الموضوع: للمهتمين بالثبات : هل الالنترا و الفلوستر .بتعوم؟ و ابه الحل من وجهة نظرك.دنجل خلفى

المشاركة الأصلية كتبت بواسطة Samir Elshahawy

طبعا موضوع جميل جدا و بقالي 3 أيام عمال أمزمز فيه
بجد أحييك يا محمد علي الموضوع الرائع ده

و بأعتذر عن عدم الرد علي تليفونك لأني كنت في عالم أخر وقتها و يادوب فوقت من البنج و بدأت أقرأ موضوعك

و طبعا تحية لكل الاخوة اللي شاركوا في الموضوع بالشرح و التحليل و الصور الجميلة , بجد حاجة هايلة و أنا مستغرب أحنا ليه مش قادرين في مصر نعمل عربية لحد دلوقتي و لو حتي نص لبه طالما عندنا الامكانيات و العقول اللي بتفكر

رأيي و هنا أنا هأتكلم عن الألنترا اللي أعرفها كويس و أعرف أمكانياتها و برضه عيوبها :

- بالنسبة لموضوع التورشن بيم و تأثيره السلبي في الملفات التي بها فواصل فقط , صحيح بيكون فيه حركة عرضية محسوسة لكن أنا مش شايف أنها تمثل خطورة طالما أني عارف الموضوع ده كويس و عارف أزاي أتعامل معاه و مدرك جيدا أن كل أختراع أو منتج يستخدم لما صمم له
يعني عربيتي مش عربية سباق و لا دريفت و لا راليات و لكنها للأستخدام العادي

- في الملفات بدون فواصل و مهما بلغت درجة زاوية ميل الملف أو دورانه أستطيع بكل ثقة أني أخد الملف ده علي سرعات من 120 - 180 كم/س

- بالنسبة للفرامل في الملفات : حدث مرتين و لظروف أضطرارية و تحديدا في طريق الاوتوستراد fji في أتجاه المطار و قبل اليوتيرن اللي يرجعك علي صن سيتي أني نازل الصبح الطريق ده بسرعة زادت عن ال 100 كم/س قليلا و فجأة عربية رمت من أقصي اليمين لأقصي اليسار عليا فأضطريت افرمل و كنت فعليا في الملف و الطارة معوجة و قولت خلاص كده ... التورشن بيم هايشتغل و يفرج أمة لا أله ألا الله عليا و ألحق أتشاهد ياد
و لكن الحمد لله الألنترا لم تقل بأصلها و كملت زي ماهي

مرة تانية علي طريق الأسماعيلية / بورسعيد و ماشي 120 كم/س و بأعدي عربية من اليمين و أذا بميكروباص كان واقف علي اليمين بيني و بينه مش اقل من 20 متر و اذا به يقرر فجأة أنه يكسر شمال و يطلع علي الطريق
معرفش أزاي كسرت الدريكسيون مرة واحدة شمال و رجعت رديته يمين تاني بعد ماالعربية جت شمال فعلا و قولت هاتعرض و هألبس في الرصيف اللي في النص لكن حقيقة العربية ردت تاني مكانها و كملت طوالي بعد ماأصبحت قدام العربية اللي منت بأعديها بالظبط

طبعا غلطتين لكن ربنا سترها معايا أو يمكن لأني في الحالتين أتصرفت بشكل لا أرادي صحيح مع التورشن بيم و عملتش عكسه فالعربية ردت تاني لوضعها الصحيح

- نييجي بقي لموضوع الكاوتش :
أنا شايف ان الهانكوك kenergy eco اللي نازل في الألنترا مختلف عن اللي نازل في السيراتو و ده أدائه فعليا جيد جدا و شبيه الي حد كبير أن لم يكن فعليا بالبريدجستون بوتنزا اللي كان نازل مع الياريس
مميزات الهانكوك اللي في الالنترا من خلال استخدامي :
- تماسك جيد جدا بالطريق في المياه أو حتي علي الرمل
- الفرامل مع الكاوتش ده في الرمل جيدة جدا و بالرغم من أن العربية مافيهاش أي بي اس لكن اكثر من مرة أفرمل علي رمل و العربية تفضل في مسارها و ماتزحفش
طبعا في المطر كان فيه اكثر من مرة تعرضت للسفر في أمطار غزيرة خاصة السنة دي و بصراحة لم اشعر بأي قلق و العربية كانت ماسكة كويس في الارض و حتي مع استخدام الفرامل

