عرض للطباعة
حد من الساده الأعضاء عنده تجربه مع مركز العدوي لصيانه رينو ؟؟
أنا معاد صيانتي قرب ودي أول صيانه ليا..... أروحله ولا لاء ؟؟
كمان كام سؤاال كده معلش
أنا دلوقتي عامل 4135 كيلو
ممكن أطلب صيانه ال 5000 دلوقتي ولا مينفعش ؟؟
لسه بيدوا الدواسات الأصليه هديه ولا لاء ؟؟ وبيدوها في صيانه الكام ؟؟؟
اللي شغالين عند العدوي للأسف مجموعة شباب صغير السن ، قليل الخبرة ، جربتهم في مشكلة صغيرة خاصة بتكييف السيارة ميجان 2 ، التكييف تبريده كان أي كلام ، رحت 3 مرات وكل مرة دفعت مبلغ محترم بدون فايدة
أول مرة قالولي عاوز شحن ، شحنت بالسعر السياحي ، روحت والتكييف زي ماهوه
تاني مرة قالولي ماسورة التكييف بتسرب ، نغيرها؟ قلت ماشي ، طبعاالماسورة والمصنعية بالسعر السياحي دفعت وروحت والتكييف زي ماهوة ،
تالت مرة قعدت معاهم من الساعة 9 صباحا للمغرب وهما مش عارفين حاجة ، لغاية ما جه المهندس خالد صاحب المركز وقاللي المروحة بها عيب ، وهنغيرها ، قلتله بكام قاللي 2000 جنيه ، قلت له يفتح الله لعدة أسباب :
السبب الاول ان التشخيص في المرة الاولى والتانية كان غلط ، وانا اللي اتحملت التكاليف ، ومن المحتمل أن يكون التشخيص هذه المرة غلط برضه
السبب التاني انهم كل مرة يحاولوا يقنعوك ان كل شيء تمام ، وساعة ما أخرج من عندهم الاقي مفيش أي تقدم سوى اني دفعت مبلغ سمين
السبب التالت اكتشفت ان تمن تصليح تكييف العربية هيزيد عن تكاليف تكييف شقة سكنية وبرضه مش مضمون
السبب الرابع اني شفت العيال اللي بتشتغل لقيتهم كلهم شوية تلامذة لا تصلح للتعامل مع سيارة حديثة
انا كنت اتعاملت معاهم زمان في 2006 ومعجبنيش شغلهم بتاتا بحس انهم بيجربوا ومش فاهمين حاجة , معرفش ايه اخبارهم دلوقتي ..
أنا روحت امبارح مركز العدوي قلت أجرب وأهو صيانه ال5000 مش هتبقي فارقه أوي يعني بس قلت نشوف
بصراحه مستوي محترم جدا واستقبال وشغل مشرف
أنا رحت الساعه 10ونص وقابلني مهندس الاستقبال شاب محترم جدا وقالي قول كل اللي في نفسك . انطلقت بقي بعد ما كنت خايف أقول علي مشاكل هايفه ليستهيفني ولا حاجه لقيتني بقول كل حاجه حتي لو هايفه
أنا كنت مشيت علي حفره في طريق المنصوره دمياط الجديده ومن بعديها العربيه مش مظبوطه في المطبات . قالي هنكتب صوت خربطه علشان يهتموا أكتر بالموضوع ده ويطلعوا يجربوها وفعلا بعد ما خلصوا قالي العربيه تمام والعفشه كانت عاوزه تتربط شويه وطلعوا جربوها لوحدهم وطلعت تمام الحمد لله
الكشاف الشمال كان حادف شمال شويه اتظبط الحمد لله
التسجيل كان بيهنج ساعات . أنا قلت السي دي وحش بس قلتله علي الحركه دي برده قالي احنا حطينا كود الكاسيت تاني وظبطناه ومعدش هيهنج تاني ان شاء الله وأداني الكود معايا وقالي احطه ازاي
دواسات الفرامل والبنزين اتشدوا
الكراسي كانت بتلق شويه بعد أما عملت فرش جلد . ظبطوها
الجوان بتاع الباب اليمين اللي ورا كان خلع ظبطوه
ساعات رمز الفتيس كان بيختفي من علي الشاشه . نضفوا بليه الفتيس
غسلوا المكنه بالجاز والفوم دي كان زياده ب 40 جنيه بس بصراحه المكنه أكنها عربيه زيرو لسه
غسلوا العربيه بره وجوه
زودوا جميع سوائل العربيه حتي أما جيت أنا امبارح بعد أما مشيت أزود بريل لسائل المساحات لقيتها علي أخرها
أداني جدول لصيانات رينو وأداني بيانات الفرع ومركز قطع الغيار
سألته علي الدواسات الأصليه قالي هي موجوده بس المشكله اننا مش عارفين نروح نجيبها لان الشركه بتقولي هتستلمها علي مسئوليتك الخاصه وطبعا الطريق مش أمان اليومين دول لكن أول ما هتوصل هنكلم حضرتك علي طول تيجي تستلمها
خلاصه الكلام العربيه رجعت زيرو تاني الحمد لله ب 40 جنيه بس وكنت طالع من المركز راكب العربيه خايف أكني لسه مستلمها من المعرض دلوقتي
موضوع الاكراميات دي جميل أوي انه حاطط ورق في كل المركز ممنوع الاكراميات ودي شال كتير من الحرج عني رغم اني أديت برده للي كان بيمسح العربيه بعد الغسيل وغسل الدواسات وكده بس في الخبائه كده
موضوع البانوراما ده برده جميل أوي انك تشوف كل حاجه بتحصل في العربيه أدامك
بصراحه أنا مبسوط من المركز وشايف الناس اللي كانت شغاله مش صغيره ولا حاجه زي ما قرأت هنا رغم صغر سن المهندسين بتوع الاستقبال لكن لما اتكلمت معاه في نقط خاصه بالرينو لقيته فاهم جدا وضع الرينو بالذات
ولقيت كل العربيات اللي جوه حوالي 7 عربيات تقريبا في اليوم ده كلهم رينو . معني كده ان ايديهم في الرينو كتير الحمد لله وده كويس
بس دي كانت تجربتي مع العدوي بعد أما كنت مقلق منهم جدا علشان اللي قرأته هنا بس الحمد لله طلعوا كويسين وعقبال صيانه ال 10000 ان شاء الله