هوا استهلاك البنزين فى السى 4 عالى أوى كده ؟؟؟؟

**hamaka** · 19-03-2013 12:55 PM

يا جماعة أنا لسة جايب العربية جديد فا مش عارف ، هى 2007 عاملة 88 ألف كيلو أوتوماتيك ، حاسس ان استهلاكها عالى جداً ، أنا فولتها أول ماستلمتها من بنزينة موبيل (يعنى لضمان الجودة) بنزين 92 ، هى التانك بتاعها 60 لتر و فى العداد 12 شرطة للبنزين ، يعنى المفروض ان الشرطة ب 5 لتر ، مشيت 50 كيلو بعد ما صفرت عداد الكيلو بتاع الرحلات الشرطة الأولى نزلت بعد حوالى 25 كيلو و خلصت مشوارى على 48.5 كيلو و لسة الشرطة اللى بعدها مانزلتش ، تانى يوم و أنا بسخن الصبح قبل مأطلع الشرطة التانية نزلت قبل حتى ماتحرك ، علماً بأنى ماشغلتش تكييف و مافتحتيش السبورت مود خالص ، و هى على شاشة البيانات بتقرا استهلاك بين 5 لتر لكل 100 كيلو لحد 15 لتر لو عامل كيك داون أو لو بجرى (ماعديتش ال 100 كيلو طول المشوار اللى عملته عشان اليوم كان زحمة جداً و كله حوادث و ناس خابطين بعض) هل دا الطبيعى بتاعها ولا كدة فى مشكلة ؟؟؟

**rahieb_100** · 19-03-2013 02:56 PM

عايز تتأكد اعمل التجربة الشهيرة
فول من بنزينة واخرج امشى 100 كيلو وارجع فول من نفس البنزينة وشوف استهلكت قد ايه؟
المؤشر ممكن يكون مش مظبوط قوى
عموما ستروين مش بتاكل بنزين

**hamaka** · 19-03-2013 03:15 PM

ربنا يسهل ، كده كده ان شاء الله بكرة هجيب ال 100 كيلو ، و أنا راجع هعدى على البنزينة و أفول و أشوف العربية هتاخد كام لتر لحد رقبة التانك

**Mohab.Nabil** · 19-03-2013 06:02 PM

الطبيعى بتاع العربية معايا و انا مشوارى كله زحمة ( شارع الهرم ) و الجامعة زحمة جدا

الـ 60 لتر بيعملوا متوسط 550 كيلو .. بس انا عربيتى مانيوال

**hamaka** · 19-03-2013 07:00 PM

المشاركة الأصلية كتبت بواسطة mohab.nabil

الطبيعى بتاع العربية معايا و انا مشوارى كله زحمة ( شارع الهرم ) و الجامعة زحمة جدا

الـ 60 لتر بيعملوا متوسط 550 كيلو .. بس انا عربيتى مانيوال

طب يا باشا انت طبيعة مشيك عاملة ازاى؟ يعنى بتحرق كتير ، بتجرى جامد لما الطريق يسمح ، بتشغل تكييف ؟؟؟ ولا دا أقل استهلاك ممكن بالنسبة لك ؟؟؟

**Mohab.Nabil** · 19-03-2013 08:11 PM

المشاركة الأصلية كتبت بواسطة hamaka

طب يا باشا انت طبيعة مشيك عاملة ازاى؟ يعنى بتحرق كتير ، بتجرى جامد لما الطريق يسمح ، بتشغل تكييف ؟؟؟ ولا دا أقل استهلاك ممكن بالنسبة لك ؟؟؟

لا دا اقل استهلاك ممكن مش بحرق الا نادرا .. الفكرة كلها ان متوسط سرعتى اصلا 12.6 كم/ساعة و على طول ماشى اول تانى قليل لما بمشى فى طريق مفتوح

**hamaka** · 19-03-2013 08:55 PM

طيب انت كده استهلاكك تقريباً 11 لتر لكل 100 كيلو علماً انك دايماً ماشى فى زحمة و دا بيحرق أكتر ، أنا استهلاكى فى ال 50 كيلو اللى عملتهم 10 لتر (و أنا كمان مش حاسب الشوية اللى فى أول التانك لأنى مفول للاخر خالص) يعنى بمعدل 20 لتر لكل 100 كيلو و نص المسافة تقريباً مشيتها فى طريق مفتوح ، أنا كده تقريباً زيك مرتين يمكن أكتر سنة كمان ، معتقدش ان الأوتو فى العربية دى قد المانيوال مرتين فى البنزين ، الغريب انى كاشف عليها فى التوكيل قبل ماخدها و قالو كل حاجة تخص البنزين تمام فى تقريرهم علماً بأنهم فحصوها كويس قوى و طلعوا كل حاجة صاحبها كان قايل عليها و حاجتين زيادة كمان

**A.Adel** · 20-03-2013 01:18 PM

اعمل restart لل عداد

من الزرار اللي في دراع المساحات , هتجيب average fuel consumption

افضل دايس على الزرار لحد ما الرقم يتصفر

بعد كده العربية هتبدأ تتعود على طريقتك في السواقة
استنى لحد ماتمشي 100-200 كيلو كده وقولي إيه الأخبار

**rahieb_100** · 20-03-2013 01:48 PM

بص يا باشا انا كنت فى الاكسارا بعمل الاتى
بروح افول العربية وامشى بيها فى مشاويرى الطبيعية (زحمة-تكييف- مشى طبيعى على حسب الطريق) وكانت حوالى 25 كم فى اليوم
وراجع افول العربية تانى لما المؤشر يبقى عند الربع واحسب بقى عدد الكيلومتر واشوف الاستهلاك واطلع متوسط
وكان بيبقى بين 200 ل 220 كم فى الصفيحة يعنى 10 ~ 11 كم لكل 1 لتر
وكانت العربية مانيوال ومفيش سفر ولا طرق سريعة
انت صحيح اوتو بس 5 كم لكل 1 لتر ده كتير

**waled_adel** · 20-03-2013 03:06 PM

السلام عليكم

انا معايا c4 2006 ستيب ترونك وطريقى اغلبه الدائرى وبيكون جزئ كبير منه ماشى كويس

يعنى تقريبا لحد 100 كم/س واوقات الزحمة المعتادة حسب الظروف

وحسبت الاستهلاك بتاعها كان من غير تكيف ومن غير كيك دون او سبورت مود (وبكون لوحدى) حوالى 10.5 لتر / 100 كم

ولو بالتكيف بيكون حوالى من 7.0 ل 8.0 لتر / 100 كم على حسب السرعة

ملحوظة مهمه جدا

حساب استهلاك البنزين بيختلف تماما باختلاف الوزن داخل العربية وكمان بضغط العجل لان الوزن كل مايزيد

الاستهلاك بيزيد وكل مايكون ضغط العجل اقل بيزيد مساحة احتكاك الكاوتش بالارض وبيعلى المقاومة

بس حتى لو بتعمل كل اللى فى الملحوظة دى المفروض متوصلش العربية للاستهلاك اللى انت بتتكلم عنه انا حسه كتير جدا

ان شاء الله ربنا يوفقك لحل الموضوع ومتنساش تقولنا على الحل او المشكلة فين علشان الكل يستفاد