| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 77 1 2 3 4 5 6 11 51 ... الأخيرةالأخيرة
النتائج 1 إلى 10 من 766

  1. #1

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,829

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Lightbulb القواعد الذهبية لاختيار زيت العربية.... موسوعة مبسطة لأساسيات زيوت المحركات - Facebook Twitter whatsapp انشر الموضوع فى :

    الموضوع ده خلاصة مواضيعي وردودي السابقة في مشكلة اختيار زيوت المواتير واللي ما زالت عاملة مشكلة لناس كتير..

    أنا قلت لازم أشارككم بالمعلومات اللي عندي عشان الكل يستفيد

    بس عايز أوضح إن الموضوع متجدد وبيتحدث كل فترة .. فياريت تفضل متابعنا هنا لمعرفة الجديد..

    وأرجو ملاحظة متقسم على أربع مشاركات:


    خلينا نبدأ



    السوق فيه أنواع زيوت كتير قوي...

    اللي بيقعد 5000 كم، واللي يقوللك 10000 كم، واللي يقولك 25000 كم، واحنا كده كده بنغيره على 3000 كم!!!!
    ده غير إن كل واحد بسعر، وواحد يقلك خد الزيت ده أنا مجربه، والتاني يقوللك على نفس الزيت كلام تاني....

    إيه اللخبطة دي؟؟؟؟؟؟؟؟





    ولإن معظمنا مش عارف الفرق ما بين الزيوت ، فإحنا بنعتمد على عمال تغيير الزيوت والمعلومات من الميكانيكية في موضوع تغيير الزيت ده..

    وبصراحة مش كل اللي بيقولوه مظبوط لإنه مش مبني على معلومات ليها أساس علمي...





    أهم قاعدة في اختيار الزيت هو إنك ترجع لكتالوج عربيتك... وتشوف إيه الزيت المناسب اللي يتحط في العربية...

    ببساطة.. افتح قسم الصيانة في الكتالوج.. ودوّر على صفحة تغيير الزيت...

    لو ما لقيتش مواصفات الزيت المطلوب في الصفحة دي.. احتمال كبير يكون الكتالوج حاطط مواصفات كل الزيوت والسوائل بتاعت العربية في قسم تاني (خاص بالمواصفات).. وغالبا بيكون آخر قسم في الكتالوج... والعربيات الأوروبية بيبقى جاي معاها كتالوج منفصل فيه كل معلومات الصيانة... ارجعله..


    المهم.. هتلاقي في الصفحة دي مواصفة الزيت المناسب لعربيتك...

    على فكرة.. اللي مكتوب في الكتالوج ده هو أسوأ نوع زيت مسموح إنك تحطه.. يعني مفيش مشاكل إنك تحط زيت أحسن


    لما تشتري الزيت .. اتأكد دايما إن المواصفات بتاعت الزيت ده زي المواصفات المكتوبة في الكتالوج... أو أحسن منها..


    القاعدة المهمة التانية... مفيش ماركة زيت أحسن من التانية... لإن كل ماركة عندها أكتر من نوع زيت.. فيهم اللي يمشي مع موتورك وفيهم اللي ما يمشيش.

    وفعليا.. لما تيجي تقارن زيوت من ماركات مختلفة وليها مواصفات زي بعض .. مش هتلاقي فرق محسوس ما بينهم.


    طيب لو قدامي أكتر من زيت .. إزاي أعرف إذا كان الزيت ده كويس ولا لأ؟؟؟؟؟؟؟؟


    فيه قواعد عالمية وأرقام مكتوبة على علبة الزيت.. ومنها تقدر تعرف الزيت ده مناسب لعربيتك ولا لأ



    أي زيت عربيات في العالم بيتعرف من حاجتين.. اللزوجة و مستوى الخدمة


    أولا: اللزوجة



    ودي بتتعرف من رقم الـSAE

    إيه الـSAE دي؟؟؟

    دي جمعية مهندسي السيارات في أمريكا Society of Automotive Engineers
    وحددت طريقة تكويد تعرف منها لزوجة الزيت عن طريق أرقام... كل ما زاد الرقم.. زادت لزوجته

    إزاي؟؟؟

    الرقم الصغير يعني زيت خفيف (0، 5، 10، 15، 20)... والرقم العالي يعني زيت تقيل (30، 35، 40، 45، 50 ....)

    المهم... معظم الزيت اللي بنستخدمه في معظم عربياتنا هو زيت متعدد درجات اللزوجة

    إزاي؟؟

    يعني زيت بيديك أداء وكأن فيه خليط زيوت ..خفيف وتقيل ! ! ! ! ! ! ! ! ! ! ؟ ؟ ؟ ؟

    إنما هي في الواقع زيت خفيف وعليه إضافات من البوليمرز بيسموها محسنات مؤشر اللزوجة (Viscosity Index Improvement) وهدفها إن الزيت يحتفظ بلزوجته ويخفش مع ارتفاع درجة الحرارة

    ليه كده؟؟؟

    الغرض من الزيت متعدد اللزوجة إنه لما تيجي تشغل عربيتك وهي باردة.. الزيت بيبقى له لزوجة معينة بتخليه يوصل لأجزاء الموتور المختلفة ويبقى فيه طبقة تزييت مناسبة للتشغيل..

    ولما الموتور يسخن... الطبيعي إن الزيت يبدأ يخف مع ارتفاع درجة الحرارة..
    بس ده حيخلي طبقة الزيت ضعيفة، فالبوليمرز بتخلي الزيت محتفظ بنفس درجة اللزوجة لما كان بارد...




    الزيت في الحالة دي بيتصرف كإن فيه زيت تقيل سخن.. وده سبب وضع درجتين لزوجة على العبوة.

    عشان كده الزيت بيبقى مكتوب عليه درجة اللزوجة بتاعة خليط الزيوت (المفترض)
    مثلا:
    20W-50 الزيت الخفيف درجة لزوجته 20 ... والزيت التقيل درجة لزوجته 50
    5W-30 الزيت الخفيف درجة لزوجته 5 ... والزيت التقيل درجة لزوجته 30
    15W-40 الزيت الخفيف درجة لزوجته 15 ... والزيت التقيل درجة لزوجته 40

    الأرقام دي ليها علاقة بحرارة الجو المحيط... مش حرارة الموتور..

    طب إزاي نعرف إن الزيت ده لزوجته تنفع لجو مصر؟؟؟

    مفيش درجات لزوجة بعينها تنفع لجو مصر.. الاختيار دايما بيبقى عن طريق الكتالوج..

    يعني مفيش درجة لزوجة مناسبة لحرارة جو على الإطلاق ... إنما فيه درجة لزوجة مناسبة لحرارة جو في موتور معيّن

    لازم التلاتة مع بعض

    علشان كده بنقول .. لما تيجي تختار لزوجة الزيت.. اختار من الموجود في الكتالوج بس .


    طيب إزي أختار لزوجة الزيت الصح من الكتالوج؟؟

    في كتالوج العربية في قسم الصيانة صفحة الزيت لازم تلاقي رسمة زي دي



    لاحظ درجات الحرارة (حرارة الجو) ومدى التشغيل بتاع كل زيت

    زي ما إنت شايف... مفيش زيت محدد... اشتري أقرب زيت مناسب تلاقيه في السوق يكون مناسب للجو في مصر

    عموما.. الجو في مصر درجة الحرارة فيه عالية نسبيا.. وفي الشتا صعب توصل لتحت الصفر .. يعني بنتكلم في مدى بين صفر إلى 50 درجة على أقصى تقدير..


