الموضوع: سكودا فليشيا استفسار بخصوص مروحة التبريد

انا كان عندى فيليشيا وكان بيحصل عندى حاجة شبه كده وهى كالأتى

لاحظت برضه ان المروحة بتشتغل بدرى ولفترة قصيرة وتقفل وترجع تشتغل تانى بعد حاجة بسيطة. وكان ده بلاحظة خاصة فى الزحمة.

المهم انى سألت مهندس فى التوكيل وقال لى طالما المروحة بتشتغل ماتقلقش، و نسيت الموضوع وخاصة ان الحرارة كانت فعلا فى حدود ال 70-80 (مع انها كانت فى الاول بتعمل عند ال90)

المهم ان حصل ان خرطوم الريداتير كسر الزور اللى مربوط فيه البلاستيك واتخلع، وافتكرت ان انا كنت رابط الكوليه جامد شوية وهو ده اللى كسره وخاصة انه بلاستيك.
بعد فترة تانى سربنتينة الدفاية اتخرمت وبقت مية الريداتير تدخل داخل العربية من فتحات التهوية السفلية. رحت لحمتها.
بعد فترة غطاء القربة باظ وبقى بينفس باستمرار ويطلع بخار.
روحت جبت غطاء تانى جديد.
المهم ان المية فى القربة كانت بتغلى وانا افترضت ان ده عادى وخاصة ان الحرارة عندى ماكانتش بتعدى النص 90 الا بقليل يعنى قلت ممكن تكون 100 مثلا وده اللى يخليها تغلى.
لغاية ما مرة وانا بازود ميه فى محطة بنزين الميكانيكى شاف القربة وقالى الضغت ده شكله مش طبيعى ابدا لازم تكشف على المروحة .

المهم ان الاعراض دى كلها ظهرت فى خلال 3-4 شهور، بس ربنا ستر انها كانت فى الشتاء والا كان اكيد وش السيلندر ضرب.

طبعا انا طولت فى الحكاية بس تيجى هنا بقى الحتة المهمة.
اتضح ياسيدى ان حساس الحرارة عندى كان بيعطى قياس غلط . يعنى المؤشر يكون على 70 وهى فى الحقيقة 90. يعنى لما كان عندى بيعدى ال90 بحاجة بسيطة كانت فى الحقيقة 130 مثلا !
كل ده مش مؤثر بس اللى حصل ان فى يوم من الايام ترموستات المروحة باظ والمروحة بطلت تشتغل، وهى دى الايام اللى كانت الحرارة عندى بتوصل ل90 بس طبعا لأنها 90 ماكنتش شايف ان ده مش طبيعى وفضلت استخدم العربية كده فترة مش بطالة.
ربنا ستر والموتور ماحصلوش حاجة واظن ان اللى ساعد على كده برضه انى باستخدم موبيل 1 وان الموقف حصل فى الشتاء فالجو كان بيساعد على التبريد.
طبعا الزيت لقيته بعد كده قاتم السواد يعنى هو اللى اتحرق لأن الموبيل 1 عادة بيكون اصفر فاتح وفى اخر ايامه يكون بنى مش اسود.

المهم غيرت الترموستات والسنسور بتاع الحرارة وكل شيء رجع طبيعى بس يظهر ان السنسور كان مضروب ولقيت الحرارة الطبيعية كل يوم بتقل عن اللى قبله لغاية ما بعد شهرين المؤشر بطل يطلع اصلا. فرجعت القديم اللى كان بيشير ل70 لما تبقى 90 وبقيت عارف ان الحرارة لو زادت عن ال70 تبقى الموتور سخن وعاشيت حوالى سنتين على هذا الوضع بدون مشاكل لغاية ما بعتها ونبهت المشترى للقراية الخاصة للسيارة.

فنصيحتى ليك انك تكشف على سنسور الحرارة عندك او تخلى مركز صيانة يجربلك واحد تانى من عنده وتشوف المؤشر حايقول ايه بدل ما يحصلك زيى.

