الموضوع: تعرضت لحادث بلطجة و محتاج مساعدتكم أتا مش عارف اتلم على أعصابي

أنا رأيي فوكك منهم. حتي لو جابوهم و أنت استنيتهم و ضربتوهوم مش هتستفيد حاجة و المشكلة ام العيال ديه ما عندهاش حاجة تخاف عليها و حياتهم ما لهاش تمن. لكن حضرتك عندك بيتك و عيالك و شغلك. فوض أمرك لله و قول حسبنا الله و نعم الوكيل. و أنا رأيي ما حدش ينزل من عربيته بعد كده مهما حصل خصوصا ان الشارع كان فاضي و المنطقة ديه أصلا هاديه.

قدر الله وماشاء فعل ياباشا والحمد لله وبرضه تابع مع قريبك وخد حقك بالقانون وبلاش تستعمل البلطجه لانها ممكن تقلب عليك لانك متعرفش هما ممكن يعملو ايه

قدر الله و ما شاء فعل . انا بس لفت نظرى حاجه : الناس اللى بتخبط فيك من ورا بيبقى هدفهم يوقفوك علشان يسرقوا العربيه و بيهددوا بسلاح علشان تنزل و دة السيناريو المعروف و طبعا ما بيبقوش عايزين شوشره لكن واضح ان اللى حصل مع حضرتك الهدف منه لم يكن السرقه و لكنه يميل الى ان يكون تصفيه حسابات يعنى الناس دى متأجره علشان تعمل كده .. يعنى اكيد هما مش واقفين فى الشارع ده بالذات علشان يتسلوا بانهم يخبطوا عربيه اللى يعدى فى الشارع و يضربوه من باب الفراغ مثلا و لكن المنطق بيقول انهم عارفين المنطقه اللى حضرتك ساكن فيها و احتمال كانوا منتظرين و فى الاغلب العربيه مسروقه و لذلك حاول تتذكر ان كانت هناك خلافات حديثه لك مع احد و عارف عنوان سكنك لان هناك احتمال يكون هو المحرض على الموضوع و الله اعلم

لا حول ولا قوه الا بالله العلى العظيم

قدر الله وما شاء فعل والحمد لله انها جت على قد كده وانك سليم وعربيتك معاك لان الاسلوب ده انا شخصيا بشوفه بعينى يوميا سواء بلطجه او ابتزاز او سرقه عربيات بنفس الاسلوب وبقابل مواضيع كتير بحكم عملى ولكن انصحك انك تبعد عن حل انك تضربهم والحوار ده لان العيال دى غالبا مسلحه ولو ضربتهم مش هيسبوك غير لما يخبطوك ويعلموا عليك ( يعنى لا قدر الله خبطه مطوه ف الوش ) والعيال دى ضايعه لا اهل ولا بيت ولا باقين على حاجه وفى ظل الانفلات الامنى دى بقى القتل عندهم اسهل الحلول ، انا حضرت موقف زى ده امبارح ، بلطجيه وقفوا عربيه نضيفه واعتدوا على صاحب العربيه فى شارع رئيسى وجمب القسم بحوالى خمسه متر وفردوا عليه كل انواع الاسلحه البيضه بحجه انه كان هيخبطهم بالعربيه وللامانه هو معملش حاجه ـ طبعا كلنا نزلنا نحوش ع الواد لحد ما خلصته من ايدهم وفجاه لقيته بيقولى انا هطلع حديده من العربيه واخد حقى منهم قلتله احسنلك اطلع بالعربيه وامشى لانهم قدام القسم ومش همهم يبقى متتوقعش يعملوا ايه وحقهم هتاخده منهم يوم القيامه ـ اقتنع ومشى الحمد لله

ومتخفش كلنا معاك وانا شخصيا تحت امرك فى اى حاجه وحاول تخلى قريبك المحامى يتابع المحضر هو عشان تبقى انت بعيد عن الصوره ويشوفه وصل لحد فين وان شاء الله العيال دى هتتجاب وغالبا العربيه دى مسروقه او حد فيهم ميكانيكى ودى عربيه زبون ، فى الحالتين هيتجابوا ان شاء الله وهيتعاقبوا على فعلتهم وحقك عند ربنا محفوظ ان شاء الله
صحيح لو حصل لحضرتك اى اصابات جراء الاعتداء الذى حدث عليك ـ حاول تعمل محضر اثبات حاله وترفق فيه تقرير طبى من مستشفى حكومه يثبت كل الاصابات ، لان المحضر ده هينفعك بعد كدا ، والف سلامه ع حضرتك ومعلش طولت عليك بس الموضوع ده نرفزنى قوى كانه حصل فيا بالظبط

حاسس بيك ان كنت تقدر تنزل تعمل حاجه ومعملتهاش
بس دا نصيب او دي حاجه من عند ربنا وقفتك لانك لو كنت نزلت كان ممكن يحصلك حاجه