    خد بالك... لو لقيت لزوجة مكتوبة في الرسمة وماهياش مناسبة للاستخدام في درجات حرارة عالية (علشان جو مصر في الصيف).. يبقى ما ينفعش تستخدمها.. حتى لو مكتوبة في الكتالوج.. لإن الكتالوج بيقوللك استخدمها في درجات حرارة منخفضة.

    زي كده..



    حسب الكتالوج ده... لزوجة 5W-30 مدى التشغيل بتاعها ابتداء من 5 درجات مئوية إلى أقل من 30 تحت الصفر.



    طيب .... مادام كل الزيوت دي ممكن تشتغل ... هل فيه فرق في كفاءة التشغيل؟؟؟

    ميزة الزيت الـ10w-50 عن 10w-30 مثلا ...
    إن الزيت الأثقل (الـ50) حيديك حماية أكبر لأجزاء الموتور خصوصا في حالات التحميل العالي على الموتور...
    إنما الزيت الأخف (الـ30) حيديك توفير أعلى في البنزين

    لو عايز تعرف تفاصيل أكتر... اتفضل وادخل على الموضوع ده

    http://www.nilemotors.net/Nile/481878-a.html



    طيب... إيه اللي بيخللي بعض الزيوت تقعد في العربية 1000.. 3000... 5000... 10000 كيلو؟؟؟؟؟؟


    أولا.. مفيش حاجة اسمها زيت 1000 و 3000 و 5000 و 10000... كل الزيوت بتعيش المدة المطلوبة في الكتالوج على الأقل... المهم تختار الزيت صح..

    يعني لو توصيات الكتالوج طلبت زيت بمستوى معين ما ينفعش أبدا أبدا تحط زيت مستوى أقل منه.... حتى لو هتحطه لمدة أقل.


    ثانيا.. حتى لو كان الزيت بيقعد في الموتور مسافة 10 آلاف كيلو.. في حالات معينة لو حصلت معاك لازم تغير الزيت بدري..

    راجع أي كتالوج عربية وحتلاقيه بيقوللك.. إنك لازم تغير الزيت بسرعة لو العربية بتشتغل في ظروف الخدمة الشاقة..

    وظروف الخدمة الشاقة هي:
    * القيادة في الزحام
    * مشاوير قصيرة (أقل من 15 كيلو)
    * تدوير متكرر للسيارة على البارد خلال اليوم (تدويرها بعدما تبرد تماما)
    * القيادة في جو بارد جدا أو في جو حار جدا
    * القيادة في جو مغبر
    * القيادة في الرمل أو الطين
    * ترك السيارة على السلانسيه لمدد طويلة
    * أحمال عالية أو قطر سيارات أخرى
    * تدوير المحرك على دوران عالي لمدد طويلة

    لو عايز تعرف أكتر عن موعد تغيير الزيت.. ادخل على الموضوع ده
    http://www.nilemotors.net/Nile/490076-a.html


    طيب ما دام كل الزيوت بتعيش في الموتور نفس المدة.. إيه بقى اللي يفرق الزيوت الـ3000 عن الـ5000 مثلا؟؟؟

    الحاجة الأساسية اللي بتفرق بينهم هي زيت الأساس.. اللي بيضاف عليه كل الإضافات علشان تحسن من خواصه..

    فيه زيوت أساس مليانة شمع وشوائب... وزيوت تانية نقية .. وزيوت ثالثة بتستحمل درجات الحرارة العالية قوي والمنخفضة جدا.. والحاجات دي مش بتفرق في مدة بقاء الزيت (إلا في بعض أنواع الزيوت التخليقية فقط)...


    إنما بتفرق أساسا في كفاءة التزييت والحفاظ على الموتور في أفضل حالة.

    وده اللي بنسميه مستوى الخدمة







    ثانيا: مستوى الخدمة

    الموضوع ده متشعب شوية ... لأن بيدخل فيها نوع الموتور بتاع العربية وطريقة استخدامه وتأثير الزيت على الموتور من ناحية تقليل التآكل وتأثير الموتور على الزيت من ناحية الثبات الكيماوي.. وكمان تأثير الزيت على البيئة.

    بس اللي يهمنا منه حاجة واحدة.. هي درجة جودة الزيت نفسه ... ودي ليها أكواد وأرقام بيتعرف منه جودة الزيت

    دي كمان؟؟؟ ...


    أيوه .. بس المرة دي بكذا طريقة تكويد !!!


    وأشهر كود مكتوب على علب الزيوت في مصر هو كود الـAPI


    إيه الـAPI دي؟؟

    دي معهد البترول الأمريكي American Petroleum Institute

    وبيحدد حاجة إسمها رمز الخدمة (Service Symbol) اللي منها بيحدد جودة الزيت ده وإذا كان ينفع لموتورك ولا لأ.

    وبيعمل على كل زيت رمزين...(S) للمواتير البنزين.. و(C) للمواتير الديزل (السولار)


    مثلا:

    زيت مكتوب عليه API SJ/CF

    يعني إيه الكلام ده؟؟؟

    يعني الزيت ده مستواه (J) لمواتير البنزين... ومستواه (F) لمواتير الديزل

    وده كويس ولا وحش؟؟؟؟

    كل ما كان الحرف اللي مكتوب متأخر في الأبجدية الانجليزية.. كان الزيت ده أحسن
    يعني (G) أحسن من (F)... و(M) أحسن من (L)

    طبعا.. كل ما كان الرمز ده أعلى ... الزيت يبقى أغلى

    أحسن زيت حاليا مستواه (N) لمواتير البنزين.. و(J) لمواتير الديزل
    مفيش حاليا أقل من SJ لمواتير البنزين... وCH لمواتير الديزل




    عموما... أقل زيت حاليا (SJ) مناسب للعربيات اللي اتعملت قبل سنة 2001، وكل ما كانت العربية جديدة لازم يتحط فيها زيت أعلى


    اللي عايز معلومات أكتر ممكن يرجع للوصلة دي:

    http://www.api.org/certification-pro...GLISH_2013.pdf




    فيه كود تاني مهم وبقى موجود على معظم الزيوت دلوقتي.. اللي هو كود الـACEA


    إيه الـACEA دي كمان؟؟؟!!

    دي جمعية مصنعي السيارات الأوروبية (Association des Constructeurs Européens d'Automobiles)

    وعملت كود خاص بزيوت السيارات .. ونقدر نقول إنه مختلف تماما عن طريقة الـAPI

    الكود عبارة عن حرف بيعبر عن فئة السيارات اللي هتستخدم الزيت ده.. ورقم جنب منه بيعبر عن مستوى الزيت ده جوه الفئة دي.


    أزاي؟؟


    حرف الـA لسيارات البنزين
    حرف الـB لسيارات الديزل الصغيرة
    حرف الـC لسيارات البنزين والديزل الصغيرة التي يوجد بها علبة البيئة
    حرف الـE لسيارات الديزل الكبيرة و ذات الاستخدام الشاق.




