الموضوع: ليه تلحم الشكمان لما ممكن تربطه ( فكرة لتركيب مواسير الشكمان )

بسم الله الرحمن الرحيم
السلام عليكم و رحمة الله و بركاته

البداية اني بفكر في تعديل بسيط في الاكزوست سيستم عندي بس غالبا هترسي ع علبة شكمان بس او اللي بيتقال عليه ديفل
لكن الحاجة اللي فكرت فيها و كانت مجنناني مش النوع و لا هركب ايه لكن اللحام لأن هنقطع و بعدين نلحم المواسير او الماسورة بالعلبة و لو حبيت اشيل اللي عدلته هضطر اروح افك اللحام و وجع دماغ و ممكن ياكل في المواسير و قرف الصنايعية في اللحام يخرب حاجة كده او حاجة كده
و هنا جاتلي الفكرة اللي طبقتها ع مواسير الومنيوم عادية و نجحت و لا فيه تنفيس و لا حتي تقدر تفكهم من بعض مهما ترزعهم تشد تخبطهم كأنهم حتة واحدة

معرفش اذا كان حد جربها و لا لأ قبل كده لكن اللي اعرفه اني ان شاء الله هعملها
و هي اني بدل ما يتم لحام الماسورة بالعلبة لأ يتم تركيبهم عاشق و معشوق و بعدين ربطهم بأفيس حديد طب ازاي

هنا الصور هتوضح وجهة نظري

اولا ده شكل الافيس اللي هنعمله عند اي خراط او حداد و هو مكون من قطعة ع شكل حرف n و قطعة تقفل ع المواسير و مسمارين من النضيف و تحتيهم وردتين بشرط ان يكون السمك كبيير شوية لكن طبعا مع مراعاة ان مقاس النص دايرة يكون ع اد المواسير اللي هيركب عليها



ثانيا ده شكل التركيب اللي اقصده زي ما ملاحظين سواء قطر العلبة اكبر شوية من الماسورة او العكس او الماسورتين و متعشقيين و الافيس يتركب عليهم
و تخلوا بالكم من المقاسات لازم يدخلوا زنق بالعافية و تبذل جهد كمان عشان يدخلوا زي ما بنقول بكونوا ع الشعرة




و بعدين يتم ربطهم بشدة ع المواسير حتي لو لقيت حد بيربط المسامير بالضغط للي ميعرفش عبارة عن حاجة عاملة زي الشنيور بيربط المسامير و ربطها بيكون شديد

و عشان كده قولت لازم يكون سُمك الافيس عريض شوية و الخراط يخرط القلاووظ بحيث يستحمل الضغط و تربطوا جامد اووي لحد ما تحس ان المواسير سنة و تتطبق

و تجرب تشد و تشوف هيفك و لا لأ و شوف فيه تنفيس و لا لأ
و انا جربت لكن مش ع شكمان العربية عندي و الموضوع نجح

و بالتالي انت ارتحت من اللحام و قرفه و شكله
لأنك لو عايز تفكهم في اي لحظة هتفك عالطول بدون ما تقرف نفسك فك لحام و قص

و ممكن تعمل 4 نقط لحام حوالين المواسير كزيادة تأمين عشان لو قلقان ع الاقل هتكون بسيطة مش زي اللحام بشكل كامل

ها ايه رأيكم ؟؟