انا تحت امركم في أي استفسار، أو نصيحة تتعلق بأمراض القلب
د.هشام محمد سعيدة
دكتوراه القلب والاوعية
معهد القلب
ت: ٠١٢٢٤٧٢٢٥٠٥
Heshamsoaida@Hotmail.com
عرض للطباعة
انا تحت امركم في أي استفسار، أو نصيحة تتعلق بأمراض القلب
د.هشام محمد سعيدة
دكتوراه القلب والاوعية
معهد القلب
ت: ٠١٢٢٤٧٢٢٥٠٥
Heshamsoaida@Hotmail.com
سؤال تبع دوالى القدمين ممكن ؟
ربنا يكرمك :)
حضرتك الدوالى فى القدم موجودة من صغرى بس كانت عبارة عن عروق صغيرة الدكاترة كانت بتقولى مفيهاش مشكلة
زادت بقي وكبرت فى سن الجامعة واهملتها مرضتش اروح لاطباء يعنى
من فترة تابعت مع دكتور قالى الحل فى الشراب وزهقت منه بصراحة ودكتور تانى قالى دى مفيش منها ضرر , انت تعمل تمرينات صغيرة بس وانت قاعد ومتقفش على رجلك كتير .
السؤال حضرتك , هل فى علاج للدوالى لان منظرها بيتعب نفسيا ده غير ان الوقفة خاصة فى المترو يوميا بتتعبنى :)
شكرا.
اهلا بيك يا دكتور
سؤال خارج المقرر
انا عملت عمليه المراره بالمنظار
واتفرجت علي فيديوهات للعمليه ووجدت الجراح بيستخدم دباسه
السؤال
الدبابيس دي مش خطر علي الجسم بعد كد يعني لاقدر الله ممكن تعمل حاجه مش كويسه
والمفترض ان الجسم يرفض الاجسام الغربيه
ارجو التوضيح ولك جزيل الشكر
اسباب الدوالي كثيرة، منها العامل الوراثي، أو الوقوف مدد طويلة زي عسكري المرور مثلا..............
وأغلب حالات الدوالي بيكون الشكوى منها زي ماإنت قولت (منظرها مش حلو، أو عدم راحة في الساقيين، بدرجات متفاوتة)، بس مافيش مشاكل صحية من الدوالي تستدعي القلق.
العلاج:
- الشراب الطبي
- رفع القدم كلما استطعت، يعني مثلا وانت جالس على المكتب، أو بتتفرج على التليفزيون
- حاول عدم الوقوف كثيرا، المشي مش مشكلة
- تمارين رياضية للساقين
- عدم لبس بنطالونات ضيقة
- لو الوزن زيادة قلله
اما ياريس في الحالات الشديدة، زي الالام الشديدة، او التورم الشديد، او القرح، أو النزيف.................. العلاج الوحيد الفعال يبقى الجراحة، ودي عملياتها بسيطة ان شاء الله
اهلا بيك يا باشا هو سؤال خارج المقرر فعلا، بس سؤال حلو
الدبابيس الجراحية مافيش منها مشاكل مدام بتتحط صح
نادرا ممكن يحدث التهاب للجرح خلال شهر من المنظار والدبابيس ممكن تتحرك من مكانها، وممكن الدبابيس كمان تقع في الغشاء البريتوني اثناء المنظار، والدكتور مايعرفش يجيبها. المفترض والمعروف ان المادة المصنوعة منها الدبابيس لا تتفاعل مع الجسم، ولكن وجد في بعض الحالات النادرة، ان الدبابيس التي تقع في الغشاء البريتوني، سببت بعض المضاعفات.
دكتور هشام استفسار خاص بزوجتى هى اثناء الحمل اول مرة بدأت تحس بزيادة فى ضربات القلب ودوخة شديدة جدا احيانا تكاد تفقد الوعى وبعمل موجات صوتية على القلب تبين وجود ارتخاء بسيط فى الصمام الميترالى علما بانها لم تكن تشعر باى اعراض قبل الحمل
وبعد الولادة استمرت هذه الاعراض حتى انها لا تستطيع القيام بمجهود حتى حركات الصلاة نفسها تشعرها بالتعب وضيق التنفس وخاصة مع ارتفاع درجة حرارة الجو
سؤالى هل يوجد علاج معين يمكن اخذه لضبط ضربات القلب وهل لو حدث حمل مرة اخرى ستزيد هذه الاعراض
شكرا
نبتدي الموضوع من الاول
طبيعي في الحمل بيكون فيه زيادة في سرعة ضربات القلب ودوخة، بسبب تغيير في الهرمونات، وانخفاض بضغط الدم ودا طبعا غير زيادة سرعة ضربات القلب اللي بتحصل اثناء الولادة.
