المخالفات والغرامات....للسيارات الملاكى الخاصة

**tote_ide** · 04-08-2008 02:55 PM

هو ايه موضوع التدخين أو الأكل والشرب دا؟؟؟؟؟؟
انا ولا قريت على النت او فى الجرايد عن الموضوع دا هما هيخترعوا عشان يقلبونا بقى؟؟؟؟

**ENG\AHMED** · 04-08-2008 03:13 PM

المشاركة الأصلية كتبت بواسطة tote_ide

عد فلوسك يا معلم وانت نازل عشان تشوف هتدفع كام

المخالفة:عدم اردتدائك حزام الامان
الغرامة:من 100 الى 300 جنيه
العقوبة:الحبس من شهر الى 3 شهور

المخالفة:استخدامك الموبيل يدوى من غير هاند فرى يعى
الغرامة:من 100 الى 300 جنيه
العقوبة:مفيش الحمد لله

المخالفة:السير عكس الاتجاه
الغرامة:من 1000 الى 3000 جنيه ليلته سودا
العقوبة:مفيش الحمد لله كان ممكن يبقى اعدام

المخالفة:الانتظار الخاطىء
الغرامة:سحب رخصة القيادة مدة لا تقل عن شهر
العقوبة:مفيش كفاية سحب الرخصة

المخالفة:ازالة فك الكلابش بمعرفتك
الغرامة:من 200 الى 1000 جنيه
العقوبة:مدة لا تزيد عن 6 أشهر

المخالفة:ارتكاب أفعال مخلة بالأداب داخل السيارة
الغرامة:300 جنيه يا معلم
العقوبة:مدة لا تزيد عن 6 أشهر كده المقطم هيتقفل خلاص

المخالفة:القيادة ليلا من دون انوار امامية او خلفية او عاكس الاضاءة
الغرامة:مفيش
العقوبة:سحب الرخصة مدة لا تقل عن 6 أشهر

المخالفة:استخدام الأضواء المبهرة ليلا
الغرامة:مفيش
العقوبة:سحب رخصة القيادة شهر

المخالفة:عدم وجود حقيبة اسعافات أولية
الغرامة:مفيش
العقوبة:سحب الرخصة القيادة شهر