ده عن تجربتي الفعلية للألنترا علي مدار اكثر من عام و نصف في طرق ممهدة و نصف ممهدة و غير ممهدة و رملية و طرق مبلله أيضا

مش باقول أنها مافيهاش مشاكل و لكن ثباتها معقول أو جيد جدا بالنسبة لطبيعة الاستخدام

أذا بالنسبة لي لاداعي لكل هذه التعديلات ووجع الدماغ و كبيري أغير الكاوتش لمقاس اكبر جنط 16 بدل ال 15 او أعرض الكاوتش علي نفس الجنط و ده لسه بأدرسه و دائما أتخوف من التعديلات في مصر لسببين :
- الاول : الفرق اللي هأدفعه علشان أحسن الثبات مثلا مش هايكون قليل و مش هأستفيد به لن طبيعة سواقتي للعربية لاتحتاج لمثل هذا النوع من الثبات العالي و كان من باب أولي أني اظل مع تويوتا و أن لا أغير لهيونداي

- الثاني : عدم ثقتي في اي حد ممكن يعمل اي تعديلأو يلمس عربيتي حتي التوكيل و مهما كان هذا التوكيل

أنا اشتريت العربية علي عيبها و عارف و رضيت بيها كده و مبرمج سواقتي علي كده في مقابل حاجات تانية كنت عايزها منها يبقي مرة اخري لاداعي لأجراء أي تعديل أو لعب قد يؤدي الي نتيجة أيجابية أو سلبية

مرة أخري شكرا علي الموضوع و معلش لو كنت طولت عليكما

معنى كلام حضرتك ان العربية ثابتة وأمان والموضوع متعلق بحد كبير لمهارة السواق ومدى تأقله مع تكنولوجيا هيونداى فى عفشتها الفريدة التورشن بيم ؟

المشاركة الأصلية كتبت بواسطة MohammedAladel

معنى كلام حضرتك ان العربية ثابتة وأمان والموضوع متعلق بحد كبير لمهارة السواق ومدى تأقله مع تكنولوجيا هيونداى فى عفشتها الفريدة التورشن بيم ؟

اي عربية ثابته حتي لو كانت أيه و لايصح أن أقول علي عربية ما أنها غير ثابتة

غير ثابته يعني بتتقلب و تنام علي جنبها عند كل ملف و ننزل نعدلها

الفكرة أن الثبات درجات حسب نوع و تصميم العربية للأستخدام اللي هيا مصممة له اصلا مش اللي أحنا بنستخدمه أو عايزين نستخدمه

طبعا السائق أو العنصر البشري عليه عامل مهم جدا في أنه يستوعب أو يقدر أمكانيات العربية و يستخدمها أو يوظفها بشكل صحيح و يقدر يطلع كل أمكانياتها و يسخرها لتلبية أحتياجاته

و فيه سائق تاني لايعرف أمكانيات العربية اللي هو راكبها و لا بيعرف يستغلها أصلا

أنا بأشبهها بأثنين :
- واحد معاه أي فون أحدث موديل و تلاقيه بيستخدمه كتليفون فقط و كمان معاه نوته خارجية بيسجل فيها الارقام و لما ييجي يتصل بحد يطلع النوته و يدور علي الرقم و يطلبه

- وواحد تاني معاه موبايل عادي لكن بيستخدم كل أمكانياته فبيحقق به نتائج أحسن من اللي معاه اي فون

تييجي بقي تقول للشخص التاني ممكن نركب القطعة الفلانية علشان يشتغل زي الأي فون , يقولك ليه ما أنا أجيب اي فون و أخلص دماغي بس أنا مش محتاجه

أرجو أني أكون قدرت أوضح وجهة نظري