اما موضوع ارتخاء الصمام الميترالي، انا بصراحة مش مقتنع بيه، علشان غالبا مابيكونش فيه أي ارتخاء.
بالنسبة لأسئلة حضرتك، قبل ما أجاوبك، عايز المدام تعمل الاتي :
- تحليل هيموجلوبين بالدم، لإستبعاد الأنيميا
- متابعة ضغط الدم علشان نتأكد ان الضغط لا ينخفض
- عمل موجات صوتية تانية للإطمئنان على عضلة القلب
السلام عليكم ورحمة الله وبركاته
انا ععندي بنتي عندها حاليا سنه وسبع شهور ومولوده بثقبين واحد قفل وواحد لسه وهو 4.2 م وبتاخد لاسيكس وكابوتريل ومنتظمين مع الدكتور وموجات صوتيه باستمرار وقالي ممكن يقفل لوحدو بس ربنا ما اردش وسالت الدكتور علي عمليه وكده قالي لا ولسه في فرصه وامل كبير في ربنا بس البنت ضعيفه قوي ومعندهاش مناعه خالص وبترجع كتير من ساعة ماتولدت وصدرها بيقفل بالذات بالليل علي فترات انا قلقان جدا عليها ومش عارف اعمل ايه ارجوك دلني واسف علي الاطاله
ألف سلامة على بنت حضرتك
انا غايزك بس تطمئن ولا تقلق
حجم الثقب صغير وان شاء الله حيقل بالتدريج لغاية ما يقفل، وان شاء الله لما حجم الثقب يقل، أعراض احتقان الرئة حتختفي
يا ريت حضرتك تبعتلي صورة من تقرير الموجات الصوتية، أو تبعتلي الملخص النهائي ، علشان عايز اعرف بس مكان الثقب
متشكر جدا جدا علي اهتمام حضرتك بس انا مش خبره اوي ومعرفش ابعتهملك ازاي بس هسال وهحاول ابعتهم ومتشكر لاهتمامك مره تانيه
السلام عليكم يادكتور هشام بشكر حضرتك جدا علي زوقك واهتمامك بالرد السريع وربنا يجعله في ميزان حسناتك انا بعت لحضرتك اخر موجات بالتقرير بتاعها واللي قبل الاخيره كمان علي الايميل بتاع حضرتك بس مش عارف وصلو ولا لا وانا في انتظار الرد من حضرتك وشكرا
الصور وصلت كلها يا باشا
والحمد لله الموجات الصوتية زي ما توقعت
الثقب بين البطينين وهو ثقب صغير، والحمد لله مكانه من النوع اللي بيقفل، علشان فيه أماكن تانية الثقب مابيقفلش فيها.
الثقب بتاع بنت حضرتك ان شاء الله حيفضل يصغر بالتدريج لغاية ما البنت توصل تقريبا ٦ سنين.
يعني ممكن قوي قبل كدة يقفل.
لا تقلق من اعراض احتقان الرئة، اللي حتتقل بالتدريج، وان شاء الله حتختفي خلال سنتين لما الثقب يصغر، يعني حتي قبل ما يقفل.
تحب اكمل معاك في الاحتمالات؟
طيب لو الثقب ما قفلش تماما. حجمه مش حيكون ليه أي تأثير على القلب والبنت حتعيش حياة طبيعية.
حروح معاك أبعد من كدة علشان تطمن. طيب لأسوأ الاحتمالات لو الثقب بعد ٦ سنين ما قفلش وأثر علي القلب مع ان دا احتمال مستبعد جدا، عايز اقوللك ان الثقب دا بيتقفل دلوقتي بالقسطرة، مش لازم عملية.
