الموضوع: تقرير مصور : تصنيع علبة لعدة العربية من خامات بسيطة

بسم الله الرحمن الرحيم
السلام عليكم و رحمة الله و بركاته


زي ما العنوان بيقول ازاي نعمل علبة للعدة في العربية من خامات بسيطة
الناس هتستغرب و هيقولوا طب مانا اشتريها اقرف نفسي ليه
يا باشا انزل اشتري محدش قالك لأ العلبة هتلاقيها بـ10 و 20 ج كمان
لكن الفكرة انك تستخدم خامات موجودة عندك بدل ما ترميها تعمل بيها حاجة مفيدة يعني زي ما تقول اعادة تصنيع و في نفس الوقت بتعمل حاجة بايديك و ديه المتعة فيها

ديه العلبة اللي هنعملها



الخامات اللي استخدمتها

- بواقي جلد من ساعة ما عزلت و فرشت العربية جلد كنت هرميهم
http://www.nilemotors.net/Nile/330704-a.html

- علبة كرتون معرفش جت منين بس اهي جت اول ما شوفتها نطت الفكرة في دماغي خاصة اني كنت نازل اجيب علبة بدل اللي اتكسرت

- غراء الشعلة

- سلك معدن زي اللي بيستخدم في عمل اقفاص الكلاب و الطيور

- مقص و للأسف اشتغلت بمقص ما يعلم بيه الا ربنا

هي ديه العلبة




و بعدها نجيب الجلد و نلزقه عليها من برة باستخدام غراء الشعلة و هتعرفوا انا ليه استخدم الغرا ده






و نقص ع المقاسات بالظبط



و نلزق تحت



و بعد كده الاجناب الاربعة







و بكده قفلنا العلبة كلها



تفتكروا كده خلصنا ؟؟؟

لأ طبعا كنت فاكركم واثقين ان ده مش تقفيلي
احنا هنشيل كل اللي قطعناه و ده سبب اني استخدمت غرا خفيف ميلحقش ينشف و في نفس الوقت عشان الجلد
ناخد اللي لزقناه برة و نبدأ نحطه جوة العلبة نفسها







طبعا في الأول و في الاخر العلبة ديه كرتون يعني وارد متستحملش بالرغم انها ما شاء الله سمكها كويسة وتقيل لكن هنعملها تدعيم
طب التدعيم ازاي
فيه سلك بيستخدم في اقفص الطيور و الكلاب عندي لأني بعمل بيه أشكال و ده سعره رخيص جدااا الكيلو بحوالي 8 ج من العتبة

هنقصه ع اد طول و عرض العلبة داخليا





و بعدين نحطهم بس يفضل لو اطول شوية عشان يدخلوا مزنوقين زي كده و بعدين تعدلهم و هم جوة





و بكده العلبة تستحمل الضغط و ممكن تعملها مسند كمان


و بعدين نقفل بقي المنظر العار ده







و الآن حانت لحظة التقفيل الخارجي نجيب باقي الجلد و نلزقه
و نقص و هو ملزوق عشان يطلع بالظبط الا اني اتعذبت بسبب المقص المتخلف اللي استخدمته




طب بعد ما قفلنا من برة مش لازم نعمل مقبض ؟؟
هنعمل مقبض من نفس السلك برده



و نخرم العلبة من فوق عشان المقبض



و نحط المقبض و نبرشمه من جوة العلبة و بعدين نظبط الاعوجاج اللي فيه




طب فيه مشكلة كل ما امسك العلبة من المقبض بتتفتح

بسيطة هعملها كلبسة من نفس السلك بالشكل ده و اخرم من فوق و من تحت



و اركب الكلبسة تحت و اقرص عليها بالبنسة و اخلي اللي بتمسك غطا العلبة من فوق مفتوحة شوية عشان ديه اللي هنشيلها و نحطها من فوق بس و تحت ثابت






و بكده عملت علبة للعدة و ممكن تنفع مسند لو عايز






طبعا الناس هتقولي و ديه تشيل ايه ؟؟

العلبة ما شاء الله شايلة الآتي :

مفك 2*1 - بنسة - قصافة - مفتاح بوجيهات
مفاتيح من مقاس 10 لحد 17 - بيبة - مفاتيح فك و ربط العجل
مسامير و صواميل - سلك ربط - بكرة شريط - علبة wd-40
قطع غيار خفيفة ( سيور - بلي - بوجيه - تيل - لمبات )

و بكده تبقي جمعت عدة العربية كلها و بعض قطع الغيار و حجمها صغير و محطوطة في الشنطة

و بفكر اعمل جراب عليها من برة عشان يتحط فيها منظف الكربراتير و الـwd-40 و هبقي انزل الصورة ان شاء الله

المشاركة الأصلية كتبت بواسطة sakr1964

فكرة جميلة والله ربنا يجزيك خير....*

فعلا كل المتعة لما تعمل حاجة بنفسك حتى لو سعرها جنية فالفرحة بنجاح التجربة بتساوى الملايين ....*

فعلا يا باشا بيكون شئ ممتع جدااا انك عملت حاجة بايديك حتي لو سهل الحصول عليها

المشاركة الأصلية كتبت بواسطة esam_ayad

فكره جيده يا باشا وتستحق التنفيذ

شكرا لمرورك يا أ \ عصام

المشاركة الأصلية كتبت بواسطة wael nour

فكره عبقرية فعلا الكبير كبير

الله يكرمك يا باشا :)

المشاركة الأصلية كتبت بواسطة mesaharaty

يا سلام عليك يا فنان
أنا والله باشوف شنطة عدة صغيرة كدة وشكلها ضعيف بتتباع فى ماكرو بـ 15 جنيه مستخسرهم فيها . بس الفكرة دى حلوة جدا

موجودة في التوفيقية علب اشكال و الوان و احجام و رخيصة لكن انك تعمل حاجة بايديك ديه حاجة تانية خالص

المشاركة الأصلية كتبت بواسطة Ahmed_Lada

الفكرة حلوة

بس انت نفذتها علشان عندك جلد الفرش اللى كان موجود زى مقولت

بس اللى معندوش يعوضه بايه

مساعدة لاخوك برضة

بسيطة يا باشا شوف جلد شنطة قديمة او خامة الشنط اللي هي زي البوليستر دي اي خامة تقيلة قريبة من الجلد او القماش السميك تنفع يا باشا انا عرضت بس الفكرة و اللي يحب يفنن فيها يفنن :) ده بعد ما عملتها جاتلي افكار تانية كمان زي جراب عليها من برة يتحط فيها علب المنظفات زي منظف الكربراتير و منظف الفرش و الانتريور و الـWD-40
مستني تفانينكم في العلب و التقارير :)