المخافة:عدم وجود مثلث عاكس للرؤية
الغرامة:مفيش
العقوبة:سحب الرخصة شهر

وفى مخالفات تانية للموتسيكلات والعربيات الاجرة بس احنا يهمنا الملاكى دلوقتى

مش ملاحظين ان العقوبات والغرامات مش متناسبة مع حجم المخالفة!!!!
يعنى مثلا واحد مش رابط حزام امان اخرة اية يعنى هيموت فى حادثة ؟؟ هو حر فى نفسة لأ ندفعة غرامة ونحبسة علشان يربطة ...طيب واحد تانى ماشى عكس السير ممكن يموت نفسة وغيرة يدفع غرامة بس !!! مين الاولى يتحبس؟؟!! ونفس الكلام لباقى العقوبات ...لو بصيت لكل الغراامات هتحس ان الموضوع لم فلوس مش موضوع انضباط والكلام الفارغ دة قاعدين نقول قانون المرور الجديد وهو دة اللى هيحل طيب هو مكانش فى قانون الاول !!! فين القديم مكانش بيطبق لية ماكان كل واحد بيعمل اللى على مزاجة اية اللى هيتغير دلوقتى الناس هى هى وسلوك الناس هوهو ودية الموضوع معروفة
الموضوع مش اكتر من بروباجندا وتقليد لدول تانية من غير منشوف اية اللى ينفع عندنا واية لأ او بمعنى اصح احنا سايبين المرض نفسة وبنعالج فى الاعراض...
بيقولك لازم تشيل شنطة اسعافات اولية علشان الحوادث كلام جميل مين اللى هيعرف يستخدمها !!! كام واحد !!! بلاش طيب المستشفيات بقت مجهزة لأستقبال الحوادث متوفر فيها الامكانيات وقت ما تطلب عربية الاسعاف هتوصل على طول ولا بعد المصاب ميموت...بلاش دى بيقولك المثلث العاكس علشان لما تعطل بليل يعكس الضوء شى جميل بس علمت الناس الاول ازاى تسوق ازاى تحترم الاشارات ازاى تعرف تستخدم اشارات العربية اصلا فهمتهم ان معنى الخطوط البيضا اللى على الاسفلت ان دى حارات والمفروض تمشى بين الخطين مش تاخد خط واحد بين العجل علشان متوهش..خلاص كل حاجة اتحلت ومش ناقص غير المثلث !!!! يعنى بدل لما نبتدى من البداية لأ رايحين نجيب من الاخر سيبين البدائيات وجيين فى الزيادات...ماكل من هب ودب بيطلع رخصة قبل ميتعلم السواقة!!!
بلاش الحكومة مزنوقة فى الدعم ومش عارفين يجيبوا موارد منين وبتغلى البنزين والضريبة و ...و..و..و............ طيب اية لازمة عربيات الشرطة اللى ب 550000 الواحدة (ايوا تمن العربية الواحدة نص مليون مش غلطة مطبعية) اية لازمة السورينتو والكامرى والاوكتافيا والكورولا والاوبترا ..الله اعلم فى اية تانى.. هى دى اللى لما نديها لشوية امنا وعساكر يلفوا بيها فى الشوارع يكسروها زى اللى فبلها هتعمل هيبة فى الشارع وتخلى الناس تخاف تعمل مخالفة!!!!!! هيبة القانون بنطبيقة مش بعربية الدورية....بلاش ياترى جت فلوس العربيات دى منين هيغلوا اية تانى؟؟؟ بلاش اية اخبار البنزين المدعم اللى العربيات دى هتمشى بية ولا هيقلبوها غاز زى التاكسى علشان يحافظو على البيئة "مش المفروض عربيات دورية يعنى هتلف كتير زى التاكسى"
قانون قديم قانون جديد كلة زى بعض شوية وهترجع كل حاجة زى الاول زى ايام حزام الامان كدة لأن ببساطة احنا عاملين زى منكون بنرمم بيت قديم المية والكهربا والاثاثات وكل حاجة بايظة وداخلين ندهن فية !!! طيب مالدهان دة هيبوظ من المية اللى ضربة فى البيت والبيت كلة هيقع لأن الاثاثات بايظة وهنرجع ندهن تانى ونصرف اكتر لأن الاثاث بايظ الاصل بايظ
هتعمل اية بقصر من غير اثاثات تشيل القصر دة!!!!!!!!!!

**فادى** · 04-08-2008 03:17 PM

المشاركة الأصلية كتبت بواسطة MMamdouh

واحدة واحدة بس يا فادى...

دلوقتى لو هى جباية فعلا... و انت مشيت صح... فيه حد يقدر يقولك بم؟؟؟

انا نزلن الشارع من يوم السبت لحد النهاردة و عديت على ضباط و امناء و كماين و رادارات ولا حد كلمنى لانى ماشى ملتزم... لابس حزامى و ماشى حسب السرعة المقررة ولا بدخن و لا بتكلم فى محمول و لا مركب فيمية.... معنديش ملصقات و طفايتى جنبى و رخصى تمام... خللى راجل ابن راجل يطلع تلكيكة عشان ياخد مخالفة

انا لما امين او ضابط بيوقفنى و يسال على الرخص بطلعها من غير ما اقوله كلمة... و كل مرة بيبص فيها و يرجعهالى فى 3 ثوانى و الحمد لله

صدقنى الالتزام مفيش احسن منه... انا معاك ان فيه ناس بتخالف و بتمشى معاها كدة و بيعدوا... بس فى الاخر حيقعوا حيقعوا... اذا مكانش النهاردة حيبقى بكرة

و خللى بالك من نقطة... فى حالة حصل حادث او كدة لا قدر الله كل الاخطاء دى حتتحسب عليك (محول - تدخين - السرعة المقررة) و ممكن تضعف موقفك حتى لو كنت انت مش غلطان فى الحادث