انا بشكر حضرتك جدا جدا انت رفعت منروحي المعنويه اللي يباركلك ممكن اتاقل عليك في سوال كمان
البنت ضعيفه جدا جسمانيا وبتاكل بصعوبه وحللنا انيميا طلع عندها انيميا وبتاخد حديد +انها بتاخد اصلا كالسي كال وديفي ديروب عشان نقص كالسيوم حتي واضح في قورتها وطبعا زي ما قلت لحضرتك ترجيع كتير واسف للاطاله
بجانب المتابعة مع طبيب القلب، البنت محتاجة تتابع مع طبيب أطفال كويس علشان موضوع التغذية.
وان شاء الله كل المشاكل دي حتختفي زي ما قولتلك.
هى عملت موجات صوتية على القلب اثناء الحمل وكان التشخيص ارتخاء بسيط فى الصمام الميترالى ولم تظهر مشكلة فى عضلة القلب فهل ممكن يكون فيها مشكلة بعد مرور 5 سنين والاعراض مازالت مستمرة مع بذل اقل مجهود ومع الحر ولو اكلت اكلة دسمة بتحس بسرعة فى ضربات القلب وضيق فى التنفس
وشكرا لاهتمامك وسرعة اجابتك
جزاك الله خيراً
انا فهمت غلط ان المدام لسة والدة، مش من خمس سنين
بالنسبة لسؤال حضرتك، ممكن الحمل يكون سبب في ضعف عضلة القلب ودا بيظهر في اخر الحمل او أو خلال اسابيع بعد الولادة، و ٥٠٪ من الحالات بترجع طبيعي تاني، للحالات اللي مابترجعش طبيعي ممنوعة من الحمل تاني، أما الحالات اللي عضلة القلب بتستعيد كفائتها الطبيعية تاني معرضة لنفس الموضوع مع حمل اخر.
انا بقول مجرد معلومة ، مابقولش ان المدام عندها مشكلة في عضلة القلب .
فيه اسباب كثيرة لشكوي المدام زي:
- انيميا
- انخفاض ضغط الدم
- عدم انتظام ضربات القلب (كهربة القلب)
- أو مفيش حاجة خاااالص
السلام عليكم يا دكتور ربنا يجعل معلوماتك فى ميزان حساناتك ان شاء الله . نخش فى الموضوع انا حكيتى طويلة جدا جدا جدا وهبقى هحكيها لحضرتك فى القريب العاجل ان شاء الله بص يا دكتور انا شاب عندى 26 سنة وعملت ايكو على القلب بس عايز اعرف بالتفصيل الممل معلش هتعبك معايا اية هو e.g او fraction egiction اللى بيبقى نسبة مؤية دة هو عندى طلع 61% فهل دة كويس ولا نسبة ضئيلة معلش اصل الموضوع دة معقدنى بصراحة وممكن يا دكتور تقولى نمرت حضرتك لو مش هتعب حضرتك وشكرا على تعبك
ال ejection fraction هو حساب قوة انقباض القلب (نسبة الفرق بين حجم البطين الايسر في الانقباض، وفي الانبساط)، والطبيعي بيبتدي من 56٪، يعني حضرتك قوة انقباض عضلة القلب عندك طبيعية.
وممكن لو عملت الموجات الصوتية تاني عند دكتور تاني، أو حتي عند نفس الدكتور يطلعلك الرقم 70٪ مثلا، . عايز اقوللك ماتركزش في الارقام.
تليفوني انا كاتبه في اول صفحة في الموضوع وانا تحت امرك في اي استفسار تاني
د \ هشام
الوجع حاليا بقي فى منطقة خلف الركبة وشديد نوعا ما والعروق ظاهرة جدا
حضرتك انا محتاج كشف عند دكتور كبير , اعمل ايه ؟
الف سلامة علي حضرتك
انت محتاج تروح عند جراح أوعية دموية
ودا مش تخصصي، بس انا سألتلك مخصوص
انا جبتلك اسماء ثلاثة من أحسن جراحين الاوعية الدموية، وكلهم اساتذة في القصر العيني
1- ا.د/ محمد حسني، وعيادته في شارع مصدق
الاثنين التانيين اساتذة أصغر سنا، بس ميقلوش كفائة، واسعارهم ممكن تكون متهاودة شوية:
2- ا.د/ هشام مصطفى، وعيادته في ميدان الجيزة
3- ا.د/ احمد جمال، ومعرفش عيادته فين
وألف سلامة عليك مرة تانية وتبقى تطمنا