الموضوع: نظرة موضوعية النظام الجديد للدعم على البنزين

بسم الله الرحمن الرحيم
أولاً وقبل كل شىء أرجو أن يكون الحوار بشكل موضوعى بعيداً عن أى إنتماء سياسى أو نظرة فردية ضيقة لا تراعى الصالح العام للوطن .
.... ممكن أصدمك وأقولك إن الدولة تدعم الأغنياء اكثر من دعمها للفقراء
طب إزاى يعنى لو حضرتك عندك فيلا وبستسهلك كهرباء ب 500 جنيه فى الشهر الدولة بتدفعك 100 وتدعمك ب 400 ( الأرقام هنا للتوضيح فقط ) ولو زى حالاتى عندك شقة على قدك بتستهلك كهربا ب 50 بتدفع 10 والدولة تدعمك ب 40 جنيه ؟؟؟
....* طيب لو قلت ليك إحنا شعب بيحب يعيش عيشة الأغنياء ويتحاسب حساب الفقراء

قبل ما تتنرفز اقولك إزاى
لو عندك سيارة خاصة زى كل اللى فى المنتدى ( ربنا يبارك ليك فيها ) وبتسافر بيها وتتفسح ومروش نفسك ع الآخر مش مجرد بتقضى بيها مشاويرك الخاصة بتمون بنزين نقول ب 50 جنيه فى الأسبوع طب تكلفته الفعلية على الدولة كام ؟؟؟؟؟؟ طب لو فيه أكتر من سيارة فى الأسرة الواحدة ؟!!!! وطبعاً مش محتاج أقولك على آلاف الأطنان اللى بتتباع فى السوق السودا وبتدخل جيوب ناس معينة ولا إحنا ولا الحكومة بنستنفع بيها .
طب حضرتك تعرف إن فيه أيتام وأسر كاملة تركهم عائلهم الوحيد دون معاش ويتقاضون معاش من التضامن الإجتماعى يترواح من 200 إلى 300 جنيه كحد أقصى فى الشهر حسب عدد أفراد الأسرة .
النظام الجديد للدعم حيوفر لخزينة الدولة 10 مليار جنيه ممكن تعمل بيها مشاريع أو تدفع بها معاشات محترمة لتلك الأسر .
طب والحل ؟؟؟
أنا شخصياً شايف إن الموضوع لازم ليه شوية تعديلات بحيث لا يؤثر على المواصلات العامة وسيارات الأجرة لآنه حيكون ليه تأثير مباشر على الشعب
وكمان لازم يكون فيه مقياس اخر غير موضوع السعة اللترية للمحرك لآن فيه عربيات قديمة سعتها اللترية كبيرة أو على الآقل تتبنى الدولة حلول محددة لتمكين أصحاب تلك السيارات من إستبدال محركاتهم إلى سعة أصغر وبالتقسيط دون فوائد ودون رسوم للتعديل فى المرور
مش إحنا رفعنا شعار عيش . حرية . عدالة إجتماعية أتمنى أن نكون على مستوى الشعارات وألا تكون مجرد كلمات أنطلقت من حناجرنا فى لحظات وطنية تذهب مع الريح فى أول تصادم لها مع المصالح الشخصية .
وأتمنى إن الرد يكون بموضوعية وأرحب بكل الآراء يمكن الواحد تكون فاتت عليه نقطة أو وجهة نظر محددة فمنكم نستفيد