به ولا ماء يعني مفيش حد من الناس بيكون فيه والمكان ده كله شمس جامدة طول اليوم غير إن الأرض غير مستوية وممكن تغرز ، وعلشان كده محدش بييجي المكان ده وبيكون معايا خمسة من جيراني راكنين في نفس المكان والعربيات ورا بعض ، ومن زمان باركن هناك ومرتاح جداااااا علشان محدش بييجي عند العربية ولا يخربشها ولا يكسر الإريال بتاعها كالعادة.

النهاردة سبحان الله واحد من عربيات النقل مش عارف ايه اللي عجبه في المكان راح داخل لجوه وطبعا الأرض غير مستوية فلما دخل راح مال شوية على العربية وكان محمل خشب وراح واقع على العربية بتاعتي بالخشب

طبعا الحمد لله ربنا ستر وكانت الخساير بسيطة يعني القايم الخلفي اتعوج جامد هو والشنطة وباب اتفعص سنة لجوه والتاني اخد خبطة بسيطة والحمد لله على كل حال

فمش عارف استعدل القايم والحاجات دي على البارد ولا السخن ولا اشتري جديد قايم وبابين وشنطة ولا ايه علشان عايز العربية ترجع زي الزيرو زي ما كانت

ياريت اللي يعرف حل للمشكلة دي يقولهالي وشكرا

**badblood** · 03-08-2008 07:00 PM

قدر الله مشاء فعل

**badblood** · 03-08-2008 07:02 PM

طبعا موضوع القايم ده لازم على الساخن وممكن ياخد قت كمان وعايز سمكري شاطر

الشنطه لة مخبوطة جامد ممكن تجيب واحدة استيراد وتريح نفسك

**Strong** · 03-08-2008 07:10 PM

وهل العربية كده هتكون رشت دواخل ؟ ويعني ايه رش دواخل ؟

**mohamed_88sk** · 03-08-2008 07:30 PM

لا حول ولا قوة إلا بالله
كده لازم حتروش دواخل
والقايم طبعا عالسخن والشنطه أستيراد لو متدمره زي ما باد بلاد قال

**akrameladl** · 03-08-2008 09:05 PM

لا حول ولا قوة الا بالله ناس معندهاش ضمير
ربنا يعوض عليك

**Strong** · 03-08-2008 11:36 PM

طيب لو احتاج قايم جديد ايه الحل علشان مرتبط بالحتة اللي فيها تنك البنزين وواصل لغاية الباب الخلفي والحتة دي كبيرة طب حلها ايه ايه اللي بيتغير ؟

**mohamed_88sk** · 04-08-2008 03:24 AM

طيب لو احتاج قايم جديد ايه الحل علشان مرتبط بالحتة اللي فيها تنك البنزين وواصل لغاية الباب الخلفي والحتة دي كبيرة طب حلها ايه ايه اللي بيتغير ؟

مش بيتغير ياريس عشان ده في البادي نفسه !!!
أنا أعرف كده الصراحه , ممكن يكون عند الأعضاء حل تاني ..
بجد ربنا يعوض عليك ويأجرك في مصيبتك خير .

**Sherif Khalifa** · 04-08-2008 08:56 AM

المشاركة الأصلية كتبت بواسطة akrameladl

لا حول ولا قوة الا بالله ناس معندهاش ضمير
ربنا يعوض عليك

والله مش مشكلة ضمير
دا غباء و غشمية بعيد عنك

**kh_elshiemy** · 05-08-2008 01:40 PM

القايم الخلفي دا جزء من جسم العربيه وعلشان يتغير لازم يتقص ....وللأسف بيعتبر عيب لما تيجي تبيع العربيه ....فحاول تروح لسمكري شاطر ويستعدلهولك علي الساخن وربنا يعوض عليك .....وربنا يرحمنا من الحقد والأهمال و الجهل