MMamdouh

معلش يا استاذ محمد انا دمى محروق من الصبح من ساعة المخالفة و ال50 جنيه الى دفعتهم حرق و نار فى جتتهم.
طبعا لا يمكن القيادة لمسافات طويلة بدون تدخين بالنسبة للمدخن, و لو مدخنتش نسبة الحوادث الى ممكن اعملها هتزيد مش هتقل :)
و المحمول ساعات بيبقى فيه مكالمات مهمة و مينفعش كل مكالمة اقف على جنب و اتكلم كده مش هوصل, و لست معتادا على استخدام السماعات,
و لو مشيت 20 كيلو قدام ممكن جدا اعمل فيهم حادثة و ممكن ارجع عكسى و معملش حادثة ده قضاء و قدر,
و مش اى حاجة بتطبق بره تبقى صح, الحاجة الوحيدة الى برا صح هى وجود الرادارات بشكل ظاهر لأن الهدف هو تقليل السرعة و ليس الجباية, فيما عدا ذلك فانا لست مع تشديد عقوبات المرور لأن بصراحة كل مخالفات المرور هى حرية شخصية و نادرا ما ينتج عنها حوادث, كما أنه ليس من المنطقى محاسبة السائق قبل وقوع الحادثة,
لو كنت واقف معانا النهاردة هتشعر بمدى السعادة و الشماتة الى كان فيها الناس و هما شايفين الشملول راجع على الموتوسيكل بعدما فشل فى القبض على الشاهين المخالفة, و لم يستطع حتى التقاط نمرها,
الواحد حاسس انو حريته الشخصية تنتهك بقوانين تعسفية و غير منطقية,
الحزام و التدخين حرية شخصية بحتة, و السير عكس الاتجاه و الركن الخاطىء كله بسبب سوء التخطيط,
مين قال انى بركن صف تانى عشان أغلس على الناس؟
لو كنت لقيت مكان اركن فيه اكيد مش هركن صف تانى و أعرض سيارتى لخطر التجريح,
على فكرة كلها اسبوعين و لا تلاتة و هترجع ريما لعادتها القديمة, و السبب هو انو سوء تخطيط الشوارع (قد يكون مقصودا بهدف اجبار السائق على المخالفة ثم الجباية) لأن ناس كتيرة مش هتلتزم, فاذا اردت أن تطاع, يجب أن تأمر بما هو مستطاع,
هذا هو ما اتحدث عنه, الحكومة مش خايفة علينا و لا على المرور, الحكومة سنت هذه القوانين لجباية المزيد من المال لا أكثر و لا أقل.
و حسبى الله و نعم الوكيل فى الفلوس و الوقت الى ضاعوا منى النهاردة بسبب هذا القانون الأحمق.

**SHLD** · 04-08-2008 04:36 PM

ما عليش أنا أسف يا جماعة يعني إيه عاكس الاضاءة

**فادى** · 04-08-2008 05:25 PM

المشاركة الأصلية كتبت بواسطة shld

ما عليش أنا أسف يا جماعة يعني إيه عاكس الاضاءة

ده سبوبة جديدة عشان يلمولهم قرشين من الناس,
عبارة عن مثلث صغير بيعكس اضاءه السيارات, المفترض انو بتحط ورا العربية لو بتغير عجلة مثلا بليل,
طبعا الحكومة مش خايفة على الناس اللى بيغيروا عجل بليل, لأنك ممكن بمنتهى البساطة تولع الانتظار و تخلص و هيبقى مبهر أكتر من المثلث بتاعهم ده, لكن هنقول ايه بقى, اهى حاجة لازم الناس تشتريها و تجيبلهم شوية فلوس, و طبعا فيه رشاوى و حاجات تحت الطرابيزه اتدفعت بين اللى بالى بالك بتاع انضباط الشارع المصرى و مصنعى هذه الأشياء.

**1.8Tee** · 04-08-2008 05:39 PM

المشاركة الأصلية كتبت بواسطة فادى

ده سبوبة جديدة عشان يلمولهم قرشين من الناس,
عبارة عن مثلث صغير بيعكس اضاءه السيارات, المفترض انو بتحط ورا العربية لو بتغير عجلة مثلا بليل,
طبعا الحكومة مش خايفة على الناس اللى بيغيروا عجل بليل, لأنك ممكن بمنتهى البساطة تولع الانتظار و تخلص و هيبقى مبهر أكتر من المثلث بتاعهم ده, لكن هنقول ايه بقى, اهى حاجة لازم الناس تشتريها و تجيبلهم شوية فلوس, و طبعا فيه رشاوى و حاجات تحت الطرابيزه اتدفعت بين اللى بالى بالك بتاع انضباط الشارع المصرى و مصنعى هذه الأشياء.

