بسم الله الرحمن الرحيم
الحمد لله ربنا كرمنى وجبت البيجو 508 وكنت حابب اعمل تقرير عنها
وطبعا مش هيبقى زى التقرير اللى كتبه الاستاذ احمد فهمى
ومعلش انا ماليش فى كتابه التقارير فاعذرونى على طريقه الكتابه وارجو انه ميكنش ممل من طريقه الكتابه

1-بالنسبه للسياره من الخارج فهى انسيابيه جدا وشيك جدا وبتدليك الطابع الفخم اكثر من الرياضى
والعربيه جنط 17 وليدات خلفيه واماميه وزينون والاضاءه بتتحرك مع لفه الدركسيون والشبوره كمان
بتنور مع الدركسيون وده طبعا بيبقى على نظام الاوتو فى الاضاءه
والمريات ضم من الداخل او مع الريموت وبتفتح كمان مع السنتر بتاع العربيه
واهم حاجة ان العربيه بتفتح وتقفل ببصمه الايد من غير ريموت ودى حاجه جميله ومريحه جدا
والعربيه مزوده بحساسات ركن خلفيه وحساس اضاءه وحساس مطر


2-من الداخل العربيه فرش جلد طبيعى ومتفصل بطريقه مريحه جدا يعنى متملش وانت سايقها
والابواب فرش جلد برده وخامات التابلوه والزراير ومسكه الفتيس جميله جدا ده غير النور الابيض اللى فى
منتصف عصايه الفتيس وكمان فيها امكانيه النقلات من ورا الدركسيون وده بيدى طابع رياضى
والدركسيون بيتحرك فى 4 اتجاهات والكراسى بتتحرك كهرباء وفيها نظام الفقرات للظهر
والكنبه واسعه جدا ومريحه جدا مع امكانيه طى الكنبه لتكبير الشنطه
ويوجد ستائر جانبيه للابواب الخلفيه وعلى الزجاج الخلفى وطبعا كل ده بيدى احساس بالفخامه

3-اما بالنسبه للموتور والفتيس فالموتور 1600 سى سى تيربو 156 حصان وتم تعديل الموتور
ليعمل ببنزين 92 بدون اوكتان بوستر فى موديلات 2013 والفتيس استيب ترونيك 6 غيارات
وهو يعتبر اوتوماتيك عادى مش زى الباسات بخاصيه التحكم المانيوال
وبالصراحه الموتور التيربو سحبه جامد جدا جدا بالنسبه لوزن العربيه

انا طبعا اسف مره تانيه انى طولت فى التقرير وكان غير منظم فانا بعتذر
وانا تحت امركم فاى استفسار