الموضوع: شاركونى فرحتى بأستلام محبوبتى الريو

السلام عليكم ورحمة الله وبركاته
قبل البدء فى كتابة اى شىء وبعد حمد الله والصلاة والسلام على الحبيب محمد صل الله عليه وسلم
احب ان ابدء بشكر كل القائمين على المنتدى لاظهاره بالصورة المشرفة واخص بالذكر قسمى الحبيب كيا واخص بالذكر منه كلا من : ابو ليلى - مهاب - محمد ابراهيم - مصطفى الفايد - عمرو توتى - moha4tec - ياسر السيد - وطبعا كل كيا تيم عشان ما انساش حد.
واحب ان اشكر فورميولاتور - وايضا احب ان اشكر كل قسم صقور نيسان.
نيجى للمهم بقى بدأت الموضوع بالمقارنات زى اى واحد بيشترى عربية جديدة قارنت بين عربيات كتير زى الصنى - تيدا - فلوانس - جين 2 - سيراتو - واخيرا الريو (عشان دول فى نفس الفئة السعرية)
عملت المقارنة على اساس الاتى: وسائل امان - تصميم - توافر قطع الغيار - توكيل - سعر اعادة بيع
المقارنات كلنا عارفنها ومفصصين العربيات دى كويس اوى
واخيرا توكلت على الله واخترت الريو .
السيارة موديل 2013 هاى لاين وكيل من اباظة السعر 135000 اللون بنى.
حجزت السيارة فى اخر شهر يناير ورجعت اجازة من الشغل وخلصت الاجراءات المطلوبة وسافرت تانى من غير ما استلم نظرا لاحتياج العمل.
فى الفترة دى العربية غليت من 128000الى 135000 زعلت طبعا وكنت هلغى الحجز بس قولت اتوكل على الله لان كل الناس قالتلى ان العربيات هتغلى تانى.
استلمت يوم 22/02/2013 ورخصت يوم 23/02 وروحت حاجز عند مرجان لتركيب الفرش الجلد يوم 27/02/2013 نقف هنا شوية بقا
قبل منها بيوم الاطفال الاحباب خلعو اسفنجات الفابريقة اللى بتتركب على الباب ويوم ما رخصت رجعت من المرور تعبان جدا نمت شوية ونزلت اخد لفة بالعربية الجديدة بقى واذ افاجاء ان الرفرف خلفى شمال محكوك حكة خفيفة جدا موش عايز اقولكو كنت زعلان اد ايه قولت قدر الله وما شاء فعل والعين والكلام اللى احنا عارفنيه ده المهم رايح اركب الفرش الجديد والدونيا زحمة موت عند سان استيفانو وكلنا واقفين والعربيات ماشية بالعافية العربية اللى قدامى يادوب فرقت عنى 1/2 متر بس واذ افاجأ بسواق تاكسى خروف راح مصدر بوز العربية وانا لسه بتحرك المرايا اتقفلت وسمعت خبطة وكنت خايف انزل عشان ما اشوفش اللى حصل فى العربية روحت شادد هاند بريك ونازل ببص كده لاقيت الحمد لله يادوب حكة خفيفة اوى والمرايا الحمد لله سليمة موش عايز اقولكو عملت فيه ايه فرجت عليه البحر من المنتزة لبحرى والبارد يقولى ما فانوس الاشارة بتاعى اتكسر يا بيه روحت هابشه زيادة لما قالى كده قولت الحمدلله وكملت طريقى لمرجان
ايه كمية الرغى اللى انا برغيها دى المهم فرشت الجلد والحياة حلوة وكله تمام.
مواصفات السيارة:
-ABS - EBD اوتوماتيك 4 سرعات استيبترونيك - اير باج 2 - بلوتوث - طارة مالتي فنكشن - مريات ضم- ليدات فى المريات - فتحة سقف - جنوط 15بوصة - مخدع سائق - تابلوه لونين - اضاءة فى الشماسات - تكييف فى درج التخزين - فوج لايت - كمبيوتر رحلات - تحكم فى ارتفاع كرسى السائق - سنتر لوك -ازاز كهرباء .
تقييمى للسيارة:
انا ولا حقول اثبت من ........ ولا اسرع من ........ كل اللى حقوله انها مرضية بالنسبالى احسن فى ناس بتزعل اوى
المميزات:

1- العربية شبابية جدا وتصميم خارجى شيك اوى
2- السحب ممتاز
3- تابلوه شيك جدا
4- ما بسمعش صوت الموتور لدرجة انى ساعات وانا قافل الازاز بنسى انى مشغل العربية وبدورها تانى.
5- اضاءة التابلوه تحفة فنية باللون الاحمر الجميل.
6- العربية واسعة لحد كبير وقاعدتها من ورا مريحة جدا بأراء الناس اللى ركبت معايا.
7- العفشة كويسة وعجبانى جدا وموش هقارن بينها وحاجة تانية عشان الشوارع عندى كلها مكسرة ومع ذلك ما بحسش بالمطبات ولله الحمد.
8- العربية ولله الحمد عالية عن الارض ما حكتش بيها ولا مرة (خمسة فى عين اللى ما يصلى على حبيبه محمد هههههههههههههههه(
9- ساوند سيست محترم الصراحة.


العيوب :
1- استهلاك البنزين عالى(ساعات بيوصل من9.5 ل 13 لترفى 100ك على كمبيوتر العربية داخل المدينة طبعا و كلنا عارفين انها مشكلة فى الريو لكن انا اخدت فى الحسبان كلام الاخوة مالكى السيارة ان من بعد 1000 كيلو وتغيير الزيت الاستهلاك هيتظبط على فكرة انا ما حسبتش الاستهلاك كام بالظبط عشان مشيت حوالى 500 ك بس وسافرت تانى.
2- ما فيش حساسات ركن على الرغم من انها هاى لاين.
3- الخامات الداخلية كانت ممكن تكون افضل من كده.
4- الكراسى بتاعتها كانت ممكن تبقى جلد.
دى الحاجات اللى لاحظتها من عيوب ومميزات ولو فى حاجة جديدة هضفها فى الموضوع ان شاء الله.
اسيبكم مع الصور بقى واتمنى انى ما كنش طولت عليكم بس ما اقدرش اخبى حاجة . عنكم
احبكم جميعا فى الله.

صور الشكل الخارجى:










صور من الداخل:

معلش الصورموش عايزة تترفع يمكن انا موش عارف بس ما علينا ده الرابط للصور كلها يا ريت لو حد يساعدنى انى ارفعهم بطريقة سليمة على الرغم من انى جربت مركز تحميل المنتدى وسألت مهاب وادانى الموقع ده imageshack ومع ذلك بيقولى فشل بردو يا ريت لو حد يدينى حل عشان التقرير يكمل

الف مليون مبروووووووووووووووووووووو وووووك