الموضوع: تى إى داتا وعدم إحترام عملائها

بصراحة انا اتعاملت مع الشركة دي من كام شهر كده ووصلت تبعهم ولاقيتهم كويسين في خدمتهم والنت نادرا لما بيفصل هما فعلا عندهم مشكلة في موضوع خدمة العملاء انهم بيردوا متأخر وبيلطعوك علي السماعة فترة كبيرة بس لما بيردوا بيفيدوني بصراحة.
معلش ممكن توضح بس القرار اللي عملوه ده خاص بمين بالضبط تقصد يعني بالناس اللي مركبة خط DSL ومشترك معاهم ناس تانية في العمارة ولا مين.
اصلي مركبة DSL بس خط لوحدي وعندي مودم خاص بيا من عندهم ومش مشتركة مع حد من الجيران.
ولما بروح ادفع الفاتورة بدفعا وانا واقفة من غير اي تأخير ومعاملتهم كويسة لحد الأن معانا.
واحب اوضح برده اني لما جيت اقدم عندهم في الاول اصلا قالولي قدامك فترة اسبوعين تقريبا والخدمة تدخلك وفعلا بعد ماشتركت بيومين جالي واحد من الشركة وسلمني المودم وبعدها بإسبوعين او اقل الخدمة اشتغلت عندي وكله تمام بس هما في حتة وقعت منهم انهم مبلغونيش يوم مالخدمة دخلت الا لما انا اتصلت بيهم وكل شهر يبعتولي على الموبايل رسالة يبلغوني بمعاد الدفع بس بقالي شهرين مستلمتش منهم رسايل وبصراحة مش عارفة العيب من عندهم ولا من موبايلي لإنه احيانا بيهيس
عموما ياريت تقولنا يادكتور تفصايل اكتر عن تجربتك معاهم لإني سايفة انهم افضل من شركة تانية مركبين تبعهم في الشركة عندي والخدمة عندهم سيئة جدا وممطالين جدا جدا

هو للامانه يادكتور جاتلي منهم رساله من يومين باليوزر الجديد و الباص
يمكن حصل لخبطه و متبعتتش لحضرتك

المشاركة الأصلية كتبت بواسطة Dr Ahmed

حظووووووووووووظ
بس انت الوحيد يا بوحميد اللى سمعت أن رسالة وصلته
ومن حيث اللخبطة دى وقعة كبيرة مش لخبطة وبس

كل الموضوع اني اشتكيت اكتر من مره ان رساله تجديد الاشتراك مش بتيجي فطلبو مني رقم التليفون و من ساعتها داوشني رسايل :)
يمكن ده السبب لو علي كده يبقي مقدور عليها

السلام عليكم جميعا
انا مختلف معاك يا دكتور احمد انا مشترك مع TEData من اكثر من سنة والحمدلله الخدمة مقطعتشي مني والموضوع مش حظ هو انا بس عشان متابع الويب سايت بتاعهم فعرفت بالموضوع ده قبل حتي هما ما يبعتو الرسالة وبعدين انا فهمت من حضرتك انك تبع موزع فالشركة نفسها في حالة زي دي ملهاش اي مسؤلية عن اي عميل تبع موزع لان الموزع يعتبر هو الشركة في الحالة دي وهو المسؤل انوا يبلغ العميل باي تغير في الخدمة مش الشركة وبعدين انا عاوز اقول لحضرتك انك عميل من 400000 عميل فاكيد هيكون في بعض العملة حظهم وحش بس في الاخر الخدمة ممتازة
وشكرا .....
أبو مريم

المشاركة الأصلية كتبت بواسطة Dr Ahmed

هنا مصر

حركة قرعة قامت بها الشركة المصرية لنقل البيانات (تى إى داتا) الأيام الماضية وهى إلغاء إعدادات الراوترز لكل عملائها ووضع كلمة سر وإسم مستخدم لكل خط من عندهم وعدم القدرة على استخدام الراوتر والدخول للنت بدون كلمة السر واسم المستخدم ...

مش هنسأل إيه السبب لأننا مش هنعرف
لكن تطبيق القرار كان فى غاية الإسفاف
فجأة وبدون مقدمات تجد النت قطعت ولا تدرى ما السبب ، وإذا علمت فعليك الاتصال بالموزع - الذى لن يرد عليك - أو الانتقال إليه بالراوتر والعطلة لساعات ، أو الاتصال بما يسمى بخدمة العملاء فى شركتهم الغراء لترد عليك رسالة مسجلة تضللك أكثر مما تدلك ، أو تتصل برقم آخر يضعك على الانتظار أكثر من نصف ساعة حتى تعاود الاتصال فيضعك نصف ساعة أخرى حتى تزهق وتمشى ، أو تجد أرقامهم مشغولة وتاخدها من قصيرها...

موقع تى إى داتا شيك جدا لكن خدماته صفر .. الشكاوى لا يتم بحثها ولا الرد عليها إطلاقا ، لا يمكن تحميل أى شئ من موقعهم ، معلوماتهم عن العملاء ناقصة لدرجة خطيرة (مصممين إنى مش مشترك عندهم رغم إنى بادفع بانتظام من 3 سنوات تقريبا ولحد دلوقت)

مكانش ممكن تنبيه العملاء قبل هذه الحركة العنترية؟
مكانش ممكن تنفيذها على دفعات؟
مكانش ممكن إخطار العملاء تليفونيا باسم المستخدم وكلمة السر؟
مكانش ممكن الحصول على إيميلات العملاء ومراسلتهم؟؟

تى إى داتا مثال سئ لشركة من المفترض أن تكون مثال مشرف

الموضوع ده بقاله اكتر من 6 شهور وبيتم بالتدريج على حسب المنطقة وموقع الشركة ممكن تنزل منه برنامج لإعادة ضبط الراوتر بتاعك من الرابط ده http://config.tedata.net/ حسب الخطوات الموضحة على الموقع.

تحياتي