الموضوع: اثبت جوه المـــرور !!!!!!

كنت برخص النهارده عربيتى الصنى عشان كانت رخصتها منتهيه وببعها

المهم المرور بتعها فى ابو المطامير بحيره

المرور لسه جديد مفيش سنه وعاملينو فين تخيلو ...... عاملينو فى دور ارضى فى مساكن شعبيه قديمه ومتكلف كام ؟؟ متكلف 3 مليون جنيه !!!!!!!!!! على ايه مش عارف كل سنتى متر فيه معمول بردائه واى كلام
وعامل زى علب السردين .. ومفيش اى ساحه خاصه بالمرور منه للشارع على طول طوابير الفحص بتسد الشوارع الجانبيه ليه والسكان حوالين المرور الى هو فى مساكن شعبيه زهقو من الدوشه والقرف تخيلو شارع عرضه 6 متر تدخل من العربيات صفين ومنهم كمان التريلات بمقاطرها !!!!!!!!!!

المهم وقفت فى الصف وجه واحد شكله سوابق اثناء ما كنت باخد بصمة الموتور والشاسيه

قالى : عايزين خمسه جنيه

قلت له : بتاعت ايه

قالى : الوقفه فى الشارع

قلت له بزعيق: لييييييه جبايه ولا اتاوه ولا ايه بالزبط

قالى : عشان بنحرص العربيات وبناخد بالنا منها وبعدين لو مش عايز تدفع انت حر ولو عايز كمان فلوس خد

قلت له : روح الله يسهلك بعيد

المهم خلصت الفحص وبعدت العربيه بعيد فى شارع جانبيى ودخلت المدعو مرور عشان اخلص بقيت الاجراءات وشويه لقيت البلطجى ده داخل جوه المرو بيحاول ينصب على اى حد او يصطاده ويطلع منه سبوبه وشافنى قالى انت لسه مش عايز تدفع الخمسه جنيه وقعد يجر ناعم ويقول احنا اصلا مسجلين خطر وبنحاول ناكل لقمه حلال من هنا ولا هنا بدل ما نطلع نكسر عربيات ولا نقطع طرق ولا نسرق وبنعمل كده بعلم الحكومه ورئيس الوحده عارف وبعدين ياباشا ناخد بالنا برضه من العربيه حد يغز الكاوتش مطوه ولا الازاز يتكسر بطوبه ( بيهددنى تهديد غير مباشر) بينى وبينكم انا قلت الواد البلطجى ده حطنى فى دماغه وممكن يعمل حاجه فى العربيه وانا مشغول جوه وأمرى لله دفعنله 5 جنيه

المشكله اصلا انا الضابط بياكل فلوس هو والمهندس والمراجع وكل الموظفين عينى عينك يعنى حتى لو رحت تشكتى ليه حتشكى حرامى لحرامى وكلهم بلطجيه

وكمان البلطجه بتاخد طرق مختلفه تانيه جوه المرور يعنى مثلا الملف المعفن الى فيه ورقتين بصاغ بيتباع بــ 20 جنيه وكان عايز يبعهولى بــ 25 جنيه وياكل 5 جنيه فى جيبه !!!!!! وطبعا مفيش ايصالات ولا سند قانونى وتلاقو اصل الملف تمنه اصلا 5 جنيه بالكتير يعنى كده كده سارقك

بتاع الخزنه لو بتدفع مثلا 290 جنيه يقولك 300 ويضرب 10 جنيه فى جيبه ولما تسأله يقولك دى دمغه مش من ضمن المفردات هههههههههه!!!!!!!!!!!!!!!!!!!!! ولكنى اصريت واخدتها من حبابى عنيه مابحبش حد ياخد منى حاجه بلوى الدراع والاستهبال

لما جيت استلم اللوحات الجديده بتاع اللوحات يقول عايزين 10 جنيع

تقوله ليه

يقولك تأمين

تقوله انا دافع كل حاجه فى الخزنه وكل التأميننات المطلوبه

يقولك التأمين ده بيبقى عندى فى الدرج من غير حاجه

انا اصريت ومدفعتهاش وقلت له لو عايز تاخدها ادينى ايصال بيها غير كده لا

وفعلا مااخدهاش وعطانى اللوحات وقفل الشباك

يعنى التثبيت على كل الانواع وبكل الاشكال

وتقولولى ثوره هههههههههههههههههههه سلامات ياثوره

محدش يجيب سيرة ثوره ولا زفت اذا مكنش فيه ثوره على النفس وكل واحد يبتدى بنفسه فى كل قطاع وفى كل مكان مفيش فايده حتى لو جه نبى يحكمنا

الخلاصه مفيش فايده فى البلد دى والله لو ايه

حسبى الله ونعم الوكيل

وسلمولى على الثوره الى بقت فوضى فى كل مكان

تحياتى وآسف مليون مره على السلبيات القاتمة السواد دى بس للاسف هيا دى الحقيقه الى مانقدرش نهرب منها