    المهم.. اللي يهمنا منهم هو كود A


    بص كويس على علبة الزيت..

    لو لقيت كود A1 يبقى الزيت ده موفر في البنزين.. بس محتاج يتغير بسرعة.
    لو لقيت كود A3 .. يبقى الزيت ده بتاع خدمة شاقة وممكن يخدم مسافات طويلة في الموتور... بس مش موفر.
    لو لقيت كود A5 .. يبقى الزيت ده موفر في البنزين وبتاع خدمة شاقة .. يعني كإنه A1+A3

    كود الـC يعتبر هو نفسه الـA5 بس معمول للعربيات اللي فيها علبة البيئة زي ما قلنا من شوية .. وفيه اختلافات من ناحية بعض المكونات تخليه أحيانا مش مناسب في كل العربيات.


    المشكلة الكبيرة في أكواد الـACEA إن مفيش كود أحسن من التاني... لإن كل كود له استخدام.. وهما منزلين تحذير إن الاستخدام الخاطئ ممكن يسبب مشاكل مع بعض المواتير.


    علشان كده... ممكن جدا تشتري زيت يكون كود الـAPI متناسب مع المطلوب في الكتالوج بس كود الـACEA مش مناسب.. وتلاقي الزيت ده ما ينفعش معاك ويعمل مشاكل... وما تبقاش عارف السبب.


    اللي عايز معلومات أكتر ممكن يرجع للوصلة دي:

    http://www.acea.be/uploads/publicati..._Sequences.pdf



    طيب... فيه حاجة كمان...

    إيه تاني؟؟؟

    بعض شركات السيارات مش بينفع معاها الزيوت العادية.. لإن تكنولوجيا المواتير الحديثة محتاجة زيوت ليها خصائص مختلفة من ناحية سرعة السريان وتحمل الحرارة والتشتيت الحراري وحاجات تانية كتير.

    وعلشان كده.. الشركات دي عملت مواصفات خاصة بيها في الزيوت... وبتشترط إنك ما تحطش في مواتير عربياتها إلا الزيوت اللي توفي مواصفاتها أو تكون معتمدة منها.

    والشركات دي هي:
    مجموعة دايملر (مرسيدس - سمارت)
    مجموعة BMW) BMW - ميني)
    مجموعة فولزفاجن (فولزفاجن - أودي - شكودا - سيات)
    مجموعة فيات: (فيات - ألفا روميو - لانشيا - مازيراتي - فيراري)
    مجموعة كرايسلر (كرايسلر - دودج - جيب)
    مجموعة فورد (فورد - ميركيوري - لينكولن)
    مجموعة جنرال موتورز (شيفروليه - أوبل - كاديلاك - GMC - بويك - هولدن - )
    مجموعة رينو (رينو - داتشيا)
    مجموعة PSA (بيجو - سيتروين)
    شركة هوندا
    شركة بورشه
    شركة جاجوار لاندروفر

    والشركات اللي بتعمل مواصفات خاصة عمالة بتزيد ..

    فخلي بالك.... لو عربيتك واحدة من الماركات دي.. لازم تتأكد الأول إن الزيت اللي هتشتريه يكون معتمد من الشركة صانعة السيارة.. أو على الأقل يلبي متطلبات المواصفة.



    خلاصة الكلام... الزيت اللي يشتغل كويس معاك هو اللي يحقق كل متطلبات الكتالوج.... مش جزء منها بس.




    أمال يعني إيه زيوت تخليقية؟؟؟؟

    ده اللي هنعرفه في المشاركة الجاية...


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  2. #2

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,829

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Lightbulb الزيوت التخليقية واحتياطات التغيير -



    يعني إيه زيوت تخليقية؟؟؟؟




    بالنسبة لأنواع الزيوت... ففيه نوعين من الزيوت بشكل أساسي

    زيت معدني... وزيت تخليقي

    الزيت المعدني Mineral Oil
    هو زيت مصدره البترول المستخرج من باطن الأرض
    (وده سبب تسميته "معدني" لإنه بييجي عن طريق التعدين)
    وبيتم تكريره وتنقيته وممكن بيتحط عليه إضافات تحسن من خواصه


    الزيت التخليقي Synthetic Oil
    هو زيت... تكوينه الكيماوي معدل في المعمل من زيوت لها خواص مختلفة عن الزيت الناتج..
    (زي فكرة السمن النباتي.. هو زيت نباتي بس مهدرج وتحول إلى سمن)

    مش بالضرورة يكون مصدره الزيت المعدني.. فيه منه كذا نوع

    1- نوع تخليقي 100% من زيوت غير معدنية.. ودي في منها كذا نوع.. بس مش عايز أصعّب الموضوع أكتر من كده.

    2- نوع مصنع بطريقة تخليقية من زيوت معدنية.. وده أغلب الزيوت التخليقية الموجودة في السوق.

    3- نوع شبه تخليقي عبارة عن خليط من زيوت معدنية وزيوت غير معدنية .. بحيث إن الزيوت المعدنية ماتزيدش عن 30%.

    لو عايز معلومات أكتر عن أنواع الزيوت التخليقية وزيوت الأساس .. تقدر ترجع للموضوع ده:
    http://www.nilemotors.net/Nile/453047-a.html


    مميزات الزيوت التخليقية:
    * سرعة تدفق أعلى من الزيت العادي، فيقدر يزيت الموتور أحسن
    * أداء أحسن في درجات الحرارة العالية قوي والمنخفضة قوي
    * ثبات كيماوي وفيزيائي أفضل (يعني مش بيتحلل أو يفقد لزوجته بسرعة)
    * معدل استهلاك أقل
    * مضاد للتأكسد والتحلل الحراري وتكون الرواسب، لإنه خالي من الشوائب والمواد الضارة
    * مش محتاج يتغير بسرعة، وده حيوفر في الفلوس ويحافظ على البيئة
    * موفر في الوقود لإنه بيساعد الموتور يتحرك بسهولة أكبر
    * بيحافظ على الموتور لما بندوره الصبح لإنه بيوصل بسرعة للأجزاء اللي ما اتزيتتش
    * عمر أطول للموتور

    زمان كان فيه إعلانات لزيت موبيل 1 .. وكانوا بيقولوا إن العربية اللي كانوا بيختبروه فيها مشيت حوالي 200 ألف كيلومتر في ظروف قاسية من غير ما الموتور يحصله حاجة وكإنه لسه جديد.

    عيوب الزيوت التخليقية
    * لازم يشتغل على مواتير بتستخدم بنزين خالي من الرصاص (كل البنزين 90، 92، 95 في مصر خالي من الرصاص)
    * غير مفضل في المواتير الرحوية أو الدوارة Rotary (ودي نادرة ومش موجودة إلا في المازدا RX-6، RX-7، RX-8)
    * لو العربية اللي حتستخدمه شغالة طول اليوم (زي التاكسيات والميكروباصات)، مش حيبقى فيه فرق محسوس بينه وبين الزيت العادي، لإن ميزة الزيت التخليقي الأساسية هي لما بتيجي تدور الموتور.
    من وجهة نظري.. الزيت التخليقي أحسن بكتير.. وممكن تغير الزيت مع الفلتر مرة واحد في السنة.. مهما كانت عدد الكيلومترات اللي بتمشيها في السنة..

