Xplosion.....افيدوني يا اهل الخبره

**Bossy_Fadl** · 04-08-2008 02:57 AM

كل ما اسال حد يقولي ابعدي عن الصيني

لو قولت لحد صباح الخير يقولي ابعدي عن الصيني

المشكله حاجة غريبه بقي

اني للاسف مبيعجبنيش غير العربيات الصيني

و سبحان الله عيني في الشارع مبتجبش غير الصيني

و اول ما تعجبني عربيه و اتجنن عليها و اقول عاوزة اشتريها

اروح اقول لخالي مثلا ايه رايك في الاسبيرانزا

يقولي ابعدي عن الصيني

اقوله طيب الاكسبلوجن

يقولي ابعدي عن الصيني

انا مش فاهمه

هي دي كلمة السر و لا ايه

ساعات بحس انهم حافظين و مش فاهمين

يا جماعه حد يقولي و يجاوبني ليه بيقولو كده

انا عاوزة اكسبلوجن بالذات

ياريت حد يقولي ايه نظام العربيه دي و مواصفاتها ايه

و يا تري ثباتها عالي و لا ايه النظام

حد يرد عليا

و لو اقتنعت بكلامكو هبيع العيله كلها في ثانيه

و ثانكس ليكم مقدما

اختكم بوســي

**fahd_628** · 04-08-2008 03:07 AM

بلاش بجد حتندمى قدام

الأكسبلوجن مش منتشرة خااااااالص و قدام شوية حتدوخى على قطع الغيار و كمان مش حتعرفى تبيعيها

نصيحة لو خلااااااااااص عاوزة صينى يبقى هاتى السبيرانزا لأنها اضمن واحدة فيهم مع انها مش كويسة اوى برضة

**mohamed_88sk** · 04-08-2008 03:39 AM

لألألألألألألألألألألألأل أ بلاااااااااااااش
كل اللي جابوها قالوا ثباتها رايح في داهيه زي الأصل بتاعها (تيريوس 1)
وده لأن المسافه بين المحاور مش مناسبه مع أرتفاع السيارة ولذلك في أي ملف بيكون في خطوره وخصوصا مع السرعات العاليه نسبيا .. أنا كمان كنت عاوزها بس لما فكرت فيها لاقيتها زي التيريوس اللي هي تقليد ليها والتريوس دي برضو مشكلتها .
وزي ما قال فهد مش منتشرة زي الأسبرانزا وكمان قطع غيارها بعدين الله أعلم بيها ..
لو مصممه صيني هاتي أسبرانزا .
بس برضو بلاش صيني (كلمة السر ههههههههههه)

**hazem_khidr** · 04-08-2008 04:03 AM

بصي
الموديل الاصلي اللي هو التريوس القديم كان فاشل و ياباني كمان
فما بالك بالتقليد بتاعه و كمان صيني؟؟!!!
ابعدي عنها و هاتي حاجه تعرفي تركبيها و تكيفك ما تندميش علي فلوسك

**foxarc** · 04-08-2008 05:06 PM

انا انصحك لو عايزة 4*4 هاتي اسبيرانزا تيجو افضل بس هي في حدود 100000جم
اما لو عايزة اكس بلوجان فهاتي الجراند اكس بلوجان زي الجراند شيروكي في الشكل و الحجم و ثابتة جدا علي الطريق و هي تقريبا ب 80000جم

**Adham** · 04-08-2008 05:43 PM

ماعتقدش ان الجراند اكسبلوجن في حجم الجراند شيروكي أبدا , ربما في حجم الجراند تريوس او الجراند فيتارا

بس قد الجراند شيروكي دي صعبة قوي

**1.8Tee** · 04-08-2008 06:12 PM

مركبش عربية اسمها "انفجار"....

**Bossy_Fadl** · 04-08-2008 09:30 PM

ميرسي يا جماعه علي ارائكم

افدتوني و الله

بس انا كمان فعلا معتقدش ابدا ان العربيه في حجم الجراند شيروكي

بعدين انا كنت عاوزة تيريوس فعلا و برضه لقيت الكل بيقولي وحشه جدا

بس بصراحه ضحكتني يا استاذ محمد علي موضوع الاسم ده

ههههههههه

متخافش دي عربيه يعني مش هتنفجر في وشك

مستنيه اراء بقيه الاعضاء

عشان اخد قرار فاصل بقي

ثانكس ليكو كلكو يا جماعه

**eng / AhmeD** · 05-08-2008 04:29 AM

بصي هي مع واحد صاحبي
ضيقة من ورا برخامة :(
بس عالية في المطبات ........حلوة
و الثبات لحد 120 كويس بعد كده لا خالص
و الموتور ميتسوبيشي حلو
و الصالون شكله غبي و قديم كده و الكماليات مش كتير بس دي اذواق
و هي باعت شوية كويسين يعني مش نادرة ولا حاجة
و لو عايزة حاجة تانية انا تحت امرك

**Rsarabia** · 07-08-2008 11:43 PM

ابعدى عن الصينى و غنى له ههههههههههههههه
بلاش بلاش بصى لو انتى خلاص هتشترى انصحك باسبيرنزا على الاقل منتشرة شوية و لها كرامة عن العربيات دى اللى كل يوم الاقى عربية شكل و ماركة شكل مينفعش فى حاجة زى العربيات نجرب و ارجع اعيد تانى و اقول بلاش بلاش صينى ممكن لو عاوزة حاجة جديدة و حلوة ادفعي مثلا مقدم و قسطى الباقى او استحملى شوية و زودى بس حاجة مضمونة يابانى مثلا