الموضوع: عايزة اعمل الليزك و خايفة

العمليه مافيهاش اى مشكله ودى حاجه بسيطه .......انا عملتها وقريبتى كمان عملتها والمهم تكون حالتك انتى تسمح يعنى مافيش سكر ولا ضغط وتكون قرنية العين سميكه والشبكيه سليمه وقاع العين تمام ودى عملية فحص بتم قبل العمليه لو تمام مافيش اى مشكله بالعكس حتتبسطى كتير .......المهم 3 اشياء تاخديهم فى اعتبارك ........1- يكون عندك قصر نظر (طول نظر ....الافضل بلاش) ...2- تختارى مكان مناسب وثقه ........3- يتم استخدام جهاز حديث فيمتو ليزك او اطلبى تعملى بنظام بصمة العين .......

المشاركة الأصلية كتبت بواسطة mostafa3000

نصيحة بلاش من العملية
كلامي مبني علي تجربة صديق صيدلي وللأسف العملية بهدلتة جداً وكان ممكن يفقد نظرة واضطر يسافر كندا

للاسف اكيد كان فيه مشكله من الاساس تمنع العمليه وربما التقصير فى الفحص او عدم خبرة الطبيب تسببا فى ذلك

المشاركة الأصلية كتبت بواسطة pharohtemo

انا عملت العملية فى شهر 7/2012 و الموضوع بسيط و خلص فى ربع ساعة تقريباً مع ان اليوم كان مليان مشاكل غريبة (قطع نور - حريق بسيط فى شقة فى عمارة المستشفى) بس العملية نفسها كانت بسيطة
المهم مش العملية بس هى حبة ملاحظات بسيطة كالآتى:
يفضل يكون الجو شتاء أو على الأقل مش حر ، الحرارة بتتعب العين شوية أول كام يوم
فى قطرة مرطبة بتتآخد 4 مرات يوميا لمدة ستة أسابيع على الأقل بالإضافة لنوعين كمان لمدة أول أسبوع
مهم جداً تحمل الإلتهاب غى أول ليلة و اللى ممكن يزيد ليومين حسب درجة الحرارة .. يعنى نتجنب دعك العين تماماً !!!!
حيقولك فى المستشفى ممكن تنزلى الشغل بعد يوم او أثنين ! كل ده كلام فاضى .. مع كامل إحترامى لازم على الأقل 3-4 أيام راحة و بعد كده نظارة شمس محترمة طول ما الشمس جامدة
دى حبة نصائح بسيطة و العملية سهلة و حتفرق معاكى جامد .. كفاية تصحى من النوم شايفة كل حاجة و تلبسى نظارة الشمس اللى على مزاجك و تلعبى رياضة أو أى مجهود من غير محاذير ...

ايوااا.. الله يكرمك طمنتني.. انا مش أزمة الأعراض الخفيفة اللي بعدها دي، الواحد لازم يستحمل في سبيل الوطن بردو..D:

المشاركة الأصلية كتبت بواسطة eemmoo

انا زيك والله متردد ومش عارف اعمل ايه
لكن رحت مستشفى الرواد قولت اتوكل على الله واعملها عشان حاسس ان نظرى بدأ يضعف ومش عارف البس نظارة
قبل ما اعمل التحاليل سألت الدكتور قولتله هى العمليه دى مضمونه 100% رد عليا وقالى :
مش انت بتطلع على السلالم كويس قولتله اه كويس .. قالى مش وارد وانت طالع فى يوم من الايام تتشنكل فى سلمه قولتله ممكن طبعا
قالى العمليه دى كده ممكن تكون مع شخص ناجحه ومن غير اى مضاعفات وممكن مع شخص تانى يحصله شويه مضاعفات
بصراحة هو قالى كده ومن ساعتها مش عارف اعمل ايه

هو انا غالباً هاعملها.. انا زي ما بيقولوا ها take my chances و ربنا يستر..

المشاركة الأصلية كتبت بواسطة محمد يوسف

مش كل اللى بيلبس نضارة ينفع يعملها ..لو فيه استجماتزم ماينفعش تتعمل.. وبعد سن معين ماينفعش تتعمل
وهى مش سحر..توقعى مضاعفات لفترة..واحد صاحبى عملها فى مغربى وفضل متعذب سنة لغاية ما استقرت الدنيا معاه

بس المهم ان الدنيا استقرت معاه.. و على فكرة انا قريت ان الاستجماتيزم ممكن تتعمل بس التعديل بيبقى في أكتر من مكان مش في مكان واحد بس.. و عامة انا لسة في السن العادي انها تعمل، و الحمد لله مش عندي استجماتيزم.. فاضل بس اشوف سمك العدسة و الإختبارات التانية..

المشاركة الأصلية كتبت بواسطة buddha

[youtube]http://www.youtube.com/watch?v=o4kdc4sz5jg[/youtube]

بالتوفيق ان شاء الله

ماهو ده الفيديو اللي شفته و جابلي حالة الهلع d: بتخوفني تاني يعني ولا إيه؟؟ d:

المشاركة الأصلية كتبت بواسطة ahmedhilmy

انا شايف ان لو في دكتور واحد بس من دكاتره العيون لسه لابس اضاره مقلعهاش يبقي ده سبب ادعي يخليني معملهاش

بص مش شرط.. ماهو ياما دكاترة بيدخنوا، و ياما دكاترة اسنان و سنانهم ما يعلم بيها إلا ربنا و سهل انهم يعملوا تقويم، و ياما دكاترة تخسيس و بيبقوا 100+ " شفت بعيني محدش قاللي !! " .. ده انا مرة قريت من سنين عن دكتور طلق مراته عشان مخلفتش ولد !! و معروف إن اسوأ المرضى هم الأطباء، فطبيعي متلاقيش دكاترة كتير عاملينها :)

المشاركة الأصلية كتبت بواسطة محمد يوسف

مش كل اللى بيلبس نضارة ينفع يعملها ..لو فيه استجماتزم ماينفعش تتعمل.. وبعد سن معين ماينفعش تتعمل
وهى مش سحر..توقعى مضاعفات لفترة..واحد صاحبى عملها فى مغربى وفضل متعذب سنة لغاية ما استقرت الدنيا معاه

مين بس اللي قال كدة؟ لو عندك استجيماتيزم بتعمل ليزك عادي جداً ، الليزك بيظبط قصر النظر والاستجماتيزم
العملية آمنه جداً ونسبة النجاح فيها أكتر من 97% على ما أعتقد ، أنا أختي عملتها ووالدتي عملتها ومفيش أي مشاكل الحمد لله
بس لما تكبري في احتمال النظر يضعف تاني بس هتبقى طول نظر ، ودي حاجة عادية بتحصل مع تقدم السن
أهم حاجة تكوني أكبر من 18 سنة ، بتروحي للدكتور بيعملك الفحوصات اللازمة وبيتأكد من قابلية عينك للعملية ، والعملية نفسها بتتعمل في حوالي نص ساعة وانتي صاحية ، ليها أعراض جانبية نادرة لو حصلت بتتواصلي مع الدكتور وبتتحل عادي
بالتوفيق :)