تقييم عن كيا ريو ٢٠١٣ حتي صيانة الالف

**ahmed_doudi** · 19-03-2013 08:07 PM

السلام عليكم

انا عارف ان التقييم دة اكتب اكتر من مرة بس انا حبيت اشارك تجربتي معاكو يمكن تفيد حد

ان اشتريت العربية من حوالي شهر من سمير الريان هاي لاين خليجي هاتشباك بصمة

اول حاجة لاحظتها ان العربية ناعمة الي حد كبير اة مش زي نعومية التويوتا بس احسن كتير من المازدا و السيراتو القديمة
العربية خامتها كويسة جدا من الداخل وتقفيل التابلوة جيد يعني مبدئيا انشااللة مفيش تزيق و الكلام دة
مساحتها الداخلية مش بطالة يعني مش واسعة زي التيدا مثلا. بس دة مش عيب جوهري في رأي الشخصي
التابلوة اضاءتة جميلة و متناغمة واحلي من السراتو القديمة و فتحة السقف حجمها كبير و مع الزجاج الامامي العريض للريو بيخليك عندك احساس راءع خصوصا الصبح
العربية فيها كل انواع الاوبشنز الي ممكن تتخيلها و كلها حتي الان تعمل بكفاءة و استيجابتها سريعة
جربت التكييف مرة واحدة بس و كان كويس بس مش متاكد نظامة مع الحر الشديد
الفتيس مفيهوش اي نتشة خالصة نقلاتة ممتازة و في مواعيد جيدة والاحساس بالنقلة عادي زي معظم العربيات
العربية سحبها كويس قوي و ممكن تحس انها زيً ال ١٦٠٠ و دية ميزة قوية جدا
الثبات حتي سرعة ال ١٠٠ ممتاز بس بعد كدة ممكن تحس انة قل بس انا لسة ماجبتش فوق ال ١٤٠ علشان احكم فعلا
العربية علوها هايل عن الارض و محكتش في مطبات حتي الان مع اني عديت علي مطبات رذلة و دية حاجة مطلوبة جدا في مصر
حكاية استهلاك البنزين بقا : العربية تنكها مش كبير حوالي ٤٠ ليتر بس و دة بيخلي الناس تنخدع في استهلاك البنزين و كمان. البنزينة الي بتحط منها هتفرق معاك قوي علشان لو البنزين وحش فعلا بيطير بسرعة و انا جربت الموضوع دة بنفسي اكتر من مرة وكمان الشكوي من البنزين اليومين دول بقت كتير قوي و في عربيات كتير
علشان تعرف معدل استهلاكك الحقيقي ملكش دعوة بكمبوتر العربية و احسبها بالطريقة العادية وهتلاقي الريو معدلها طبيعي وخصوصا بالنسبة لكيا
ان متكلمتشً علي الشكل الخارجي لانة موضوع اذواق وكمان لان الريو محدش هايختلف علي شكلها وخصوصا بالجنط ال١٧ وهي كمان واخدة جايزة في التصميم الخارجي
شنطتها مش كبيرة يعني اقل من المتوسط بسنة

والنهاردة كنت بعمل صيانة الالف في كيا فرع روكسي ، روحت الساعة عاشرة و نصف ودخلت بعديها بساعة و نصف مع اني كنت حاجز بس الزحمة كانت جامدة واستلمت العربية الساعة ٢ والفاتورة كانت ٤٣٠ جنية ( تغير زيت و فلتر وكشف عام وتربيط عفشة و مصنعية )

الراي الشخصي المتواضع : ريو عربية ممتازة بالنسبة لفئتها وللاسعار الحالية و انصح اي حد بيفكر فيها انة يتوكل علي اللة و لو متردد يحاول يجربها في السواقة من اي حد يعرفة و ساعتها هايحس بامكانيتها

ربنا يكرمكوا جميعا و ارجو ان اكون افتدكم

**khaabas** · 19-03-2013 08:25 PM

ربنا يبارك لك فيها ويكيفيك شرها
الريو بالفعل الحصان الاسود السنة دى وغطت علي السيراتو الشكل الجديد

**2CODE** · 19-03-2013 08:46 PM

10\10 يا نمور الريو ونمور كيا بشكل عام

الريو دي السعر مقابل الجودة فعلاً :)

**S O P H O S** · 19-03-2013 08:57 PM

ما شاء الله ربنا يبارك
تقيم جميل

**Dr.M_baz** · 19-03-2013 09:31 PM

ألف مبروك ... وربنا يبارك لك فيها.

**ahmed_doudi** · 19-03-2013 09:36 PM

شكرا لردودكو جميعا و ربنا يكرمنا و يحفظنا كلنا

أنا نسيت نقطة مهمة و في ناس كتير مش بتأخذ بالها منها و هي العزل.
عزل الريو يعتبر ممتاز وخصوصا في مصر مع الزحمة و الدوشة و الأسفلت المصري الجميل :)
الناس برة بتهتم بالنقطة دي أوي في تقييم العربيات

**aouelfotouh** · 20-03-2013 12:21 AM

الف الف شكرا على التقرير فعل عزل العربيه قوى مانع الاصوات الخارجيه ام المتور وده ملوش صوت اصل ولا احساس وانا وقعة اكتر من مره فى النقطه ده ابقه فاكر العربيه مبطله وهى دايره لان احساس ان المتور شغال مش موجود

**HSE_eng_ramy** · 20-03-2013 09:04 PM

تقرير 100% ربنا يباركلك فيها ويكفيك شرها وفعلا اهم حاجة انتا ذكرتها موضوع العزل.

**Ahmad Samir** · 21-03-2013 11:26 AM

الف الف مبروك وربنا يديك خيرها ويكفيك شرها , بس موضوع صوت الموتور ده , أنا عندي بسمع صوت الموتور واحياناً فى صوت تصفيره خفيفه مش عارف من ايه ؟؟؟
بس الموتور صوته مسموع بالنسبالي , بس مفيش خلاف ان العربيه ناعمه جداً ما شاء الله