لو مثلا فى حالة الركنة بعد ملف او فى مكان مش باين اوى فممكن المثلث تحطة قبل العربية بشوية عشان تنبة الباقى....

**Mosso** · 04-08-2008 05:52 PM

فية بعض الHighways برة لو ملحقتش الExit بتاعك ممكن توصل للمدينة اللى بعديها عشان تلف. و بالمناسبة لو رجعت هناك بضهرك هايسحبوا رخصك و يدفعوك غرامة كبيرة + قضية و لازم تروح لطبيب نفسى.

في الدول المتقدمه ال Highways الي هي المفروض زي الدائري عندنا بيكون فيه مخرج بعد المخرج الاصلي بحوالي كيلو او 2 كيلو عشان يتجنب تصرفات السيارات انها لو فوتت المخرج مترجعش بضهرها و المخرج ده بيكون عباره عب ملف يرجع على المخرج الاصلي سواء بكوبري او بنفق مش U-turn

و كمان في حاجه هو مش المفروض لو الدوله عملت القانون ده كجبايه و عملت المثلث والشنطه دول عشان يلموا فلوس,
مش المفروض كانوا يعملوا مثلثات و شنط صناعه وطنيه؟؟؟
على الاقل هيبقى خيرنا فينا و اهي تبقى خطوه ايجابيه نحو الصناعه الوطنيه و نبدأها بمثلثات و شنط بعدين نوصل لزمزميات و لعب اطفال

**som3aa** · 05-08-2008 01:14 AM

طيب اية لازمة عربيات الشرطة اللى ب 550000 الواحدة (ايوا تمن العربية الواحدة نص مليون مش غلطة مطبعية) اية لازمة السورينتو والكامرى والاوكتافيا والكورولا والاوبترا

تصحيح معلومات لحضرتك بس , العربية الواحدة تمنها من 100-150 الف بالكتير اوى.
اولا الsorento تمنها 410000 و الcamry تمنها 560000 علشان الجمارك+الضرايب+ضريبة التهليب من التوكيل اللى بيبيع عربية بمكسب اكتر من 100 الف فى الsorento و اكتر من 250 الف بالنسبة للكامرى.
البوليس مبيدفعش جمارك و ضرايب.

اما بالنسبة للاستاذ فادى , انا متفق معاك فى حاجات و مختلف تماما فى حاجات تانية
هرد على الاختلافات

و لو مشيت 20 كيلو قدام ممكن جدا اعمل فيهم حادثة و ممكن ارجع عكسى و معملش حادثة ده قضاء و قدر,

ايوه ممكن بس مش معنى كدا انى اولع حريقة فى طيارة و اقول مهى كدا كدا ممكن تقع بسبب عطل فنى!!
اللى بيرجع بضهره بيعرض الناس للخطر و بيسبب حوادث و رايى لازم يتسجن مش يدفع غرامة.

المرور لأن بصراحة كل مخالفات المرور هى حرية شخصية و نادرا ما ينتج عنها حوادث, كما أنه ليس من المنطقى محاسبة السائق قبل وقوع الحادثة

مختلف برده ,يعنى نسيب واحد ماسك مسدس و ماشى فى الشارع و متخانق مع واحد نقول طالما لسه مقتلوش خلاص!!
نفس الفكرة , المخلفات بيعرض حياة الناس للخطر , طبعا مخالفة شرب و لا سجاير و لا حزام امان و الملصقات دا هبل و دى اللى حرية شخصية انما عكس الاتجاه و الحاجات دى رايى يعملوها جناية و شروع فى قتل كمان .

