الموضوع: طوابير السولار والبنزين على الطريق الزراعى - طنطا

المشاركة الأصلية كتبت بواسطة m i d o

فعلا انا كل يوم بشوف الطوابير دي و في حاجة انا عاوز اضيفها ان البنزينة دي للاسف فيها عالم حرامية بطريقة فظيعة عاوزين يسرقو اي حد بيحط بنزين لمجرد انهم الوحيدين الي بيجيلهم بنزين مرتين في اليوم عكس الباقيين مرة واحدة الصبح وبس و رحت احط منها بنزين من يومين وحسابي كان 44 جنية و الراجل بيقلي عاوز 50 جنية و طبعا مرضتش وعملتلهم فضيحة و دي تاني مرة تحصلي كدة هناك بعربية والدي ومرة بعربية خالي كان حسابة 91 جنية بيقلة عاوز 100 جنية معا العلم انها بنزينة حكومية يعني حتي الاكراميات الي بندفعها بمزاجنا دول مالهمش فيها لانهم بياخدو مرتبات و كذا مرة اقول هروح اقدم فيهم شكوي في وزارة التموين وبعدين اقول حرام عشان ماعملش مشاكل لواحد فاتح بيت بس لو اتكررت تاني انا هروح اقدم فيهم شكوي في التموين وبنصح اي حد من طنطا و بيفول من هناك اوعي تخليهم يقرطسوك واسف في اللفظ ويدفعوك اكتر من الي المفروض تدفعة

الله ينور عليك
فعلاً معاك حق ... انا بكره البنزينه ديه جدا ... ونادر جدا لما بروحها
ولاد اللذين معطلين عداد الفلوس ومشغلين عداد اللترات فقط
وبيغشوا البنزين ومش سالكين
وبيحسبوا اللتر بنزين 80
بجنيه بدلا من 90 قرش
وعلى فكره لازقين ورقة على الطرمبة ان اللتر بـ 90 قرش
وسمعت ان البنزينة ديه ليها مشاكل كتير مع التموين
الغريب الناس بتدفع من سكات وتمشى .. وكله متأقلم مع الوضع
بس الراجل اللى فى العربية البيجو اللى قدامى فى الصور ابو دقن بيضاء كان جدع ومرضاش يحاسبهم على اللتر بجنيه وشد معاهم .. بصراحة استجدعته قوى .... وفرحت قوى ان فيه ناس كده
واللى يضحك بقى بعد ما مشى العامل قعد يشتكيلى من اللى بيشوفوه وانا عمال اطيب خاطره .. حطلى 47.7 لتر وقالى كده الحساب 48 جنيه ... روحت من سكات مطلعله 43 جنيه حسابه بالتمام والكمال .. قولتله حسابك اهو
و 1 جنيه بقشيش منى اهو
وسلام عليكم
كان عاوز يعيط هههههههههههههه
قولتله خد كمان جنيه بقشيش ومفيش مليم تانى هدفعه زيادة
الناس اللى فى البنزينة كانوا مبسوطين قوى وانا ماشى كانوا بيحيونى على تصرفى