الموضوع: بسعر بين 25 الف الى 40 الف اشترى ايه ؟؟؟؟؟

فى الأول قولنا حضرتك عندك كام سنة, متزوج, عندك اولاد, هتسافر بيها, عدد ساعات استخدامك, هتستخدمها فى ايه, طريقة سواقتك؟؟؟؟

كل المعلومات دى هتفيدنا فى اننا نقدر نحدد نوع العربية اللى تناسبك لأن كل واحد هيقولك اشترى عربية زى اللى هو راكبها لأنها فى نظره احسن عربية واحسن اختيار

على فكرة انا معايا ابيزا بس مش هقولك اشترى ابيزا غير لما تجاوبنى على الاسئلة دى لأن جايز قوى متنفعكش

المشاركة الأصلية كتبت بواسطة heshamfathi

24 سنة و اعزب و مش بسافر غير قليل و حستخدمها كتير عشان حروح بيها الشغل و الكورسات وده حوالى 3 مرات فى اليوم و انا متعلم السواقة وطلعت الرخصة لكن ممشتش كتير مع الزحمة والترلات والمشاريع فتقدر تقول لسه مبتدئ

تمام قوى كده

يبقى انت محتاج عربية شبابى مش عائلية
الموتور ميكونش كبير
تكون هاتش باك
تكون باور وتكييف
قطع غيارها معمرة وصيانتها سهلة

تعالى نجيب كل الماركات مع بعض ونشوف ممكن نجيب ايه بالمبلغ ده وبالمواصفات دى:

1- سوزوكى ألتو (فيه منها تكييف وباور والموتور ال 1100 سى سى) موديل 2006
2- اسبيرانزا a113 موديل 2008 - 2009
3- فيات برافا موديل 2000 - 2001
4- سيتروين c3 موديل 2003
5- تويوتا ستارليت موديل 1994
6- اوبل كورسا موديل 1994 1200 سى سى
7- فولكس بولو موديل 1998 1000 سى سى
8- دايهاتسو سيريون موديل 2000
9- فورد فيستا موديل 1998
10- فيات بونتو موديل 2002
11- سيات ابيزا موديل 2000
12- فيات اونو موديل 2000
13- فورد كا موديل 2000
14- سكودا فابيا موديل 2000
15- دايهاتسو ميرا موديل 2000

انا كده توهتك اكتر :)

عموما انت تقدر تحكم على كل عربية بنفسك عن طريق انك تدخل القسم الخاص بيها وتشوف قطع غيارها المناسبة ليك

ولو احتاجت اى حاجة فى الفولكس او الابيزا انا تحت امرك

المشاركة الأصلية كتبت بواسطة heshamfathi

اولا الف شكرا على الرد والاهتمام
بس انا سمعت ان العربيات الهاتشباك بتبقى صعب بيعها شوية بعد كده
وبالنسبة لموضوع ان الموتور ميكونش كبير معناها ان يكون cc قليل ولا يكونىحجمه صغير؟؟؟؟؟؟

واخيرا بالنسبة لسيات ابيزأ انا نفسى اشتريها بس سمعت ان قطع غيارها غالية جدا فهل ده حقيقى؟؟؟؟ وكمان بالنسبة ﻷعربية نفسها هل هى عربية كويس ومريحة فى الاستخدام والصيانة؟؟؟؟؟

ما هى مشكلتنا كشعب اننا بنسمع اكتر ما بنشوف

اقولك على حاجة: انا اول ما وعيت على الدنيا كان معانا فيات 128 موديل 83 وبعدين قعدت معانا حوالى 21 سنة وبعدين جبنا لادا موديل 84 وكنت دايما اسئل الحاج الله يرحمه ليه منجبش عربية حديثة شوية موديل تسعينات انجيكشن وكده, كان يقولى لو باظت هتصلحها بكام وهتجيبلها قطع غيار منين ومين هيصلحهالك لكن اللادا اى حد بيصلحها وقطع غيارها عند البقال ببلاش

المهم انا بعد الحاج ما اتوفى انا بعت اللادا وجبت ابيزا 98

تخيل ان فيه بعض قطع الغيار فى الابيزا ارخص من اللادا وكمان معمرة اكتر وكمان بقيت بعمل حاجات فيها بأيدى

خلاصة الكلام: متسمعش كلام حد غير اللى معاه العربية اللى انت عايز تجيبها
يعنى شوف واحد صاحبك يكون معاه عربية من العربيات دى واسئله على قطع غيارها وجربها منه كمان

عموما انا كان قصدى موتور صغير يعنى cc قليل يعنى من 1000 الى 1400 سى سى

بالنسبة للأبيزا هى فى الاصل اسبانى لكن كل مكوناتها ألمانى لأنها تبع فولكس جروب, يعنى كأنك راكب عربية ألمانى بس بسعر مدعم لأنها ارخص من البولو مع ان قطع غيارها كلها بولو وصالونها زى صالون الجولف من حيث الوسع
طبعا العربيات الالمانى معرفة بالفخامة وجودة الخامات الداخلية والثبات على السرعات العالية والامان والاعتمادية وطوول العمر الافتراضى لقطعة الغيار والعربية نفسها

عموما دى شوية مواضيع لقطع الغيار

http://www.nilemotors.net/Nile/304855-a.html
http://www.nilemotors.net/Nile/177112-seat.html
http://www.nilemotors.net/Nile/177352-94-2010-a.html
http://www.nilemotors.net/Nile/341028-a.html