الفرق ما بين اوتو ايجيبت ابو رواش و السبع المعادي وصاجة التيل
السلام عليكم اعضاء المنتدى الكرام
انا عايز احكيلكم عن تجربتي مع مركز السبع في زهراء المعادي و اتو ايجيبت ابو رواش
انا اصلا كان عندي مشكلة صوت الفرامل الي عامل زي الترلة و دي مشكلة مشهورة و اتعرف ان سببها صاجة عايزة تتغير
المهم و انا بعمل صيانة العشر الاف رحت مركز السبع الي في زهراء المعادي و الكلام ده كان يوم 10 يناير الي فات و قالولي ان هما حيطلبوهالي و حيكلموني اول ماتيجي و خلاص على كده بقالهم شهرين ما حدش اتصل
قررت اني اكلمهم و اقدم شكوى في قسم الشكاوي عندهم و كان تعامل الناس معايا محترم جدا بس للأسف من غير اي تقدم لحل مشكلة الصاجة
و مع الوقت صوت الفرامل بيكتر اكتر و كمان بقيت اسمع صفارة من الفرامل الامامية فقلت ما لازم اتكلم تاني و لا حياة لمن تنادي.
و شفت هنا على المنتدى مشاركة الاخ العزيز
</B>abdulmoniem
الي غير الصاجة في اوتو ايجيبت و ركبوهالة في نفس اليوم الي راح فيه فقررت اروح امبارح اوتو ايجيبت بس للاسف ما كنتش حاجز قبلها فرحت بدري كنت هناك حوالي الساعة 8:30 صباحا.
و كانت طلباتي كلاتي :
1- صوت الفرامل الي عامل زي الترلة
2 - صوت الصفارة الي في الفرامل الامامية
3- احيانا بسمع صوت صريخ للكاوتش في الملفات
الحمد لله استلموا مني العربية مع اني ما كنتش حاجز و غيرولي الصاجة في الضمان و استغربت ان تمنها غالي قوي كدا حوالي 4700 جنيه للاتنين و قالولي ان ضغط الكاوتش ما كنش مظبوط فده سبب الصريخ في الملفات بس كان في مفاجأة غير متوقعة
المفاجأة انهم قالولي ان سبب الصفارة في الفرامل الامامية ان الطنبورة عايزة تتغير و المفروض انها برة الضمان بس هما حاولوا يجيبولي استثناء لان العربية ماشية كيلومتر قليل ( 14000 ) كيلو و انها حتتغير في الضمان ان شاء الله بس انا ححتاج اغير معاها التيل الامامي و حتحمل تمنة قلتلهم خلاص مش مشكلة اتحمل تمنة .
للاسف بقى الطنابير كانت مش متوفرة فقالولي انهم طلبوهالي و حيكلموني لما تبقى موجودة و هنا ظهر الفرق التاني ما بين اوتو ايجيبت و السبع .
الفرق ان هما سلموني تقرير من المهندس بحالة الطنابير و انها حتتغير في الضمان ممضي من المهندس و مختوم علشان حقي ما يضيعش في الطنابير بعكس السبع ما سلمونيش اي ورق ان انا محتاج اغير الصاجات بتاعة الفرامل .
و أخيرا ليا سؤالين عند اعضاء المنتدى الكرام
1- نفسي حد يشرحلي مشكلة الصاجة ليه بتعمل صوت التريلة ده و ايه الفرق ما بين الصاجة الي كانت راكبة و ما بين الي ركبوها . و هل ممكن المشكلة دي تتكرر تاني و لا لأ لان بصراحة هي مش رخيصة خالص و الصوت بيخليك خايف و انت بتدوس فرامل.
2- هي مش حاجة غريبة ان الطنابير عندي عايزة تتغير على 14000 كيلو ؟ هل ده سوء استخدام و لو سوء استخدام ممكن يبقى ازاي الاستخدام الكويس الي يخلي الطنابير سليمة ؟
و شكرا لجميع اعضاء قسم نيسان على مشاركاتهم الفعالة