مين قال انى بركن صف تانى عشان أغلس على الناس؟
لو كنت لقيت مكان اركن فيه اكيد مش هركن صف تانى و أعرض سيارتى لخطر التجريح

كلامك صح 100%

ده سبوبة جديدة عشان يلمولهم قرشين من الناس,
عبارة عن مثلث صغير بيعكس اضاءه السيارات, المفترض انو بتحط ورا العربية لو بتغير عجلة مثلا بليل

مختلف معاك برده , المثلث دا اساسى جدا جدا و ضرورى, الناس اللى بتبقى واقفة على جنب الطريق بليل الواحد مبيخدش باله منه و فى ناس متخلفين منها مثلا الحيوان بيبقى حاطط طوب ورا العربية مش مثلث يعنى بيحط حاجة علشان تخبط فيها , معنى كدا انه عارف انك ممكن متشوفوش اما المثلث بيعكس النور فى وشك فبتاخد بالك
و متفق معاك فى باقى الكلام.
انا مش بقول ان الحكومة عملت القوانين علشان مصلحتنا , ملناش دعوة بنواياها , احنا لينا فى النتايج و انها حاجة ايجابية اللى اتعملت.

**ENG\AHMED** · 05-08-2008 01:33 AM

المشاركة الأصلية كتبت بواسطة som3aa

تصحيح معلومات لحضرتك بس , العربية الواحدة تمنها من 100-150 الف بالكتير اوى.
اولا الsorento تمنها 410000 و الcamry تمنها 560000 علشان الجمارك+الضرايب+ضريبة التهليب من التوكيل اللى بيبيع عربية بمكسب اكتر من 100 الف فى الsorento و اكتر من 250 الف بالنسبة للكامرى.
البوليس مبيدفعش جمارك و ضرايب.
.

الرقم دة اللى قايلة مدير الادارة العامة لمرور القاهرة (تقريبا مش فاكر بالضبط) فى اهرام الجمعة قبل اللى فاتت
بلاش الشرطة واخدة العربيات دى هدية طيب والصيانة والبنزين هدية كمان !!!!

مختلف معاك برده , المثلث دا اساسى جدا جدا و ضرورى, الناس اللى بتبقى واقفة على جنب الطريق بليل الواحد مبيخدش باله منه و فى ناس متخلفين منها مثلا الحيوان بيبقى حاطط طوب ورا العربية مش مثلث يعنى بيحط حاجة علشان تخبط فيها , معنى كدا انه عارف انك ممكن متشوفوش اما المثلث بيعكس النور فى وشك فبتاخد بالك

الحيوان اللى حاطط طوب ودبش ورا العربية وبيمشى ويسيبة هيحط المثلث جنبهم لأنة ببساطة مش حاطط الطوب ينبهك هو حاطة يكسرلك العربية قبل ماتخبطة مش اكتر .... ماشى المثلث مهم بس الاهم انك تفرض غرامة على اللى مش هيشترية ولا تعلم الناس قواعد وقوانين السواقة ازاى يلف وازاى يمشى وازاى يركن و الرخص متطلعش لكل من هب ودب والرشاوى و و و و و .......ساعتها هو هيجيبة لوحدة لأنة عارف اهميتة
اية معنى المواصفات المصرى فى المثلث؟؟؟ يعنى فى عربيات بتيجى من برة بالمثلث يقولك لأ دة مش مواصفات مصرى !!!! طيب هى العربية نفسها فيها مواصفات مصرى !!!! من امتى كان لينا مواصفة اصلا!!
نضفت الشوارع ؟؟؟عالجت النقر والحفر والبلاعات المفتوحة؟؟ عملت اماكن انتظار؟؟؟

**Mosso** · 06-08-2008 11:40 PM

طيب لو عندي خبطه في الكبوت و اتاخدت امن و متاه ايه عقوبتها ؟؟؟؟

الموضوع: المخالفات والغرامات....للسيارات الملاكى الخاصة

LinkBack

أدوات الموضوع

عرض

-

-

-

-

-

المواضيع المتشابهه

زيارتى لسوق المصرية للسيارات للسيارات المستعملة

توضيح شامل للمخالفات والغرامات والعقوبات

الكلمات الدلالية لهذا الموضوع

المفضلات

المفضلات

ضوابط المشاركة