الموضوع: عاوز انزل مصر زياره بس خايف!!!!!!!!!!!!

بص يا سيدى أنا نزلت في شهر ١ وكانت من أسوء المرات اللي نزلت فيها مصر لأني كنت بعمل أوراق كتيرة
كنت مأجر عربية وربنا سترها القلق كله في التحرير أما بقية الشوارع تقريبا هادية
بخصوص التقليب برده ربنا سترها معايا . أيام مبارك آخر مرة ليا كانت في شهر ٥ سنة ٢٠١٠ قولت البلد حالها سئ جداً ومش راجع تاني
المرة دى بقيت ماشي في الشارع اقول ولا يوم من إيامه لان الزبالة في الشارع بالكوم . الكهرباء بتقطع كتير . مفيش سولار ودا زاحم الشوارع
والطرق السريعة بطريقة غبية . الزراعي أنا مشيت عليه بعد ٢ بالليل ودا كان عبارة عن سيرك كبير للعربيات النقل اللي ماشية في ال٣ حارات
لو هتنزل علشان تشوف اهلك أقولك ماشي إنما لو عايز تفك عن نفسك وتتفسح روح اى مكان تاني تركيا أو تايلاند مثلا وأنا زعلان أني بقولك كدا كان نفسي تنزل بلدك تشوفها بس للأسف متشجعش انك تشوفها بالمنظر دا بالعكس أنا متوقع الاسوء في الأيام اللي جاية وربنا يستر
وبردى هنا غير متعلق بالسياسة لأني بطلت أتكلم فيها من زمان لاقتناعي التام ان لا الإخوان يقدروا يعملوا حاجة لوحديهم ولا المعارضة كمان
لازم جميع الجهات تكون متفقة مع بعضيها علشان نقدر ننهض بالبلد غير كدا هتلاقي الاتنين بيهوشوا في بعض عن طريق المليونيات الهبله وفي الآخر المواطن العادى هو اللي ليدفع التمن