    مع إنه أغلى بكتير (يمكن ضعف الزيت العادي) بس كده فعلا يبقى موفر، وبيحافظ على العربية



    بس لو عربيتك بتاكل زيت.. انسى الموضوع ده تماما.. لإنك حترمي فلوسك على الأرض

    __________

    طيب لو حبينا نغير من الزيوت المعدنية للزيوت التخليقية.. هل فيه مشاكل؟؟

    الحقيقة موضوع التحويل من زيت معدني إلى تخليقي طالع عليه كلام كتير أنه مش كويس وبالذات لو الموتور كان قديم

    طيب ليه كده؟؟؟؟


    عشان نجاوب لازم ندخل في شوية تفاصيل علمية :(


    [gdwl]
    بس قبل أي حاجة... الكلام ده ينطبق فقط على الزيوت التخليقية بالكامل واللي زيت الأساس فيها غير معدني.

    يعني مش كل الزيوت التخليقية الموجودة في السوق يمشي معاها الكلام ده.

    لمعرفة الفروق بين الزيوت التخليقية... أنصحك بالدخول على الموضوع ده:
    http://www.nilemotors.net/Nile/453047-a.html

    [/gdwl]


    طيب.. نيجي للمفيد..

    بالنسبة للزيوت المعدنية.... فهي مافيهاش مشاكل بشكل عام لما نحط عليها إضافات لتحسين الخواص بتاعتها.



    إنما بعض الزيوت التخليقية الزيت الأساسي فيها بيتسمى (بولي ألفا أولفين polyalphaolefin) أو PAO، وطبيعة الزيت ده إن الإضافات مش بتدوب فيه ! ! !

    وعلشان الإضافات تدوب .. فيه مادة تانية وسيطة (مذيب) بتتزود ... الإضافات تدوب فيها وهي كمان تدوب في زيت الـPAO.

    المادة دي بتبقى معمولة من أحد مركبات الـ(إستر ester).


    طيب إيه المشكلة؟؟؟

    المشكلة الأساسية إن الإسترات مواد مذيبة ... ولما الزيت يشتغل في الموتور تبدأ هي تدوب الرواسب والمواد الملتصقة من الزيوت المحروقة وخلافه، وتفضل موجودة جوه الزيت، وفيه احتمال كبير إنها تسد الفلتر...


    المشكلة التانية اللي ممكن تحصل... الإسترات ممكن تأثر على الجوانات والأويلسيلات الموجودة في الموتور، وده معناه تسريب وفقد الزيت...


    بس ده كان واضح بشكل كبير في الزيوت التخليقية القديمة (أول زيوت تخليقية ظهرت في السبعينات)...

    حاليا.... الزيوت اتطورت، ومبقاش فيها التأثير المدمر ده.... إلا إذا كانت الجوانات والأويلسيلات أصلا تعبانة ومشرخة ... فالزيت هيظهر الشروخ والشقوق ويخليها تظهر بوضوح...



    طيب إيه الاحتياطات اللي لازم نعملها علشان ما يحصلش معانا مشاكل؟؟؟


    أولا: لو الموتور قديم

    يعني بقاله كام سنة شغال على الزيت المعدني بس... والخطوات دي هتتعمل قبل أول مرة هتحط فيها زيت تخليقي:

    1- يفضل نغير الجوانات والأويلسيلات بتاعة الموتور لإن فيه احتمال إنها تضرب بعد التشغيل بمدة قصيرة، بالذات لو الموتور بقاله أكتر من 5 سنين.

    2- لو الموتور فيه رواسب طينية من أثر الزيت المعدني .. يفضل يتعمل أويل فلش Oil Flush قبل ما نحط الزيت التخليقي عشان نشيل الرواسب القديمة..

    3- لازم نغير الفلتر، ونلاحظ ضغط الزيت وصوت طلمبة الزيت بعد التشغيل مباشرة... وأي صوت تسمعه غلط وقف مباشرة ونزل الزيت حالا.
    وعلشان تبقى واخد بالك.. الرواسب الطينية بيبقى شكلها كده..




    إنما لو الموتور نظيف ما تفكرش تحط الفلش... خاااااااالص.



    ثانيا: لو الموتور جديد

    يعني الموتور لسه ما كونش ترسبات طينية والجوانات والأويلسيلات لسه جديدة

    * مفيش مشاكل إن شاء الله... هتغير الفلتر وتلاحظ التشغيل وبس
    طيب ... إفرض إني حبيت أرجع للزيت المعدني تاني... فيه مشاكل؟؟؟؟؟

    أبدا.. بدل وغير زي ما انت عايز .... المهم يبقى موتورك أصلا حالته كويسه



    ولسه هنكمل...


    ...









    تم إعادة ترتيب المشاركات
    م ع 7

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  3. #3

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,829

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Lightbulb مستوى الزيت في المحرك ونقص الزيت وأسبابه -


    مستوى الزيت مهم جدا يكون في المستوى الطبيعي... لإن نقص الزيت غلط على الموتور... وكمان زيادة الزيت عن المستوى الطبيعي غلط...


    خلينا الأول نعرف إيه هو المستوى الطبيعي للزيت في الموتور؟؟


    المستوى الطبيعي للزيت هو بين علامتين الـMin والـMax اللي في عصاية مقاس الزيت.

    يعني مش شرط إن الزيت يكون عند علامة الـMax... المهم إنه ما ينزلش تحت علامة الـMin.. وساعتها لازم لازم تزود زيت..





    في أغلب الأحوال.. الفرق بين علامة الـMin والـMax بيكون حوالي 1 لتر... فلو لقيت الزيت في النص بين العلامتين يبقى تزود نص لتر... لو حبيت..



    من الآخر... طول ما الزيت بين العلامتين (Min - Max) يبقى مفيش مشكلة.. المهم ما يزيدش ولا ينقص عن كده.


    طيب لو الزيت نقص عن علامة الـMin.. إيه الخطر اللي ممكن يحصل؟

    لما الزيت ينقص كده بيبقى عندك احتمال كبير إن طلمبة الزيت تسحب هوا للحظات.. خصوصا مع حركة العربية وحركة الزيت جوه الكارتيرة...

    والطلمبة لو سحبت هوا معناه إن المعدن الداخلي مش هيبقى محمي بطبقة الزيت في اللحظات دي.... ده غير احتمال وقف عمل طلمبة الزيت بسبب وجود الهوا في بعض أنواع الطلمبات.


    بعض العربيات فيها مؤشرات لمستوى الزيت في الكارتيرة (زي رينو فلوانس/ميجان)... بس أغلب صانعي السيارات بتفضل إنك انت بنفسك اللي تراقب المستوى لإن الخلل في الزيت معناه خلل في الموتور بالكامل.


    على فكرة... ما تستناش لحد ما لمبة الزيت تنور.. لإنها لو نورت ده معناه إن الموتور مفيهوش زيت!!!!



    ولو حصل... لازم توقف الموتور فورا.


    طيب.. إيه اللي ممكن يحصل لو مستوى الزيت علي عن الـMax؟؟؟؟


    مشكلة مستوى الزيت العالي إن الزيت ممكن يوصل لحد عمود الكرنك..

    وعمود الكرنك للي مش عارف هو العمود الأساسي للموتور اللي متركب عليه كل البساتم..




    طيب وإيه المشكلة؟؟؟

    كذا مشكلة..

    1- لما الزيت يوصل لعمود الكرنك.. العمود هيخبط في الزيت بسرعة جدا ويعمل طبقة رغاوي في الزيت.. والرغاوي دي بتخلي الزيت زي قلته لإن التزييت معتمد على طبقة الزيت الكاملة.. والرغاوي كده بقت عبارة عن هوا مع زيت.

    2- لو الزيت مستوى علي جدا.. فده بيعمل مقاومة لحركة البساتم وممكن تسبب في كسر البييلات (connecting rods)... يعني دمار شامل ومفاجئ للموتور.




    بس المؤكد إن مش أي زيادة عن مستوى الـMax هتسبب المشكلة دي...

    لو مستوى الزيت كان أعلى من علامة الـMax بنسبة بسيطة (10% من إجمالي المسافة بين العلامتين).. يبقى إن شاء الله مفيش مشاكل..

    بس أكتر من كده.. لازم تنزل الزيادة.


    ______


    اتكلمنا عن نقص الزيت.. وعرفنا إنه أحد المشاكل اللي بتواجه ناس كتير..

    ونقص مستوى الزيت يعتبر من أهم المؤشرات على حالة الموتور.. والموضوع ده ممكن يكون مؤشر لمشكلة كبيرة أو ممكن لأ...

    ده غير إن ناس كتير بتخلط بين النقص الطبيعي للزيت والنقص غير الطبيعي...

    إيه ده؟؟ هو في نقص طبيعي للزيت؟؟؟

    أيوه... وأكتر الناس بتسميه بخر الزيوت..

    وبنسمع ناس كتير بتتكلم على إن في زيوت معدل بخرها أعلى من غيرها، عشان كده الزيت بينقص في المواتير... حتى وهي جديدة بحالتها!!!

    في الحقيقة الكلام ده "غير دقيق"

    اللي احنا بنوصفه ده إسمه "استهلاك الزيت"


    كل مواتير العالم بتستهلك زيت مع التشغيل... بمعنى إن الزيت بيتحرق مع البنزين أو السولار

    وده بسبب طبيعة عمل الموتور .. إن الزيت لازم يزيت أي جزء متحرك علشان تبقى حركته سهلة وما يولدش حرارة عالية



    السلندر من جوه لازم يبقى عليه طبقة من الزيت عشان البستم يمشي كويس... والبستم بيبقى فيه حلقات بتمنع اختلاط غرفة الحريق عن الأجزاء التانية المتحركة، ودي اللي معروفة بإسم "الشنابر"، ومن ضمن الشنابر دي فيه واحد أو اتنين مخصصين لمسح الزيت من على السلندر...



    بس المسح عادة مش بيتم بصورة كاملة، وبتفضل فيه طبقة رقيقة على السلندر بتتحرق مع البنزين.



    الحاجة التانية اللي بتزود استهلاك الزيت هو وجود فتحة النفس أو "بلف الـPCV"...



    المعروف إن فيه أجزاء كتير في الموتور بتتزيت بـ"الطرطشة" .. وبالتالي رذاذ الزيت ده بيخرج أثناء تزييت وش السلندر بالذات، وبيطلع من جوه البلوك من بلف الـ"pcv" ويرجع يدخل تاني مع خليط الوقود والهوا ويتحرق في السلندر..



    واللي بيحصل فعليا إن نسبة الغازات اللي بتتسرب من السلندرات بتبقى قليلة جدا لما الموتور يكون سخن... وبتزيد بشكل واضح لما الموتور يكون بارد أو ما وصلش لدرجة حرارة التشغيل الصحيحة... وده بيحصل طبعا في بداية التشغيل أو في حالة لو ثرموستات الكوعة متشال أو عطلان وهو مفتوح.

    معنى كده إن الموضوع ده لا يمكن نتفاداه؟؟؟

    أيوه... بس ممكن نقلل منه

    إزاي؟؟؟

    *حاول تستخدم زيت أثقل بعض الشيء ... لإن كل ما كان الزيت خفيف ، كل ما كان استهلاكه أكتر.
    *حاول تستخدم زيت تخليقي.
    *حاول تقلل من الدوران العالي للموتور... يعني خليك في المدى المتوسط بتاع الـRPM.
    * حاول تقلل من استخدام عربيتك في المشاوير القصيرة وهي باردة.
    * حافظ على ثرموستات الكوعة سليم وشغال كويس.

    لو عايز معلومات أكتر .. تقدر ترجع للموضوع ده:
    http://www.nilemotors.net/Nile/418186-a.html



    طيب لما الزيت ينقص كده... أعمل إيه؟؟

    ممكن تزود زيت... بس على شرط..

    إنه يكون من نفس نوع الزيت الموجود في الموتور... بمعنى إنه يكون من نفس الماركة وله نفس المواصفات .. أو بمعنى أصح.. من نفس العبوة

    المشكلة إنك لو خلطت نوعين زيت أو ماركتين زيت... إحنا ما نضمنش محسنات اللزوجة والإضافات اللي محطوطة في الزيت الأولاني تتفاعل مع اللي في الزيت التاني ولا لأ

    ... فيه تفاصيل أكتر عن موضوع الإضافات ده في المشاركة الجاية ...


    عشان تريح دماغك.... يفضل وانت بتشتري جالون الزيت تشتري عبوة صغيرة من نفس الزيت عشان تزود بعد كده.



    طيب إيه هو النقص غير الطبيعي للزيت؟؟؟



    النقص غير الطبيعي معناه إن الزيت بينقص بسبب وجود عيب في الموتور... يعني الموتور مش في حالة كويسة

    والنقص غير الطبيعي له سببين...


    أولا.. وجود تسريب من جوانات وأويلسيلات الموتور...





    والجوانات والأورنجات والأويلسيلات في الموتور هدفها هو منع تسريب الزيوت والسوائل..

    وأغلب المواتير بتبقى فيها الجوانات أو الأويلسيلات زي الصورتين دول..



    علشان تعرف إذا كان عندك تسريب من الموتور.. فده المفترض يكون واضح بالنظر للموتور أو تحت العربية..

    بمعنى إنك لازم تشوف حاجة من دول:

    1- بقع زيت وتراب على جسم الموتور (ممكن تبقى عاملة زي الطين لو التسريب قوي) .. خاصة عند السير الأساسي في الموتور اللي متركب عليه الدينامو وطلمبة المية والكمبريسور.




    2- بقعة زيت على الأرض تحت العربية لو التسريب كان قوي أو لو كانت طبة الزيت مش مربوطة كويس مثلا...





    ثانيا... تسريب داخلي للزيت داخل حجرة الاحتراق


    وده له أكتر من مصدر..

    ممكن تكون حلقات المكبس (الشنابر) متآكلة أو مكسورة .. وبالتالي طبقة الزيت اللي على جدران السلندر مش بتتمسح بما فيه الكفاية وتتحرق مع البنزين..



    وممكن كمان تكون جوانات الصبابات في وش السلندر متآكلة وتسرب زيت جوه السلندر..



    وممكن في بعض الأحيان يكون جوان وش السلندر فيه جزء مكسور بين واحد من مجاري الزيوت (بين البلوك ووش السلندر) وواحد من السلندرات أو أكتر..

