محل جنب البيت صاحبه شاب حوالى 25 سنة وارثه عن ابوه
الواد ده من الاخر كان عيل هفأ واهبل وملوش فى حاجة والكل بيشتغله
بس من يوم ما وقف فى المحل صوته بدا يعلى بس بهبل مش حرفنة
يعنى واحد يسلم عليه يجعر باعلى صوته ويقوله اهلاااااا اتفضاااال يا معالللليييم
فى البداية الناس كانت مستغربة وبتضحك عليه
وبسبب جعيره وعلو صوته وغشوميته فى التعامل مع الناس
الجيران كانت بتحجز عنه خناقات ومشاكل كل يوم من ناس كتير
لكن مع الوقت اصبح كلامه كله جعير وشتيمة وقلة ادب وعلى مسمع ومراى
وفى الشتا يولع نار فى نص الشارع ومعرضها وعايش فى دور نخنوخ
المفاجاة
الناس اللى كانت بتقول عليه عبيط واتجنن ومش لاقى حد يلمه بقوا اصحابه
واللى كان بيشتمهم امبارح بعبطه اصبحوا واقفين معاه ليل نهار قدام المحل
والجديد انه داخل فى سكة البرشام وحركات مريبة وسلاح وحاجات غبية
كل ده مش مهم
المهم انى اتاكدت اننا كشعب احنا اللى بنصنع البلطجى
واحنا اللى بنديله الشعبية
بتعاملنا معاه وتقبلنا لقلة ادبه واشعاره انه حد مهم وجدع على عكس حقيقته
حتى لو كنا عارفين حقيقته بس ميمنعش اننا ننفخ فيه ونكبره
ونضحك على شتيمته واهانته للغير ونشجعه للاسف
لحد ما يجى اليوم اللى يمسك فيه سلاح ولا مطواة يثبت بيها الناس
ولا يقف على ناصية يبلطج ويعاكس فى بنات الناس وكله قافل بقه وساكت
ونقول فين الحكومة وفين وفين
انا شايف ان احنا لينا دور فى تربية البلطجى
بتساهلنا وتعاملنا معاه (وكلمة معلش) لاى حد يحاول يوقفه عند حده
انت شايف ايه ؟ :U_thin1[1]: