تقرير مختصر لصيانة الـ١٠٫٠٠٠ الانترا md
تقرير
السلام عليكم و رحمة الله و بركاته
المكان: غبور العبور.
الميعاد: الثلاثاء ١٩ مارس الساعة ٩ صباحاً.
السبب من الزيارة: صيانة ١٠٫٠٠٠، تركيب جهاز الإنذار الجديد و تغيير طارة الدركسيون عشان الجلد بيقشر
و الشماسة الشمال عشان فيها حتة لزق فكت لوحدها.
مهندس الاستقبال: المهندسة ميادة رشاد، طيبة الخلق، طويلة البال... بس عليها عفوية في الكلام، تعدمها يعني،
محتاجة تبقي أكثر احترافية.
المهندسة ميادة استلمت السيارة في خلال ١٠ دقائق من وصولي و قالتلي الساعة واحدة كله يبقي خلصان،
ما عدا الشماسة، عند قسم الهياكل في المبني المجاور.
بالفعل في تمام الساعة ١٢:٤٥ دقيقة، تم تسليم العربية لسعادتي و بها الطارة الجديدة كمان.
و بعدين طلعت علي قسم الهياكل لتركيب الشماسة، لكن لم يجدوا اللون، وتم طلبها من اجلي للتركيب لاحقاً.
المهم طالع علي الطريق يا معلم، لقيت الطارة مش متوسطنة، رحت كاسر يمين و ماشي في شوية رملة و هوب عند ميادة تاني.
دخلتلي العربية تاني علي جهاز الزوايا و ربع ساعة كده العربية راجعة.
طلعت أجرب، لقيتها احسن من الاول بس لسه في شعره يمين بس الزوايا تمام.
قلت ايه الجبنة ديه.. طبعا مش جبنة، بس خوفاً من الوقف.. ههههه.
هوب عند ميادة تاني... راحت كلمت الفنيين و اديتلهم فين يوجعك..
خدوا العربية تاني و بعدين لقيت مدير الورشة خارجلي بها هو و فني و بيقولي ما فيهاش حاجة..
طبعا جو رخيص... انا عارف انا بقول ايه و الزبون دائماً علي حق، و راح الفني طلع مجرب معايا
و يقولي بص اهي حلوة اهي، قلتله خلاص فكك... انتم اخركوا كده و انا مستعجل خلاص. سلام عليكم.
ما علينا.. تكلفة الإنذار ٣٢٠ جنيه، تكلفة الصيانة ٢٥٠ جنيه و تكلفة زيت و فلتر ٣٠٠ جنيه شل هليكس.
جهاز الإنذار ليس الا حساس حركة... هما مسمينها وحدة فصل... أي اشتغالات...
العربية أصلا فيها وحدة فصل في حالة انك بدور العربية و الإنذار شغال.
اتمني ان جلد الطارة الجديدة يكون افضل ان شاء الله.
الانطباع العام عن الزيارة: جيد... علي غير العادة.
الانطباع عن مهندسة الاستقبال فنيا و خلقيا: ٨ من ١٠
الانطباع عن مدير الورشة المهندس وجدي او مجدي: صفر.
الانطباع عن إمكانيات الاستراحة: ٧ من ١٠. المشاريب علي حسابك و ما فيش إنترنت.
اتمني اني اكون وفقت في التقرير.
تحياتي