    دي صورة بيبين احتمالات بوظان وش السلندر كلها وإيه اللي ممكن يحصل..




    التسريب الداخلي ده عادة بيبان لو حضرتك دوست بنزين بشدة وفجأة... وبيظهر في شكل دخان أبيض مزرق..



    خلي بالك.. لو التسريب بسيط ممكن الداخن ما يبانش إلا في لحظات معينة.. علشان كده يستحسن تخلي حد واقف عند الشكمان عشان يشوف إمتى الزيت بيطلع بالضبط..

    إنما لو التسريب كبير.. هتلاقي الزيت بيطلع باستمرار.. وساعتها يبقى الموتور محتاج عمرة أو نص عمرة..




    ______


    إحنا قلنا إننا ممكن نستخدم زيت أثقل... هل ده له آثار جانبية؟؟



    الزيت التقيل مشكلته إنه بيعمل إعاقة نسبية لدوران الموتور ... الموضوع ممكن نشبهه بالفرق بين المية والعسل... جرب تجيب كوباية مية وكوباية عسل وحاول تحرك معلقة فيهم... المية أكيد أسهل بكتير


    ميزة الزيت الثقيل إنه حيعمل طبقة سميكة على الأجزاء اللي بيحصل فيها الاحتكاك وبكده حيقلل التآكل وعمر الموتور يطول... بس في المقابل استهلاك البنزين حيزيد شوية لإنك حتضطر تدوس بنزين زيادة عشان العربية تأدي نفس الأداء الأصلي


    الزيت الخفيف بالعكس.. حيديك أداء أحسن، بمعنى إنه حيساعد في السحب وحيوفر في البنزين... بس مش هيقدر يحمي الموتور كفاية لو حملت عليه... يعني تآكل الموتور حيزيد لو ما أخدتش بالك...

    يعني إيه مش هيحمي الموتور لو حملت عليه؟؟

    التحميل على الموتور معناه أي حمل كبير على الموتور.. زي الحالات دي:

    * القيادة مع وضع أوزان كبيرة في العربية أكتر من ثلثين الحمولة القصوى بتاعتها.. وأغلب العربيات بتبقى حمولتها القصوى في حدود 500 كيلوجرام... طبعا ده شامل أوزان الناس والشنط وأي حاجة تانية زيادة على وزن العربية الأصلي.



    * الشد والحرق على الموتور (رفع دوران الموتور قرب الخط الأحمر مع الضغط بشدة على دواسة الوقود).



    * صعود المناطق الجبلية أو المرتفعة .. والنزول منها.



    * قطر سيارات أو مقطورات




    في الحالات دي.. الزيت الخفيف غالبا مش هيوفر طبقة التزييت الكافية وبالتالي يحصل تآكل أزيد من اللازم...

    بس خلي بالك... لو كتالوج العربية بيوصي باستخدام لزوجة معينة يبقى لازم نلتزم بيها..

    في العربيات الحديثة مثلاً... الكتالوج ممكن يوصي بزيت لزوجته خفيفة زي 10w30... واضح إن الخلوصات في المواتير الحديثة ضيقة جدا ومحتاجة زيت لزوجته منخفضة عشان يقدر يوصل لكل أجزاء الموتور بسهولة.



    ولسه مكملين...


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  4. #4

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,829

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Lightbulb تطبيقات زيوت المحركات .. أنواع الإضافات المختلفة .. زيت الشنبر وزيت الفلش -

    من الأسئلة المتكررة...


    هو فيه زيوت للعربيات الإنجكشن غير العربيات الكربيراتير؟؟؟


    نظام حقن الوقود (كاربيراتير أو إنجكشن) مالوش أي علاقة بنظام التزييت نهائي، وبالتالي أي نوع زيت هتحطه في العربية مش هيفرق مع كون العربية كاربيراتير أو إنجكشن..

    إنما اللي بيفرق في العربيات الحديثة هو قيم الخلوص الصغيرة مابين الأجزاء المتحركة وسرعات دوران الموتور العالية ، اللي عايزة زيت له خصائص معينة عشان تزيت بكفاءة عالية.

    _______________

    طيب... هو إيه اللي يفرق الزيوت المخصصة لمواتير البنزين عن الزيوت المخصصة لمواتير الديزل؟؟؟؟
    وإيه حكاية الناس اللي بتحط زيت دلفاك في مواتير بنزين؟؟؟


    أولا: زيت دلفاك غالبا بيبقى أحادية الدرجة... يعني لزوجتها عايزة موتور شغال علطول.. مش بيقف.
    إنما فيه منها زيوت متعدد الدرجات وكمان زيوت تخليقية على فكرة




    ثانيا: لو زيت دلفاك مكتوب عليه رمز خدمة لمحركات الديزل والبنزين يبقى مفيهوش مشاكل ، إنما لو مكتوب عليه رمز الخدمة للديزل بس (يعني عليه حرف الـC، وحرف الـS مش موجود) في الحالة دي استخدام الزيت ده مش صح... وهأقولك ليه دلوقتي:


    * ميزة زيت موتور الديزل إنه فيه خصائص تنظيف عالية عشان تنظف الترسبات ومكونات الكربون اللي بتطلع في مواتير الزيت أكتر من مواتير البنزين، ومواد التنظيف دي (عادة بتبقى مواد معدنية زي الزنك) بتقلل من كفاءة التزييت، والحكاية دي بتظهر قوي في المواتير اللي بتعمل مشاوير قصيرة وما بتلحقش تسخن.

    * زيوت مواتير الديزل مش موجود منها زيوت خفيفة قوي، يعني مافيهاش زيت 0w30 مثلا، والزيوت دي ممكن تبقى مطلوبة في المواتير الحديثة عشان موضوع الخلوصات الضيقة اللي اتكلمنا عليه عشان الزيت يوصل لكل الأماكن الضيقة بسهولة، على عكس مواتير الديزل اللي المصممين بتوعها بياخدوا موضوع لزوجة الزيت ده في اعتبارهم ويعملوها بخلوصات أكبر شوية وحتى الرولمان بلي اللي بيركب بيكون أكبر شوية، ده غير إن سرعات دوران مواتير الديزل أبطأ من مواتير البنزين بشكل عام.

    * لو انت معاك عربية سبور وعايز تقرص على موتورك ... ابعد تماما عن أي زيت موتور ديزل، لإن موتورك هيودع قريب قوي نتيجة التآكل اللي هيحصل بسبب إن الزيت مش بيعمل طبقة لزجة كافية على الأجزاء المتحركة... لإنه ببساطة معمول عشان ينضف قبل ما يكون بيزيت... ده حتى ممكن مواد التنظيف تعمل تآكل على الشميز والسبايك بالذات لو كان الموتور ده نسبة الانضغاط فيه عالية (زي معظم المواتير الحديثة اللي عايزة بنزين 92 فما فوق) أو لو كان فيه تربو.

    * أي زيت بيستهلك وينقص مع الاستخدام، ومواد التنظيف المعدنية اللي في زيوت مواتير الديزل بتطلع مع العادم وممكن تسد علبة البيئة بتاعة الشكمان.