منقول عن mesawork@yahoo.com

الاخ العزيز كتر الف خيرك على نصيحتك الغاليه اللى لازم فعلا اتبعها
واشكرك خاصة لانى لسا مشترى العربية من شهر واحد فقط وكان معايا قبلها 128 وحاسس انى لسا بتعلم كل حاجة عن العربيات من اول وجديد
وخصوصا انى لاحظت ان الاسكودا دى مش اى حد يفهم فيها او تسأله ويجاوبك صح واكتر من كدا حاسس انها حساسة جدا فى صيانتها والفرق بينها وبين خرابها شعرة صغيرة وفعلا بسوقها وانا خايف منها حاسس انها هتعمل فيا حركة غدر جامدة
على العلم انا فرحان اوى بيها وحاسس انى نقلت نقله كبيرة من ال 128 للفليشيا كومبى وكانى ركبت مرسيدس بفرق مالى على مقدرتى وسعرها قريب من الريجاتا وال 131
هيا حاسس بيها ماسكة نفسها اوى على الطريق حتى على السرعات العالية 130 ومتزنة
بس مش بلاقى حد يدينى نصايح ازاى اخلى بالى من صيانتها
ممكن تقولى افضل زيت و على كام الف اغيرة ؟؟
ولو تعرف ميكانيكى كويس يعرف فيها تدلنى على مكانة
وايه اللى اعملة عشان اتاكد تماما ان دورة التبريد دى متعملش حركة غدر معايا خصوصا ان الناس كلها خوفتى منها فى الاول بسبب دورة تبريدها وانها اسرع عربية بتجيب وش سلندر
وكتر الف خيرك مرة اخرى على اهتمامك وردك عليا

فيه مركز ممتاز متخصص فى السكودا فقط فى اخر جسر السويس عند نادى الشمس و فندق السلام كده.
اسمه Car Care وعنوانه
2 شارع عبدالحليم محمود - بجوار سور محطة كهرباء جسر السويس
ت: 2961592
0103996357
م/ عمرو

وبمناسبة انك بتقول انها عربية حساسة قوى
انا كانت معاية ريجاتا قبلها ولما جبت الفيليشيا ماحستش بفرق تكنولوجى يذكر بينهم غير طبعا انها كانت جديدة وفرق الشكل طبعا.
وبعد 4 سنين مراتى اخدتها وانا جبت اوكتافيا لأنى ارتحت للماركة. بس بصراحة مافيش اى علاقة بينهم غير الشعار، لو جيت تقارن الاوكتافيا بالفيليشيا فعلا تحس ان الفليشيا من الجيل القديييييييييم تكنولوجيا.
فمتخافش، هى صيانتها مش هاتفرق عن ال 128 كتير خصوصا لو هى موديل ما قبل الوش الجديد لأنها بعد كده بقت انجكشن فممكن يبقى فيها نسبة حساسية.
وعلى فكرة هى طول ال 9 سنين اللى كانت معايا فيهم عمرها ما سخنت الا لما الترموستات باظ انما طول مالمروحة بتشتغل عمرها ما عملت مشاكل.
انت بس حافظ على الريداتير من الصداء بأنك ماتحطش غير ميه فيها مانع للصدأ. وابعد عن الانواع الرخيصة. لأنها مية بلون وبتصدى برضه.

منقول عن mesawork@yahoo.com


بس احب اقولك انها مع تجربتى البسيطة معاها فارقه بكتيير اوى عند ال 128 وعن الريجاتا لانى حاسس انى راكب سيارة حديثة الى حد ما.. وصالونها جميل ومريح لان طولى حوالى 190 سم وكنت بعانى جدا فى ركوب ال 128....
وانا قبل ما اجيب الكومبى كنت اتفرجت على ريجاتا ولكنى غيرت راى فيها لانى ملاقيتش ولا عربية صالونها نظيف ومفيهوش مشاكل واخرها لقيت ريجاتا تجليد الباب الداخلى الفبر مربوط بمساميير بورمة ظاهرة من جوة وكانت على 30 الف فاستخسرت احط المبلغ دا فى عربية من الثمانينات ومش جميله من جوة ورفعت المبلغ شوية ل 35 الف عشان اجيب الكومبى موديل 96 وصالونها نظيف وحالتها كويسة.... رغم اعتراض الاصدقاء والاصحاب لارتفاع سعر قطع غيارها ولان صوت موتورها خشن ومحتاجه اعتناء خاص....يعنى زى ما قالولى ( مش حمارة شغل ) عاوزة اللى يتعامل معاها بحنية
بس فعلا بعد ما جبتها حسيت انى راكب سيارة فرقت كتيير عن الريجاتا..... بس عندى سؤال اخر صغيير...هل فعلا عفشتها ضعيفة جدا ولا دا كلام مش مضبوط؟ واخيرا الف شكر لحضرتك