إزاي أزود وزن العربية عشان الثبات يزيد ؟

**r0xer** · 05-08-2008 06:06 PM

السلام عليكم

أنا عندي فكرة بالنسبة لسيارتي الفيرنا اللي خلاص أتدبست فيها بعد ما كنت تويوتاوي، و بصراحة العربية عزلها سيء جداً و وخفيفة ولكن التسارع بتاعها عاجبني و مكنتها عاجباني و شايف إنها ممكن تتظبت لو وزنها زاد شوية.

على فكرة الناس اللي بتقول إنها مش ثابتة و بتاع انا كنت واخد العربية على الطريق الدولي الزراعي 140-160 والثبات كان مقبول و الدركسيون مبيرعش ولا حاجة...لكن طبعا كنت حاسس إن العربية خفيفة جداً عشان كدا عايز أزود وزن العربية بحيث إن أكيد زيادة الوزن هتزيد الثبات .
أنا معايا من 4-6 االاف جنيه عشان أظبت أتزان العربية دي في السرعات العالية و عايز أعرف أفكاركم.. هل مثلا وضع إكصدامات و عتاب هيتقلو وزن العربية قد أيه؟ "كام كيلو يعني؟" و إزاي أزود وزن العربية مثلا 150 كيلو و هل دي زيادة معقولة ولا زيادة؟

و حاجة تانية..مش زيادة الوزن دي هتأثر على المساعدين؟ هل هما كمان لازم يتغيرو؟

بإختصار...أيه الحاجات اللي لازم تتغير عشان نزود وزن العربية...وازاي نزود الوزن ؟

أفكار..إقتراحات..تجارب...كله مرحب بيه.

**ahmedfawzy14** · 05-08-2008 06:18 PM

عن تجربة جنوط اكبر

**r0xer** · 05-08-2008 06:23 PM

و من ثم؟ غير الجنوط؟ لإن أنا مش بدور على ثبات العربية..لا أنا عايز أزود وزنها لإن أصلا العبقري اللي عمل العربية دي حاطت مكنة أكبر من العربية! يعني المكنة دي أنا ممكن أجيب بيها 210 لو على عربية محترمة رغم إن العداد في الفيرنا 200!! لكن دا لإن العربية أضعف من الموتور و عشان كدا بدور على حاجة تزود الوزن و متضرش المساعدين و باقي أجزاء السيارة.....أو حتى تغيير تلك الأجزاء بأجزاء أخرى .

و شكرا لإقتراحك يا أستاذ أحمد.

**noble911** · 05-08-2008 06:27 PM

زود الايروداينامكس بتاعتها
اهم حاجة اسبويلر
او بادي كيت كاملة يكون احسن

و ممكن تغير في الكاونش بس معنديش معلومات كفاية في النقطة دي من حيث الاطار الافضل و مقاسه للفيرنا

**Ahmed Anwer** · 05-08-2008 06:31 PM

يا بااشا بلاش الكلام ده

اخف عربيات و اعلاها قوة ،، هيا السيارات الرياضية

و مع ذلك اعلاها في الثبات

و اتقل عربيات ال Suv

و مع ذلك أسوأها في الثبات ،،

الوزن مش العامل الأساسي ،،

الموضوع ليها علاقة بالتصميم و الهندسة مش حكاية وزن و الكلام ده بس

و بعدين هتزود الوزن ازاي ؟؟ و بأي طريقة طب مانتا لو راكب معاك اربعة ركاب مثلآ

هيكون وزنهم 320 كم مثلآ ،، هل ده بيزيد الثبات ؟؟

جرب الأول الجنوط 14 و شوف

اكتر من 14 علي كلام اشرفكو بتاع الجنوط هيخلي العربية تخبط و هترجع تغيرهم تاني

**tutankhamoun** · 05-08-2008 06:52 PM

الوزن لوحده مش هايعمل حاجة ( الشيروكي ما هي تقيلة ) هل متزنة على السرعات العالية ؟؟؟؟
الوزن جزء من منظومة متكاملة
يعني
** قاعدة عجلات عريضة ( لن تستطيع اللعب فيها )
** كاوتشات أعرض ( و ده هايأثر على قراية العداد لو مجبتش كاوتش مناسب لمقاس الكاوتش الأصلي ) و طبعا لو زودت المقاس و العرض بتاع الكاوتش لازم سمك الكاوتش يقل مما يضر العفشة و السيارة عموما
** عفشة رياضية ناشفة علشان تثبت العربية شوية
** نظام ديناميكي متكامل
عتب جانبي عريض لتقليل كمية الهواء الداخلة أسفل السيارة مما يزيد الثبات و لكنه له تأثير سلبي في المطبات المصرية الأصيلة
** أسبويلر رياضي

-------------------------------------
أولا نصيحة لوجه الله
بلاش لعب في العربية ( سيبها فبريكة أحسن )
ثانيا السرعة ليس لها أي لزمة
بسبب عدم وجود أمان نهائي عند القيادة السريعة
و بسبب إستهلاك وقود أكثر
و بسبب إستهلاك محرك السيارة بسرعة أكبر
و بسبب أن ترجع سالما إلى بيتك و أسرتك الذي يخافون عليك
و شكرا

**fahd_628** · 05-08-2008 07:01 PM

رأى انك تكبر الجنوط ( 16 مثلا ) بس لازم تغير العفشة بعفشة سبور بس الموضوع دة مكلف

موضوع تزويد وزن العربية دة حيقلل التسارع و حيزود استهلاك البنزين و حيوطى العربية و حيبقى حمل على الموتور

**شاهين - بنز** · 05-08-2008 07:05 PM

هو حضرتك ممكن تجيب نص طن حديد ،الطن دلوقتي ب 8 الاف يعني النص ب 4 الاف معقول اوي بس لازم توزع اماكنهم كويس في العربية و ممكن كمان سبويلر عالي

**شاهين - بنز** · 05-08-2008 07:44 PM

على فكرة انا بهزر
الناس بتحارب عشان تخفف وزن العربية وحضرتك عايز تتقلها.
الحل مساعدين كوني و سوست سبور

**KareemSafwat** · 05-08-2008 08:03 PM

كل الكلام ده صح بس صعب و مكلف و مش هيفرء كتير, أهم حاجتين عن تجربة, الجنوط و السوست.
1-هتجيب طقم جنوط 15 أو 16 و طبعا لازم عرض الكوتش و ارتفاعه يكون محسوب علشان تفضل قراءة العداد زي ماهيه و ممكن تبعتلي الكوتش عندك مقاس كام و أحسبلك المقاس اللي ممكن يركب عندك. التكلفه حوالي 4000 - 4500 جنيه.
2- طقم سوست كوني ينشف العفشه و ينزل العربية 3 - 4 سم. 1000 - 1500 جنيه.

و جرب و إدعيلي :)