    لو عايز تسخدم الزيت ده لازم تعمل الآتي:
    1- تشغل عربيتك بصفة مستمرة من غير وقوف بقدر الإمكان
    2- تغير زيت بسرعة (كل 1000 أو 2000 كم بالكتير)
    3- ما تقرصش على الموتور (ما تعليش الـRPM عن 3000)

    مش هقولك انت عربيتك قديمة ومش هتفرق معاك الخلوصات والكلام ده... بس احسبها وشوف الكلام ده يمشي معاك ماديا ومعنويا ولا لأ

    _________________


    بنسمع كتير عن إضافات الزيوت.. هو إيه حكايتها؟


    السوق مليان شركات بتنزل إضافات للزيوت.. وأغلب الشركات دي بتعمل إضافات بس... وبعض شركات الزيوت غير المشهورة بتنزل إضافات بردو..


    في الحقيقة ... صعب جدا تعرف مكونات الإضافات دي إيه... والمعلومات المتوفرة على الإنترنت في الموضوع ده قليلة قوي.

    المعلومات اللي قدرت أوصلها عن الإضافات ملخصها حاجة واحدة

    ما تشتريش إضافات للزيوت

    لإنها ... يا إما مالهاش تأثير ... يا إما ليها تأثير مدمر


    إزاي؟؟؟؟ وكل الكلام ده إيه؟؟؟

    اختراع الإضافات كان له فايدة كبيرة زمان لإن تكنولوجيا الزيوت كانت متأخرة نوعا ما. والإضافات كانت فعلا بتعمل شغل...

    دلوقتي الزيوت بقت أحسن بكتير... أُمال إيه لزمة كود الخدمة بتاع الـAPI والـACEA والأكواد التانية دي كلها؟؟؟




    الإضافات في السوق أحد أربع أنواع من ناحية المكونات:

    1- إضافات مغشوشة... ودي طبعا مش أكتر من مجرد زيت عادي ممكن يكون مضاف إليه لون أو رائحة أو أي شيء ليس له علاقة بتحسين الأداء


    2- إضافات أساسها مادة الـPTFE أو المعروفة تجاريا بـ"التفلون"، ودي المادة الأساسية في أواني "تيفال" المشهورة... ودي مشكلتها الأساسية إنها ممكن تعمل حماية فعلا على الأجزاء المتحركة... بس غالبا بتعمل سدد في مجاري الزيت الضيقة وكمان ممكن تسد فلتر الزيت


    3- إضافات أساسها مادة من أحد مركبات فوسفات الزنك (داي.ألكايل.داي.ثيو.فوسفات الزنك Zinc dialkyldithiophosphate)
    ودي بردو ممكن تكون مفيدة جدا وبتعمل حماية للأجزاء المعدنية بالذات لو المحرك تعرض لأحمال قوية جدا... زي السباق أو جر أوزان ثقيلة مثلا

    طيب ده حاجة كويسة جدا... إيه المشكلة بقى؟؟؟

    المشكلة إن مركب فوسفات الزنك ده موجود دلوقتي في كل الزيوت العادية تقريبا، ولو حبيت تزود الفايدة وتحط إضافة... المركب (الزيادة) ده هيخرج مع الزيت المستهلك في السلندر ويبقى سبب رئيسي في سدد علبة البيئة بتاعة الشكمان

    يعني من الآخر: الشيء اللي يزيد عن حده بينقلب ضده


    4- إضافات أساسها مواد مذيبة ومنظفة: غالبا مواد زي الكيروسين والنفتالين والأسيتون... ودي مهمتها إنها تذوب الرواسب من الأجزاء المتحركة... زي فكرة زيت الديزل أساسا.

    فكرة إزالة الرواسب ماهياش فكرة سيئة... إنما إضافة المواد المذيبة ممكن تكون زيادة عن الحد لإنك ما تعرفش تحط منها قد إيه... يعني حطيت كفاية ولا بزيادة؟؟؟ وزي ما قلنا.. حطيت بزيادة يبقى بتعمل تآكل زايد في المحرك.


    ولو فكرت تشتري الإضافات دي... فالمؤكد إنك لازم تجيب الإضافة من نفس ماركة الزيت اللي حضرتك حطيته....


    ليه؟؟


    المشكلة الكبيرة إنك ممكن تشتري إضافى زيت وتحطها مع زيت يكون فيه نوع إضافات تاني.. فيتفاعلوا مع بعض... وهنا ممكن تحصل أي حاجة من دول:



    1- تأثير الإضافة اللي في الزيت يختفي وتأثير الإضافة اللي حضرتك حطيتها يختفي.. وكده تبقى حطيت زيت أساسي عمره قصير وما بيديش حماية للموتور

    2- يتكون مركب جديد له آثار مختلفة ( عادة بتبقى وحشة ).. زي سدد في الفلتر أو مجاري الزيت أو حتى سدد في علبة البيئة.

    3- زيادة نسبة الإضافات من نفس النوع.. وده في الحقيقة ما لوش أي تأثير إيجابي ﻹن الإضافات ليها نسبة تركيز بتدي فيها أعلى كفاءة.. واللي غالبا بتبقى موجودة أصلا في الزيت اللي حضرتك شاريه.


    بعد المعلومات اللي فوق دي... قوللي انت كده... رأيك إيه؟؟؟


    من الآخر... أغلب الإضافات اللي فوق موجودة أساسا في الزيوت العادية... والإضافات دي كانت كويسة مع الزيوت القديمة من 50-60 سنة... إنما دلوقتي... كل الزيوت عليها إضافات كافية تغنيك عن أي مغامرة ما تعرفش نتايجها.

    ______________________



    كتير بنسمع عن زيت الشمبر .. إيه هو وبيعمل إيه؟؟؟


    المعروف عن زيت الشمبر إنه بيتحط لما يبدأ يحصل تسريب في الضغط جوه السلندرات نتيجة التآكل في السلندر نفسه أو في حلقات البستم "الشنابر".. والزيت ده بيقولوا إنه بيمنع التسريب بشكل أو بآخر وتتم إضافته لكل غيار زيت.. وبيعتبروه علاج مؤقت لحد ما تعمل عمرة للموتور.

    بس حقيقة زيت الشمبر إنه عبارة عن إضافات تضاف إلى زيت المحرك... اسمها بالإنجليزي "Oil Treatment" أو "علاج للزيت"






    هدف الإضافة دي هو زيادة "ثبات القص" في الزيت Shear Stability.. و"القص" ده هو فعليا الحاجة المسؤولة عن لزوجة الزيت...


    معنى الكلام ده إن زيت الشنبر بيزود اللزوجة؟؟؟


    فعلا... وزيادة اللزوجة ممكن يكون ليها فايدة في منع التسريب وزيادة الحماية على الأجزاء اللي بيحصل عليها ضغط كبير.. بالإضافة إلى تقليل الضوضاء.. لإنها بتبقى عاملة زي المرتبة اللي بتمتص الصدمات..


    كده طبعا هيبقى الاستنتاج المبدئي يقول: "طيب دي حاجة كويسة جدا"


    إنما الحقيقة .. ﻷ .. لإن اللزوجة العالية ليها عيوب بدون شك...

    باختصار .. اللزوجة العالية زيادة عن اللزوم هتخلي انسيابية الزيت أبطأ بكتير من المطلوب.. يعني التزييت هيقل جامد جدا في بداية التشغيل.. وكمان ممكن جدا ما يوصلش لبعض الأماكن الضيقة جدا... ده غير زيادة استهلاك البنزين (اللي هي أصلا زايدة علشان الموتور مفوت).

