عايز طفايه ... هاتولي طفاااااايه ؟ وجابولك طافيه ... اه جابولي طفايه
كنت ماشي على محور المشير
وببص على يميني
فجأه لقيت عربيه راكنه ع الجنب
والكبوت مفتوح والمتور مولع
والراجل ياعيني عمال يطفي بتراب
والمصيبه الاكبر اني لقيت تلات عربيات واقفين معاه
وبيطفوا هما كمان بتراب
طب فين طفايتكوا يارجاله ؟
مش عارف
المهم ربنا الهمني في جزء من الثانيه اني لازم اركن يميني بسرعه وانزل اطفي مع الناس دي
((افتكرت منظر الفلاحين في بلدنا زمان لما كانت بتحصل حريقه كان كل واحد بياخد حله او حلتين ويجري على هناك عشان يروح يطفي))
وفعلا ركنت بأقصى سرعه ونزلت جري وجبت الطفايه من الشنطه واستخدمتها بالاسلوب الصح ((كنت واخد كام كورس سيفتي بحكم شغلي))
والحمد لله العربيه اطفت
الاسئله بقى :-
- هو الراجل ده طفايته فين ؟
-طب التلاته التانيين طفايتهم فين ؟
دروس مستفاده :-
-الطفايه مهمه زي ما احنا شوفنا حتي لو عربيتك جديده ومفيش احتمال انك تستخدمها بس ممكن تنقذ بيها حد
-لو شوفت موقف زي ده ماتتردتش لحظه انك تساعد (حط نفسك مكانه)
-لازم تبقى عارف مكان الطفايه فين بالظبط في العربيه عشان متفضلش تدور عليها
-لو مسافر ومعاك شنط يفضل متبقاش تحت او خلف الشنط
-لازم تبقى عارف كويس ازاي تستخدم الطفايه (1- انزع فتيل الامان 2- اقلب الطفايه في وضع رأسي 3- اضغط على اليد)
-لازم تعرف ازاي تطفي (تقف على مسافه مناسبه من اللهب مع اتجاه الهوا (الرياح) وتطفي من اسفل اللهب الى اعلى )
عندي سوءال
نص او تقريبا ثلث البودره اللي في الطفايه خلصت (يعني لسه التلتين فيهم بودره ) بس الهوا اللي في الطفايه خلص خالص
ف هل ازود الهوا من عند اي حد بتاع كاوتش (الطفايه ليها بلف في الجنب)
ولا لازم تروح الشركه الخاصه بيها (بافاريا) وهي هتتعامل ؟؟
شكرا
