وبعدين ترجعوا تشتموا فى البلد والناس
كان في موضوعين مفتوحين , واحد فيهم عن شباب صغير قاطع الطريق ( جانب من مظاهرات البحرين ) والتاني عن مشكلة بين راكبين علي فتح الشباك ,استفزني جدا ردود الناس اللي كانت قاعدة تقول للمستخدمين للعنف انت جدع وراجل وانا لو مكانه حعمل كدا ويا بختك وانت صح الي اخره .
الغريب ان بعد كدا الناس دي بتستغرب من استخدام الناس للعنف والبلطجة ولغة الجسد فى التعامل مع الاخرين , وكمان هذه النوعية من الناس تربي ابنائها علي استخدام لغة الجسد والعنف , يعني تلاقيه بيقول لابنه اي حد يضربك اضربه متسكتش واديله بالجزمة واللي اشتمك اشتمه , يعني مش كفاية ان احنا جيل اتربي علي مفاهيم مغلوطة لا كمان حيطلع جيل تاني متربي غلط .
في ناس بتقول مهو في ناس متجيش الا بالضرب , يعني فى دماغها ان الواحد لما ينضرب حيتربي ,لا يا اساتذه , الشخص اللي انضرب دا اتعلم انه المره الجاية حيحصن نفسه كويس وحيبقي شايل سلاح , لانه فهم ان البقاء للاقوي واول حد حيعمل مشكلة معاه حيضربه بالسلاح , يعني انت بتصرفك الهمجي دا حولت انسان لبلطجي وشايل سلاح ,العيال بتوع البحرين اللي قطعوا الطريق وصاحب العربية ضربهم , المرة الجاية اي عربية حتعدي حيكسروها بجد ولو قدروا يمسكوا السواق يضربوه حيعملوا .
العنف لا يولد الا عنف
انت انتصرت مره انما المره الجاية حتلاقي نفسك انت الضحية ,واللي فرحان بنفسه انه ضرب واحد او ازي شاب صغير ,المره الجاية انت اللي حتتأزي سواء فى جسدك او مالك او حد من اهلك .
لو فعلا عايزين البلد تبقي كويسة لازم تغيروا فلسفة استخدام الجسد ولازم تربوا عيالكم علي لغة الحوار .