بخصوص رخصة القيادة

**theangel** · 19-03-2013 10:21 PM

السلام عليكم ورحمة الله وبركاته

بإختصار - انا دلوقت بسوق من حوالي 3 سنين والحمد لله بسوق كويس جدا جدا
بس الكلام ده كله من غير رخصه
المهم انا قدمت علي رخصه انا عندي 22 سنه - وان شاء الله ميعاد الإمتحان بكره - وقدمت امتحان علي طول مش مدرسه قدمت يوم 13/3 واتحددلي ميعاد الإمتحان 20/3 اللي هو بكره ان شاء الله

دلوقت الكارت الأزرق اللي معايا ده اللي هو مكتوب عليه future driver ده بتدرب بيه ف البيت عادي ولا بستخدمه في المرور بس ولا ايه

وبالنسبه للمصاريف انا دفعت اول ماروحت 160- وده اللي كان مكتوب علي الشباك بتاع الخزينه هل في مصاريف بعد كده - وهستلم الرخصه علي طول ولا هستني اسبوع كمان ؟

عايز اعرف ايه اللي المفروض الواحد يعمله علشان يعدي من الموضوع ده - لإني بسمع كتير ان اللي مش بيدخل مدرسه بيسقطوه وفي الغالب بيبقي في اختبار الكمبيوتر !

محتاج خبراتكم في الموضوع ده تجنبا للمطبات اللي ممكن نقابلها في اليوم ده

**samihanwar** · 21-03-2013 09:34 PM

متابع معاك
بس 160 جنيه كتيييير اوى
ده اخر مره كلو فى قلب بعضو معاداش ال 50 جنيه

**theangel** · 27-03-2013 02:12 PM

المشاركة الأصلية كتبت بواسطة samihanwar

متابع معاك
بس 160 جنيه كتيييير اوى
ده اخر مره كلو فى قلب بعضو معاداش ال 50 جنيه

160 + 110 رسوم استخراج - بعد لما تنجح ف الإختبار

والحمد لله بعد سواقه 3 سنين ورايحلهم بالعربيه وجايب 100% ف اختبار الكمبيوتر وعديت القراطيس - سقطوني
وبقول للظابط اللي ماسك المرور انا بسوق من زمان وحتي جاي بالعربيه وبسافر وبروح واجي - يقولي بس مبتمشيش بين القراطيس مع اني موقعتش ولا واحد ولله -وبكل برود يقولي 3 شهور وتعالي -
مع العلم برضو اني اعرف ناس مطلعاها وكل اللي بتعرف تعمله انها تدور العربيه مع حاجات بسيطه - بس الفرق كله انهم دخلو المدرسه
طبعا انا رجعت من هناك كاره نفسي لإني كنت ف المرور من الساعه 11 الصبح والإمتحان كان الساعه 12 - البهوات مجوش غير الساعه 2 وماشي من هناك الساعه 4
لما تبقي بتسوق كويس جدا جدا جدا جدا -ويسقطوك واللي مبيعرفش يسوق مطلعها -اللي عايز يمشي ف البلد دي قانوني بيطلع عين اهله وانا اسف ف اللفظ
وحسبي الله ونعم الوكيل ..

**scotcho** · 28-03-2013 02:15 PM

يا جماعة انا طلعت رخصة الاسبوع اللي فات من غير مدرسة ولا واسطة ولا اي اي كلام طبيعي جدا امتحنت نظري(اشارات) بعدها اما نجحت امتحنت عملي في نفس اليوم ونجحت وقالولي تعالى بكرة اتصور وفعلا روحت تاني يوم اتصورت واخدت الرخصة (مرور التجمع )

**neel** · 14-04-2013 03:10 PM

سواقتي علي ادها خالص :)
استحرمت ادفع رشوة

توكلت علي الله وروحت طلعتها في نفس اليوم ولم يمتحنونا في الكومبيوتر مع اني حفظت 360 سؤال :)

توكل علي الله وان شاء الله ناجح المرة الجاية