الموضوع: دعوة لعيد ميلاد المنتدي السادس في اوتيل جراند بيراميدز

السلام عليكم ورحمه الله
كل سنة وانتم طيبين
لاء مش عيد اللحمة :-) ولا رمضان برضه :-) شم النسيم لسه شوية ليه كل الاعياد اكل كدة :-)
ده عيد ميلاد بيتنا الكبير تمينا ست سنين كاملين وهاندخل السنة السابعه بفضل الله كمان ايام
يا رب دايما مع بعض من نجاح لنجاح ومن عطاء لاخوة وتحاب باقيين بفضل من المولي عز وجل
هانتقابل يوم الجمعة 12 ابريل 2013
باذن الله احتفال السنادي هايكون زي السنة اللي فاتت في نفس المكان لانه عجبكم جدا
ولان مناسب قوي من حيث الموقع والشياكة وجودة الاكل
فندق جراند بيراميدز على طريق المريوطية وشارع الهرم
سهل جدا لكل اللي جاي من برة القاهرة من محافظات القناة دائري وينزل المريوطية يلاقية على اليمين
اسكندرية ياخد حازم حسن ويمين بعد ميدان الرماية
القاهريين عارفينه خلاص
وجايبلك نفس عرض السنة اللي فاتت وازيد حاجة بسيطة نتيجة غلاء الاسعار
العرض ان شاء الله
داي يوز قضاء يوم كامل على حمام السباحة مع غذاء اوبن بوفيه ب 120 جنيه للفرد
الطفل تحت 6 سنوات مجانا واكثر من 6 سنوات نصف فرد
للشخص البالغ حق اصطحاب طفل واحد فقط مجانا
يوجد 2 شالية للرجال و1 شالية للنساء
اللي عايزين يباتو بقي في عرض برضه كويس جدا
الغرفة دبل ب 350 جنيه +20 جنيه تيبس ايضا
تدخل معانا الصبح تاخد غرفة وتتغدي معانا ولما الناس تمشي انت بايت وتفطر تاني يوم
وكمان جيبتلكو خروج متاخر يعني تقعد على البسين بعد الفطار لغاية الساعه 2 مثلا وتعمل تسجيل خروج الساعه 3 من الاوتيل
الاوبشن بتاع خروج متاخر هايكون لاولوية الحجز فقط عشان نشوف المتاح من الغرف

يعني لو انت وزوجتك مثلا هاتدفعو 240 جنيه داي يوز
لاء زود 110 وخد غرفة وبات وقضي نص اليوم التاني وافطر واخرج وتبقي قضيت يومين تقريبا

كمان السنادي في تورتاية زي ما عودناكم ومش هانعملها في الاوتيل هانعملها عند حلواني كبير وشهير عشان نلاقي حاجة حلوة بجد
وكمان في مفاجئات يوم الاحتفال وفي هدايا قيمة مش هاتكون متاحة غير للاعضاء المشتركين فقط
يعني معذرة لو جاي انت وواحد صاحبك مش هانقدر نديلة هدايا لان الهدايا لاعضاء المنتدي فقط
الحجز من دلوقتي لغاية يوم الاحد 7 ابريل عشان اعمل تاكيد مع الاوتيل بالعدد
يعني معاك شهر كامل
الفرد 120+ 5 جنيه على الاقل تيبس
رقم الحساب كلكم عارفينة تحط رقم المبلغ وتبعتلي الاسماء برسالة على الميل اللي في توقيعي
736-10029904283-96
كريم سراج منير
nsgb
البنك الاهلي سوستيه جينرال
وكمان وانت بتعمل الايداع تكتب اسمك ثلاثي تاكد على الكاشير يدخل اسمك الثلاثي عشان اعرف راسي من رجلي الله يكرمكم

في انتظاركم وكل عام وانتم بخير
وان شاء الله يكون يوم ما يتنسيش زي كل ايام نايل موتورز


عفوا لعمل الموضوع اجباري ولكن كثير من الاعضاء يشتكون من عدم معرفتهم بميعاد الاحتفال