    يعني ممكن الموتور يبوظ زيادة أثناء استخدامه !!



    زي ما حضرتك شايف... زيت الشمبر بقى عبارة عن اشتغالة علشان تعدي من اختبارات المرور أو علشان تستريح نفسيا إن عربيتك مش بتدخن من الشكمان.

    والأحسن إنك تصلح موتورك بدل ما تصرف فلوسك في حاجة وهمية بغرض الراحة النفسية.

    ______________________


    سمعنا كمان عن زيت الفلش... إيه فايدته؟؟؟


    زيت الفلش Flush Oil أو Motor Flush هو أحد مادة زيتية بتضاف على الزيت القديم لتنظيف الموتور من الترسبات بكافة أنواعها..

    بيتكون أساسا من مواد مذيبة .. ومواد تنظيف.



    لو حضرتك بتغير الزيت في مواعيده.. فاستخدام الـEngine Flush ضرره أكتر كتير من نفعه.

    الفلش بيستخدم لإزالة الرواسب من المواتير اللي حصل فيها تكون لرواسب طينية (Sludge) ..

    حاجة زي كده:





    ودي غالبا بتحصل مع الناس اللي بتسيب الزيت في الموتور وما بتغيروش.. (بعض الناس في أمريكا مش بتغير زيت.. يادوب بيزودوا اللي بينقص وخلاص.. دي أكتر ناس بيحصل معاها المشاكل دي).


    عموما.. تقدر تعرف لو موتورك محتاج فلش ولا لأ بمجرد النظر...

    افتح غطا تزويد الزيت وبص على الأجزاء الداخلية اللي تقدر تشوفها.. لو لقيت منظر زي ده... تبقى محتاج فلش




    أو ببساطة روح لأي ميكانيكي وخليه يشيل غطا التاكيهات..

    لو موتورك شكله كده... يبقى موتورك زي الفل ومش محتاج أي حاجة:


    أو كده



    أو حتى كده




    ده الفرق باختصار:




    أغلب السيارات الحديثة بتمنع استخدام زيوت الفلش في مواتيرها... وأنا كمان ما أنصحش بيه إلى في حالات وجود رواسب طينية فقط...

    غير كده... خلي موتورك سليم زي ما هو.

    لإن استخدام الفلش بدون داعي بيعمل تآكل في الموتور في الأجزاء المتحركة بالذات... خصوصا إذا تم استخدامه بطريقة خاطئة...

    وأغلب المواتير اللي استخدمته بدون داعي بدأ الزيت ينقص فيها والموتور أصبح خفيف.

    مالوش داعي.


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  5. #5

    الصورة الرمزية lanos2004

    رقم العضوية : 119672

    تاريخ التسجيل : 27Jan2012

    المشاركات : 6,806

    النوع : ذكر

    الاقامة : النزهه الجديدة

    السيارة: اتباعت

    السيارة[2]: lanos 1.5 16 v

    دراجة بخارية: لا يوجد

    الحالة : lanos2004 غير متواجد حالياً

    افتراضي -

    شكرا لك


  6. #6

    الصورة الرمزية sherif moneer

    رقم العضوية : 127979

    تاريخ التسجيل : 24Jul2012

    المشاركات : 899

    النوع : ذكر

    الاقامة : المنصوره

    السيارة: لا يوجد

    السيارة[2]: فيكترا

    دراجة بخارية: لا يوجد

    الحالة : sherif moneer غير متواجد حالياً

    افتراضي -

    تسلم ايدك يا باشا


  7. #7

    الصورة الرمزية egyption2012

    رقم العضوية : 131094

    تاريخ التسجيل : 08Nov2012

    المشاركات : 737

    النوع : ذكر

    الاقامة : الاسكندرية

    السيارة: -

    السيارة[2]: -

    الحالة : egyption2012 غير متواجد حالياً

    افتراضي -

    في البداية جزاك الله خيرا على جهدك القيم
    وسؤالي هل الزيوت تؤثر على سحب السيارة او نعومتها ؟
    اذا كان الجواب نعم .. فأي درجة لزوجة تؤدي لتحسين السحب وزيادة نعومة السيارة


  8. #8

    الصورة الرمزية dr.hazem

    رقم العضوية : 68443

    تاريخ التسجيل : 20Apr2010

    المشاركات : 7,562

    النوع : ذكر

    الاقامة : الأردن

    السيارة: chery QQ3

    السيارة[2]: suzuki maruti

    دراجة بخارية: suzuki 2002

    الحالة : dr.hazem غير متواجد حالياً

    افتراضي -

    موضوع جميل ومفيد ومبسط يا بشمهندس...
    تحياتي ليك...
    نسيت اقول ان بنزين 80 كمان خالي من الرصاص...
    :-)

    Sent from my SE Arc S using Forum Runner

    don't judge a car unless you have driven it

    hm414 سابقا


  9. #9

    الصورة الرمزية ahmad_salama

    رقم العضوية : 105763

    تاريخ التسجيل : 29Jun2011

    المشاركات : 489

    النوع : ذكر

    الاقامة : cairo

    السيارة: Daewoo Nubira I 1997

    السيارة[2]: Seat Ibiza 1994

    دراجة بخارية: لايوجد

    الحالة : ahmad_salama غير متواجد حالياً

    افتراضي -

    هاااااااااايل جدااا. انا استفدت جدا من الموضوع ده. جزاك الله خيراا كثيرا


  10. #10

    الصورة الرمزية haitham2011

    رقم العضوية : 111618

    تاريخ التسجيل : 28Aug2011

    المشاركات : 970

    النوع : ذكر

    الاقامة : EGYPT - PORTSAID

    السيارة: OPEL VECTRA 1.4 92 GLS

    السيارة[2]: OPEL KADETT 1.4 I GL 91

    دراجة بخارية: لأ

    الحالة : haitham2011 غير متواجد حالياً

    افتراضي -

    تسلم يا باشا و شكرا عالافاده و مجهود اكتر من رائع



 
صفحة 1 من 77 1 2 3 4 5 6 11 51 ... الأخيرةالأخيرة

المواضيع المتشابهه

  1. مواصفات زيوت المحركات
    بواسطة MMamdouh في المنتدى زيوت المحرك
    مشاركات: 12
    آخر مشاركة: 20-03-2012, 01:40 AM
  2. زيوت المحركات
    بواسطة ls1090 في المنتدى زيوت المحرك
    مشاركات: 8
    آخر مشاركة: 23-11-2011, 12:09 PM
  3. ما هو الافضل فى زيوت المحركات
    بواسطة goldyn في المنتدى زيوت المحرك
    مشاركات: 12
    آخر مشاركة: 08-10-2011, 03:13 AM
  4. سؤال عن زيوت المحركات
    بواسطة wkisho2005 في المنتدى زيوت المحرك
    مشاركات: 11
    آخر مشاركة: 24-10-2009, 09:05 PM
  5. أسعار زيوت المحركات في مصر والخليج (مقارنة)
    بواسطة PAYOO في المنتدى زيوت المحرك
    مشاركات: 16
    آخر مشاركة: 18-09-2007, 07:29 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2